MNP - ဧပြီ ၃၀
စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် ယနေ့ နံနက် ၄ နာရီ ၁၅ မိနစ် ခန့်က လေပြင်းများတိုက်ခတ်ပြီး မိုးနှင့် အတူ မိုးသီးများ ပါကျရောက်မှုကြောင့် မြို့ပေါ်ရပ်ကွက် အချို့၌ နေအိမ်ပေါ် သစ်ပင်ပိမိခြင်း၊ ကားလမ်းမပေါ် သစ်ပင်ပြိုလဲခြင်းနှင့် နေအိမ်အချို့ အမိုးလန်ပျက်စီးခဲ့ကြောင်း သိရသည်။
အဆိုပါ မိုးသက်လေပြင်းကြောင့် ကန့်ဘလူမြို့ အမှတ်(၂) ရပ်ကွက်ရှိ (၁၂× ၁၂× ၁၀) ပေ သွပ်မိုး၊ ထရံကာ၊ ပျဉ်ခင်းတစ်ထပ် လူနေအိမ်အဆောက်အဦပေါ်သို့ လုံးပတ်ငါးပေခန့်ရှိ မန်ကျည်းပင်လဲကျ၍ ပိမိခြင်းအား မြို့နယ်မီးသတ်ဦးစီးမှူး ဦးမိုးကျော်သူနှင့် တပ်ဖွဲ့ဝင်များ၊ မြို့နယ်တာဝန်ရှိသူများက သွားရောက်ရှင်းလင်း ဖယ်ရှားခဲ့ကြောင်းနှင့် အမှတ်(၅) ရပ်ကွက် ကန့်ဘလူ- နတ်ပေးကားလမ်းမပေါ်တွင် လုံးပတ်သုံးပေခန့်ရှိ ပေါက်ပင်လဲပြိုကာ ကားလမ်း ပိတ်မိနေ၍ သွားရောက်ဖယ်ရှား ရှင်းလင်းခြင်းများ ဆောင်ရွက်ခဲ့ကြောင်း သိရသည်။
ကန့်ဘလူမြို့နယ်တွင် မိုးသည်းထန်စွာ ရွာသွန်းပြီး လေပြင်းများ တိုက်ခတ်မှုကြောင့် နေအိမ် (၁)လုံး သစ်ပင်ပိမိခြင်းနှင့် နေအိမ်(၈)လုံး အမိုးလန်ပျက်စီးခြင်းများ ဖြစ်ပေါ်ခဲ့ပြီး လူ၊ တိရစ္ဆာန် များ ထိခိုက်ဒဏ်ရာရရှိမှုမရှိကြောင်း သိရသည်။
သတင်း - အောင်ဝင်းငြိမ်
မြန်မာနေရှင်နယ်ပို့စ်
No comments:
Post a Comment