ရခိုင်ပြည်နယ်ဝန်ကြီးချုပ် ဒေါက်တာအောင်ကျော်မင်း ကိုဗစ်-၁၉ ရောဂါ ကူးစက်လူနာများ ကို သီးသန့်ကုသမှုပေးနိုင်ရန် ဆောင်ရွက်ထားရှိမှုအား သွားရောက်ကြည့်ရှုစစ်ဆေး

 

MNP - ဖေဖော်ဝါရီ     ၂၄

ရခိုင်ပြည်နယ်ဝန်ကြီးချုပ် ဒေါက်တာအောင်ကျော်မင်းသည် ပြည်နယ်အစိုးရအဖွဲ့ဝင် ဝန်ကြီး များ၊ ပြည်နယ်ဥပဒေချုပ်၊ အစိုးရအဖွဲ့အတွင်းရေးမှူး၊ ပြည်နယ်၊ ခရိုင်၊ မြို့နယ်အဆင့် ဌာနဆိုင်ရာ တာဝန်ရှိသူများနှင့်အတူ ယမန်နေ့နေ့လယ်ပိုင်း က စစ်တွေမြို့၊ ပြည်နယ် တိုင်းရင်းဆေးရုံ၌ ကိုဗစ်-၁၉ ရောဂါ ကူးစက်လူနာများကို သီးသန့်ကုသမှုပေးနိုင်ရန် စီစဉ် ဆောင်ရွက်ထားရှိမှုများအား သွားရောက်ကြည့်ရှုစစ်ဆေးခဲ့သည်။

ရှေးဦးစွာ ပြည်နယ်ဝန်ကြီးချုပ် ဒေါက်တာ အောင်ကျော်မင်းနှင့်အဖွဲ့သည် စစ်တွေမြို့၊ ပြည်နယ်တိုင်းရင်းဆေးရုံ၌ ကိုဗစ်-၁၉ ရောဂါ ကူးစက်ခံရသည့် အမျိုးသမီးများအား ထားရှိရန်နေရာများကို သွားရောက်ကြည့်ရှုစစ်ဆေးကြရာ ပြည်နယ်အစိုးရအဖွဲ့ ညွှန်ကြားရေးမှူးနှင့် စစ်တွေခရိုင်စီမံ အုပ်ချုပ်ရေးအဖွဲ့ဥက္ကဋ္ဌတို့က လူနာများအတွက် ခုတင်၊ အိပ်ရာခင်းများနှင့် တစ်ကိုယ်ရေသုံးပစ္စည်းများ စီစဉ်ထားရှိမှုတို့ကို လိုက်လံရှင်းလင်း ပြသခဲ့သည်။

ထို့နောက် ပြည်နယ်ဝန်ကြီးချုပ်နှင့်အဖွဲ့သည် တိုင်းရင်းဆေးရုံဆေးကုသဆောင် အပေါ်ထပ်၌ အမျိုးသားလူနာများအား ထားရှိမည့် နေရာများအား သွားရောက်ကြည့်ရှု စစ်ဆေးခဲ့သည်။

ထိုသို့ သွားရောက်ကြည့်ရှု စစ်ဆေးကြစဉ် ပြည်နယ်ဝန်ကြီးချုပ်က တိုင်းရင်းဆေးရုံအတွင်း လျှပ်စစ်မီးများ ကောင်းမွန် ရေး၊ ရေချိုးခန်း၊ အိမ်သာများ ကောင်းမွန်ရေးနှင့် ဆေးရုံပတ်ဝန်းကျင် သန့်ရှင်းသာယာရေးတို့ကို ဌာနဆိုင်ရာ တာဝန်ရှိသူများနှင့် ပေါင်းစပ် ဆောင်ရွက်ကြရန် မှာကြားခဲ့သည်။

စစ်တွေမြို့ရှိ ပြည်နယ် တိုင်းရင်းဆေးရုံတွင် ဌာနဆိုင်ရာဝန်ထမ်းများမှ ကိုဗစ်-၁၉ရောဂါ ကူးစက်ခံရသူများအား ကုသမှု ပေးနိုင်ရန်အတွက် လူနာ(၈၀)ဦးအတွက် စီစဉ်ဆောင်ရွက် ထားကြောင်း သိရသည်။

စစ်တွေမြို့နယ်တွင် ခုတင် ၅၀၀ ဆံ့ပြည်သူ့ဆေးရုံကြီး၊ စစ်တွေတက္ကသိုလ်နှင့် ပြည်နယ် တိုင်းရင်းဆေးရုံတို့တွင် ကိုဗစ် ကူးစက်ခံရသူများအား သီးသန့်ကုသမှုပေးနိုင်ရန်အတွက် လူဦးရေ ၅၈၀ ခန့်အတွက် စီစဉ်ဆောင်ရွက်ထားကြောင်း သိရသည်။

သတင်း - တင်ထွန်း

မြန်မာနေရှင်နယ်ပို့စ်