MNP - ဖေဖော်ဝါရီ ၁၈
တနင်္သာရီတိုင်းဒေသကြီး၊ ထားဝယ်ခရိုင်၊ သရက်ချောင်း မြို့နယ်တွင် ကိုဗစ်-၁၉ရောဂါ ကာကွယ်ဆေး နှစ်ကြိမ် ထိုးနှံထားပြီး ခြောက်လပြည့်ပြီးသည့် မြို့နယ်ဌာနဆိုင်ရာဝန်ထမ်းများ၊ ပုဂ္ဂလိကဝန်ထမ်းများနှင့် ပြည်သူများအား ထပ်ဆောင်းကာကွယ်ဆေး Booster Dose ထိုးနှံပေး ခြင်းကို ယနေ့၊ နံနက် ၉ နာရီမှနေ့လယ် ၁၂ နာရီအချိန်အထိ သရက်ချောင်းမြို့နယ်၊ ပြည်သူ့ဆေးရုံဝင်းအတွင်းရှိ မြို့နယ်ကျန်းမာရေးဦးစီးဌာနတွင် ဆက်လက် ထိုးနှံပေးလျက်ရှိကြောင်း သိရသည်။ ထိုသို့ကိုဗစ်-၁၉ရောဂါ ကာကွယ်ဆေးထပ်ဆောင်း Booster Dose လာရောက်ထိုးနှံသည့် ဝန်ထမ်းများနှင့် ပြည်သူများအား ကာကွယ်ဆေးမထိုးမီ စာရင်းရေးသွင်းခြင်း၊ အပူချိန် တိုင်းတာပေးခြင်းများ ပြုလုပ်ပြီး အလှည့်ကျ ကိုဗစ်-၁၉ ရောဂါ ကာကွယ်ဆေး Booster ထိုးနှံပေးသည်။
ထို့နောက် ကာကွယ်ဆေးထိုးနှံပြီးသူများကို မိနစ်(၃၀)ခန့်အနားယူစေပြီး ကိုဗစ်-၁၉ရောဂါ ကြိုတင်ကာကွယ်ရေး လမ်းညွှန်ချက်များနှင့်အညီ သက်ဆိုင်ရာကျန်းမာရေး ဌာနဝန်ထမ်းများနှင့် တာဝန်ရှိသူများက ကျန်းမာရေး စောင့်ရှောက်မှုများ ဆောင်ရွက်ပေးလျက်ရှိသည်။
သရက်ချောင်းမြို့နယ်အနေဖြင့် ကိုဗစ်-၁၉ရောဂါကာကွယ်ဆေး ထပ်ဆောင်း Booster Dose အဖြစ် အိန္ဒိယနိုင်ငံ ထုတ် Covaxin ကိုဗစ်-၁၉ရောဂါ ကာကွယ်ဆေးကို ဖေဖော်ဝါရီလ ၁၆ ရက်နေ့ကစ၍ ထိုးနှံပေးခဲ့ရာ ယနေ့အထိ (၁၄၁) ဦး ထိုးနှံပေးခဲ့ပြီး ကျန်ရှိသူများကိုလည်း ဦးစားပေးအုပ်စုအလိုက် ဆက်လက်ထိုးနှံပေးမည်ဖြစ်ကြောင်း သိရသည်။
သတင်း - နန်းခလိုက်
မြန်မာနေရှင်နယ်ပို့စ်
No comments:
Post a Comment