MNP - မတ် ၃၀
ရှမ်းပြည်နယ်(မြောက်ပိုင်း)၊ မိုင်းရယ်မြို့နယ်၊ မြို့နယ်စီမံအုပ်ချုပ်ရေးကောင်စီဥက္ကဋ္ဌနှင့် အဖွဲ့ဝင်များ၊ ဌာနဆိုင်ရာတာဝန်ရှိသူများက ယမန်နေ့နံနက် ၁၀ နာရီက အခြေခံပညာအထက်တန်းကျောင်း၌ မတ်လ ၃၁ ရက်နေ့မှ စတင်ဖြေဆိုမည့် တက္ကသိုလ်ဝင်စာမေးပွဲအခန်းများ ပြင်ဆင်ထားမှုကို စစ်ဆေးခဲ့သည်။
မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးစိုးမင်းအောင်က စာမေးပွဲဖြေဆိုသည့် ကာလအတွင်း ကျောင်းသား၊ ကျောင်းသူများ အေးချမ်းစွာဖြေဆိုနိုင်ရေးအတွက် လုံခြုံရေးအဖွဲ့များဖြင့် တာဝန်များခွဲဝေချထားမှု၊ လျှပ်စစ်မီးရရှိရေးအတွက် ဆောင်ရွက်ထားရှိမှု၊ ကိုဗစ်-၁၉ ရောဂါဆိုင်ရာ ထောက်ပံ့ထားရှိမှုများနှင့် ကျန်းမာရေးအခက်အခဲများဖြစ်ပေါ်ပါက ဆောင်ရွက်ပေးနိုင်ရန်အတွက် ကျန်းမာရေးဝန်ထမ်းများ တာဝန်ချထားမှုတို့ကို တိကျစွာဆောင်ရွက်သွားရန် ဆွေးနွေးမှာကြားခဲ့သည်။
မိုင်းရယ်မြို့နယ်အနေဖြင့် တက္ကသိုလ်ဝင်စာမေးပွဲဝင်ရောက်ဖြေဆိုမည့် ကျောင်းသား၊ ကျောင်းသူ စုစုပေါင်း(၈၅)ဦးရှိပြီး စာမေးပွဲဖြေဆိုမည့်အခန်း(၃)ခန်း၊ အရေးပေါ်စာဖြေခန်း (၂)ခန်းနှင့် ဆေးရုံတွင် စာဖြေခန်း(၁)ခန်းဖြင့် ပြင်ဆင်ဆောင်ရွက်ထားရှိကြောင်း သိရသည်။
သတင်း - ကျော်ဇင်ထိုက်
မြန်မာနေရှင်နယ်ပို့စ်
No comments:
Post a Comment