MNP - ဧပြီ ၆
၂၀၂၁-၂၀၂၂ ပညာသင်နှစ် တက္ကသိုလ်ဝင်စာမေးပွဲကို ဧပြီလ ၆ ရက်တွင် နိုင်ငံတဝှမ်း၌ ဘောဂဗေဒ ဘာသာရပ်နှင့် ဇီဝဗေဒဘာသာရပ်ကို ဆဌမနေ့အဖြစ် တစ်ပြိုင်နက်တည်း စတင်ဖြေဆိုလျက်ရှိရာ ပေါင်မြို့နယ်မှ စာစစ်ဌာန ၇ ခုသို့ လာရောက်ဖြေဆိုသူ ဘောဂဗေဒဘာသာရပ် (၉၃.၀၇) ရာခိုင်နှုန်းနှင့် ဇီဝဗေဒဘာသာရပ်(၉၇.၂၉)ရာခိုင်နှုန်း ရှိကြောင်း မြို့နယ်ပညာရေးမှူးရုံးစာရင်းအရ သိရသည်။
ပေါင်မြို့နယ်တွင် အ.ထ.ကပေါင်၊ အ.ထ.က-နတ်ကြီးချောင်၊ အ.ထ.ကအလှပ်၊ အ.ထ.ကမုတ္တမ၊ အ.ထ.ကဇင်းကျိုက်၊ အ.ထ.ကရင်းငြိမ်၊ အ.ထ.က သဲကုန်း စာစစ်ဌာန (၇)ခု၌ တက္ကသိုလ်ဝင်တန်းစာမေးပွဲ ဘောဂဗေဒဘာသာရပ်ဖြေဆိုခွင့်ရှိသူ (၇၀၇) ဦးရှိသည့်အနက် ကျောင်းသား၊ ကျောင်းသူ (၆၅၈) ဦး လာရောက်ဖြေဆိုခဲ့ကြောင်းနှင့် ဇီဝဗေဒဘာသာရပ် ဖြေဆိုခွင့်ရှိသူ(၂၅၈)ဦးရှိသည့်အနက် ကျောင်းသား၊ ကျောင်းသူ (၂၅၁) ဦး လာရောက်ဖြေဆိုကြောင်း သိရသည်။
အဆိုပါ စာစစ်ဌာနများတွင် ကျောင်းသား၊ ကျောင်းသူများ လုံခြုံအေးချမ်းစွာ ဖြေဆိုနိုင်ရေးအတွက် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးသိုက်ထွန်းနှင့် အဖွဲ့ဝင်များ၊ တပ်မတော်သားများ၊ ရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များ၊ ဌာနဆိုင်ရာဝန်ထမ်းများ၊ ကျောင်းအကျိုးတော်ဆောင် အဖွဲ့ဝင်များနှင့် လူမှုရေးအသင်းအဖွဲ့များမှ လိုအပ်သည်များကို ကူညီဆောင်ရွက်ပေးခဲ့ကြောင်းနှင့် စာမေးပွဲဖြေဆိုအပြီးတွင် အအေးဗူးများဝေပေးခဲ့ကြောင်း သိရသည်။
၂၀၂၁ -၂၀၂၂ ပညာသင်နှစ်တွင် ကိုဗစ် - ၁၉ ရောဂါကြောင့် ကျောင်းများကို စာသင်နှစ်အပြည့် ဖွင့်လှစ်နိုင်ခြင်းမရှိခဲ့သော်လည်း နိုင်ငံတဝှမ်းမှ တိုင်းနှင့်ပြည်နယ်အသီးသီး၊ နိုင်ငံခြားစာစစ်ဌာနအပါအဝင် စာစစ်ဌာန စုစုပေါင်း ၁၂၀၀ ကျော်မှာ ကျောင်းသားကျောင်းသူဦးရေ သုံးသိန်းကျော် တက္ကသိုလ်ဝင်တန်းဖြေဆိုခွင့် လျှောက်လွှာ တင်သွင်းထားကြောင်း ပညာရေးဝန်ကြီးဌာန၏ ထုတ်ပြန်ချက်အရ သိရသည်။
အဆိုပါစာစစ်ဌာနအသီးသီးတွင် တင်သွင်းထားသည့်စာရင်းများအရ ကျောင်းတွင်း ဖြေဆိုသူ နှစ်သိန်းကျော်နှင့် ပြင်ပမှ ဖြေဆိုသူ တစ်သိန်းကျော်ရှိပြီး ယခုနှစ် တက္ကသိုလ်ဝင်တန်းစာမေးပွဲကို မတ်လ ၃၁ ရက်နေ့မှ ဧပြီလ ၉ ရက်နေ့အထိပြုလုပ်သွားမည်ဖြစ်ကြောင်း ပညာရေးဝန်ကြီးဌာနမှ အသိပေး ထုတ်ပြန်ထားသည်။
သတင်း - တင်ဇာစိုး
မြန်မာနေရှင်နယ်ပို့စ်
No comments:
Post a Comment