MNP - မတ်လ ၂
မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ် စီမံအုပ်ချုပ်ရေးအဖွဲ့ဝင်များသည် မြို့နယ်အတွင်းရှိ ဥယျာဉ်ဇင်ကျေးရွာနှင့် ထနောင်းတောကျေးရွာများသို့ ဒေသဖွံ့ဖြိုးရေး လုပ်ငန်းများကို ယမန်နေ့ မွန်းလွဲ ၃ နာရီအချိန်က ကွင်းဆင်း ဆောင်ရွက်ခဲ့ကြကြောင်း သိရသည်။
ထိုသို့ဆောင်ရွက်ရာတွင် မြို့နယ် စီမံအုပ်ချုပ်ရေးအဖွဲ့ဥက္ကဋ္ဌ ဦးတင်မြင့်က မြို့နယ်အတွင်းရှိ ဒေသခံပြည်သူများ၏ လူနေမှုဘဝ ဖွံ့ဖြိုးတိုးတက်စေရန်နှင့် ရပ်ရွာအတွင်း အေးအေးချမ်းချမ်းဖြင့် နေထိုင်စားသောက်နိုင်ရေးတို့အတွက် လာရောက်ဆွေးနွေး ဆောင်ရွက်ကြခြင်းဖြစ်ကြောင်း၊ ဒါကြောင့် ရပ်ရွာအတွင်း လုံခြုံရေးကို အထူးဂရုစိုက်ပြီး၊ မီးဘေးလုံခြုံရေးကိုလည်း ပေါ့ဆလို့မဖြစ်ကြောင်း ကျေးရွာသူ ကျေးရွာသားများကလည်း အခက်အခဲများကိုတင်ပြပြီး မိမိတို့ဘက်က လုပ်ပေးနိုင်တာမှန်သမျှ ပြန်၍လုပ်ပေးစေလိုကြောင်း၊ ကိုဗစ်-၁၉ ရောဂါနှင့် မျိုးရိုးဗီဇပြောင်း အိုမီခရွန် ရောဂါသည်လည်း ဖြစ်ပွားလာတဲ့အတွက် ကျေးရွာအတွင်း ကိုဗစ်-၁၉ ရောဂါ ကြိုတင်ကာကွယ်နိုင်ရန် ကာကွယ်ဆေးထိုးခြင်းနှင့် ကျန်းမာရေးဝန်ကြီးဌာနမှ ထုတ်ပြန်ထားသော စည်းကမ်းချက်များကို စနစ်တကျ လိုက်နာဆောင်ရွက်ကြရန်တို့ကို ဆွေးနွေးပြောကြားခဲ့သည်။
ထို့နောက် ဆွေးနွေးပွဲသို့ တက်ရောက်လာကြသော ရွာသူ၊ ရွာသားများက မိမိတို့ရပ်ရွာများတွင် လိုအပ်လျက်ရှိသော မီး၊ ရေ၊ လမ်းများကောင်းမွန်ရေးတို့ကို တင်ပြတောင်းဆိုကြရာ မြို့နယ်စီမံဥက္ကဋ္ဌက တင်ပြလာမှုများအပေါ် သက်ဆိုင်ရာ ဌာနအကြီးအကဲများနှင့် ညှိနှိုင်းဆောင်ရွက်ပေးခဲ့ကြောင်း သိရသည်။
သတင်း - ဇေယျာထက်
မြန်မာနေရှင်နယ်ပို့စ်
No comments:
Post a Comment