MNP - မတ် ၂၉
ဧရာဝတီတိုင်းဒေသကြီး၊ မအူပင်ခရိုင် ပြန်ကြားရေးနှင့်ပြည်သူဆက်ဆံရေးဦးစီးဌာန၊ Community Centre ခန်းမ၌ ရှေးဦးအရွယ် ကလေးသူငယ်ပြုစုပျိုးထောင်ရေး၊ ဖွံ့ဖြိုးရေးနှင့် ကလေးသူငယ် ကာကွယ်စောင့်ရှောက်ရေး အသိပညာပေး Talk Show ကို မတ်လ (၂၇)ရက်နေ့ မွန်းလွဲ ၁ နာရီအချိန်ခန့်က ကျင်းပပြုလုပ်ခဲ့ကြောင်း သိရသည်။
ထိုသို့ကျင်းပပြုလုပ်ရာတွင် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ခရိုင်တာဝန်ခံ ဒေါ်တင်သူဇာလှိုင်က အသိပညာပေး Talk Show ပြုလုပ်ရခြင်း ရည်ရွယ်ချက်အား ရှင်းလင်းပြောကြားပြီး ခရိုင်လူမှုဝန်ထမ်းဦးစီးဌာန၊ လက်ထောက်ညွှန်ကြားရေးမှူး ဒေါ်ဆင့်က ရှေးဦးအရွယ် ကလေးသူငယ် ပြုစုပျိုးထောင်ရေး၊ ဖွံ့ဖြိုးရေးနှင့် ကလေးသူငယ် ကာကွယ်စောင့်ရှောက်ရေးတွင် မွေးကင်းစမှ အသက်(၈)နှစ်အထိ ရှေးဦးသူငယ်ဖြစ်ကြောင်း ဦးစီးဌာနအနေဖြင့် ကလေးသူငယ်ပြုစုရေးဌာနများတွင် ဘက်စုံဖွံ့ဖြိုးတိုးတက်ရေး ဆောင်ရွက်သည့် လုပ်ငန်းများ၊ မူလတန်းကြိုကျောင်းများ ဖွင့်လှစ်ခြင်း၊ ပုဂ္ဂလိကကျောင်းများ မှတ်ပုံတင်ပေးခြင်း၊ ရပ်ရွာအခြေပြု မိခင်ဝိုင်းများ ဆောင်ရွက်ပေးလျက်ရှိကြောင်းနှင့် ကလေးငယ်များ၏ စိတ်ပိုင်းဆိုင်ရာ၊ ရုပ်ပိုင်းဆိုင်ရာ ဖွံ့ဖြိုးတိုးတက်ရေး၊ ထိခိုက်မှုမရှိစေရေးသည် အရေးကြီးသည့်အတွက် ဝိုင်းဝန်းကူညီပံ့ပိုးပေးရန်လိုကြောင်း အသိပညာပေး ဆွေးနွေးခဲ့ကြောင်း သိရသည်။
မြန်မာနေရှင်နယ်ပို့စ်
No comments:
Post a Comment