MNP - ဧပြီ ၂၈
ပဲခူးတိုင်းဒေသကြီး၊ ပဲခူးခရိုင်၊ ဝေါမြို့နယ်အတွင်း ကိုဗစ်-၁၉ရောဂါ ကာကွယ်ဆေး ရာနှုန်းပြည့် ထိုးနှံနိုင်ရေးအတွက် မြို့နယ်စီမံအုပ်ချုပ်ရေးအဖွဲ့၊ ကာကွယ်ဆေးထိုး အထောက်အကူပြုအဖွဲ့၊ ကျန်းမာရေးဝန်ထမ်းများ၊ လူမှုရေးအသင်းအဖွဲ့များနှင့် ပူးပေါင်းကာ ယနေ့နံနက်ပိုင်းက ကျေးရွာများမှ မြို့ပေါ်သို့ လာရောက်ကြသူများအား မြို့ဝင်၊ မြို့ထွက်ဂိတ်များတွင် ကိုဗစ်-၁၉ ရောဂါကာကွယ် ဆေးထိုးမှတ်တမ်း ကတ်ပြားများ စိစစ်၍ ဆေးထိုးရန် ကျန်ရှိနေသူများအား စစ်ဆေးရေးဂိတ်များတွင် ကာကွယ်ဆေး ထိုးနှံပေးကြောင်း သိရသည်။
ဝေါမြို့နယ်တွင် ကိုဗစ်-၁၉ရောဂါ ကာကွယ်ဆေး ရာနှုန်းပြည့်ထိုးနှံပြီးစီးရေးအတွက် ဆေးထိုး အဖွဲ့(၂၀)ဖြင့် ကျေးရွာများအရောက် တစ်အိမ်တက်ဆင်း သွားရောက်ကာ ဆေးထိုးမှတ်တမ်း ကတ်ပြားများစိစစ်ပြီး ဆေးထိုးရန် ကျန်ရှိနေသူများကို စည်းရုံးထိုးနှံပေးခြင်း၊ နေ့ခင်းဘက်တွင် လယ်ယာလုပ်ငန်း ခွင်ဝင်ရောက်နေသူများအတွက် ညနေ(၅)နာရီမှ ည(၈)နာရီထိ စောင့်၍ အိမ်တိုင်ရာရောက် သွားရောက် ထိုးနှံပေးခြင်းတို့ကို ဆောင်ရွက်လျက်ရှိပြီး၊ ဝေါမြို့မဈေး အတွင်း ဈေးရောင်း၊ ဈေးဝယ်များအား ကိုဗစ်-၁၉ ရောဂါ ကာကွယ်ဆေးထိုး မှတ်တမ်း ကတ်ပြားများ စိစစ်၍ ဆေးမထိုးရသေးသူများအား ကာကွယ် ဆေးထိုးနှံပေးခြင်း၊ အသက်(၁၅) နှစ်မှ (၁၈)နှစ်အထက် သာသနာ့ဝန်ထမ်း သံဃာတော်အရှင်သူမြတ်များ၊ သာသနာ့နွယ်ဝင် သီလရှင်များကိုလည်း ကျောင်းတိုက်များအရောက် ကိုဗစ်-၁၉ရောဂါ ကာကွယ်ဆေးများကို ထိုးနှံပေးလျက်ရှိကြောင်း သိရသည်။
သတင်း - စိုးမိုး
မြန်မာနေရှင်နယ်ပို့စ်
No comments:
Post a Comment