MNP - ဧပြီ ၅
ကချင်ပြည်နယ်၊ မြစ်ကြီးနားခရိုင်၊ တနိုင်းမြို့နယ် ပြန်ကြားရေးနှင့်ပြည်သူ့ဆက်ဆံရေး ဦးစီးဌာန လူထုအခြေပြုဗဟိုဌာန (Community Centre) ခန်းမ၌ ယမန်နေ့ နံနက်(၁၀)နာရီက လူရှိုင်း (လူရှေ)စာပေနှင့် ယဉ်ကျေးမှုအသင်းမှ ရေးသားပြုစုသည့် "မိုးကလေးဘယ်ကလာ" ခေါင်းစဉ်ဖြင့် ပုံပြင်ပြောခြင်း အစီအစဉ် ကျင်းပပြုလုပ်ခဲ့သည်။
ရှေးဦးစွာ မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ရုပ်သံကျွမ်းကျင်-၃(ပြ) ဒေါ်ဂျာအောင်လုက ပုံပြင်ပြောအစီအစဉ် ပြုလုပ်ရခြင်းဖြင့် စာပေဖတ်ရှုသည့် အလေ့အကျင့် ကောင်းများ ဖြစ်စေရန်၊ အချိန်ကို တန်ဖိုးထားတတ်စေရန်၊ စာပေအကြောင်းအရာများကို အပြန်အလှန် နှီးနှောဖလှယ်နိုင်စေရန်၊ စာပေဖတ်ရှုခြင်းဖြင့် အသိပညာဗဟုသုတများ တိုးပွား လာစေရန် စသည့်ရည်ရွယ်ချက်များနှင့် "မိုးကလေးဘယ်ကလာ"ပုံပြင်ထဲမှ သိမှတ်ဖွယ်ရာများ အကြောင်းအရာများကို ဆွေးနွေးပြောကြားခဲ့သည်။
အဆိုပါ အသိပညာပေး ပုံပြင်ပြောအစီအစဉ်သို့ မူလတန်းအဆင့် ကျောင်းသား/ကျောင်းသူ ကလေးငယ်(၄၀)ဦး တက်ရောက်ခဲ့သည်။
မြန်မာနေရှင်နယ်ပို့စ်
No comments:
Post a Comment