MNP - မတ် ၃၀
ရန်ကုန်တောင်ပိုင်းခရိုင်၊ ဆိပ်ကြီးခနောင်တိုမြို့နယ်၌ မြို့နယ်စီမံအုပ်ချုပ်ရေး အဖွဲ့မှ ၂၀၂၁၂၀၂၂ ပညာသင်နှစ်၊ တက္ကသိုလ် ဝင်တန်းစာမေးပွဲတွင် မြို့နယ်စာစစ်ဌာန ပြုလုပ်မည့် အခြေခံပညာ အထက်တန်းကျောင်း(အထက- ခနောင်တို) ကြိုတင်ပြင်ဆင် ဆောင်ရွက်ထားရှိမှု အခြေအနေအား ယမန်နေ့ ညနေ ၃ နာရီက ကွင်းဆင်း ကြည့်ရှု စစ်ဆေးခဲ့သည်။
ထိုသို့ ကြည့်ရှုစစ်ဆေးရာတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးမြင့်လှိုင်နှင့် အဖွဲ့ဝင်များက တက္ကသိုလ်ဝင်တန်း စာမေးပွဲ ဖြေဆိုမည့် ကျောင်းသား၊ ကျောင်းသူများ စာမေးပွဲဖြေဆိုရာတွင် ဘေးကင်းလုံခြုံရေး အေးချမ်းစွာစာမေးပွဲဖြေဆိုနိုင်ရေးအတွက် စာမေးပွဲဖြေဆိုမည့် အခန်းများ၊ စာဖြေခုံများ ပြင်ဆင်ထားရှိမှုများ၊ စာဖြေခန်းများနှင့် ကျောင်းဝင်း အတွင်း/အပြင် သန့်ရှင်းရေး ဆောင်ရွက်ထားရှိမှုများ၊ ကျောင်းသား၊ ကျောင်းသူများအတွက် ကျန်းမာရေးစောင့်ရှောက်မှု ထားရှိမည့်အစီအစဉ်များ၊ လျှပ်စစ်မီး သွယ်တန်း တပ်ဆင်ထားရှိမှုအခြေအနေများနှင့် စာစစ်ဌာနကျောင်း၏ အတွင်း/အပြင် လုံခြုံရေး ချထားဆောင်ရွက်ထားရှိမှု အခြေအနေများအား ကြည့်ရှုစစ်ဆေးရာ မြို့နယ်ပညာရေးမှူးနှင့် တာဝန်ကျကျောင်းအုပ်ဆရာမကြီးမှ ကဏ္ဍအလိုက် ဆောင်ရွက် ထားရှိမှု အခြေအနေများအား လိုက်လံရှင်းလင်းပြသ ပြောကြားခဲ့သည်။
ဆိပ်ကြီးခနောင်တိုမြို့နယ်၌ ၂၀၂၁- ၂၀၂၂ တက္ကသိုလ်ဝင်တန်းစာမေးပွဲအတွက် အခြေခံပညာအထက်တန်းကျောင်း (အထက-ခနောင်တို) စာစစ်ဌာနတစ်ခုထားရှိပြီး၊ စာမေးပွဲဝင်ရောက်ဖြေဆိုရန် ကျောင်းသား၊ ကျောင်းသူ ၂၉၈ ဦးစာရင်း ပေးသွင်း ထားကြောင်း မြို့နယ်ပညာရေးမှူးရုံးမှ သိရသည်။
သတင်း - ဝေယံ
မြန်မာနေရှင်နယ်ပို့စ်
No comments:
Post a Comment