MNP ၊ မတ် ၆
ကရင်ပြည်နယ်သည် စိုက်ပျိုးရေးကိုအခြေခံသည့် ပြည်နယ်တစ်ခုဖြစ်ပြီး လယ်ယာကဏ္ဍဖွံ့ဖြိုးတိုးတက်ရေးနှင့် စက်မှုလယ်ယာသို့ကူးပြောင်းနိုင်ရေးအတွက် စက်မှုလယ်ယာဦးစီးဌာနနှင့် နည်းပညာ၊သက်မွေးပညာနှင့်လေ့ကျင့်ရေးဦးစီးဌာနတို့ ပူးပေါင်းဖွင့်လှစ်သည့် လယ်ယာသုံးစက်ကိရိယာပြင်ဆင်ထိန်းသိမ်းမှုအခြေခံသင်တန်း အပတ်စဉ် (၁/၂၀၂၂) သင်တန်းဆင်းပွဲကို ယမန်နေ့မွန်းလွဲ ၂ နာရီခန့်က ဘားအံမြို့ အစိုးရနည်းပညာအထက်တန်းကျောင်း၌ ကျင်းပသည်။
သင်တန်းဆင်းပွဲတွင် ကရင်ပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးစောမြင့်ဦး က လယ်ယာသုံးစက်ကိရိယာများကို ရေရှည်အသုံးပြုနိုင်ရေးအတွက် ပြင်ဆင်ထိန်းသိမ်းတတ်ရန်မှာ အလွန်အရေးကြီးပါကြောင်း၊ သင်တန်းမှ စာတွေ့လက်တွေ့ သင်ကြားပေးလိုက်သည့်အတွက် လယ်ယာသုံးစက်ကိရိယာများကို ကျွမ်းကျင်ပိုင်နိုင်စွာ စနစ်တကျကိုင်တွယ်နိုင်မည်ဖြစ်ပြီး အလုပ်အကိုင်အခွင့်အလမ်းများ၊ တစ်ဦးချင်းဝင်ငွေများ ပိုမိုမြင့်မားလာမည်ဖြစ်ကာ စိုက်ပျိုးရေးလုပ်ငန်းခွင်တွင် နည်းပညာများပိုမိုတတ်ကျွမ်းစွာဖြင့် လျင်မြန်စွာ ထွန်ယက်စိုက်ပျိုး လုပ်ကိုင်လာနိုင်ဖြစ်ကြောင်း၊ သင်တန်းဆင်းသင်တန်းသားများအနေဖြင့် မိမိတတ်ကျွမ်းထားသည့် ပညာရပ်များဖြင့် လယ်ယာစီးပွားလုပ်ငန်းများကို လုပ်ကိုင်ပြီး မိမိရပ်ရွာအကျိုးကို စွမ်းစွမ်းတမံဆောင်ရွက်ကြစေလိုကြောင်း ပြောကြားသည်။
ထို့နောက် ပြည်နယ်ဝန်ကြီးချုပ် က လယ်ယာသုံးစက်ကိရိယာ ပြင်ဆင်ထိန်းသိမ်းမှု အခြေခံသင်တန်း အောင်လက်မှတ်များပေးအပ်ရာ သင်တန်းသားများကိုယ်စား သင်တန်းသားတစ်ဦးက လက်ခံရယူပြီး သင်တန်းထူးချွန်ဆု ပထမ၊ ဒုတိယ၊ တတိယဆု ရရှိသူများအား ဂုဏ်ပြုဆုများ ပေးအပ်ချီးမြှင့်ကာ စုပေါင်းမှတ်တမ်းဓါတ်ပုံများ ရိုက်ကူးခဲ့ကြသည်။
သတင်း - စောမျိုးမင်းသိန်း
https://t.me/MyanmarNationalPost
No comments:
Post a Comment