MNP - ဧပြီ ၂၉
ရှမ်းပြည်နယ်(မြောက်ပိုင်း)၊ ကျောက်မဲခရိုင်၊ သီပေါမြို့နယ် နားမခေါ်ကျေးရွာနှင့် ပန်မိတ်ကျေးရွာတို့တွင် ယမန်နေ့ညနေ ၄ နာရီခွဲအချိန်ခန့်က မိုးသက်လေပြင်းများတိုက်ခတ်၍ အဆိုပါကျေးရွာများရှိ စာသင်ကျောင်းအဆောက်အဦနှင့် လူနေအိမ်အချို့၏ ခေါင်မိုးများအမိုးလန်၍ ပျက်စီးသွားခဲ့ကြောင်း သိရသည်။
အဆိုပါ မိုးသက်လေပြင်းတိုက်ခတ်မှုကြောင့် သီပေါမြို့နယ် နားမခေါ်ကျေးရွာအုပ်စု၊ နားမခေါ် ကျေးရွာရှိ အခြေခံပညာအလယ်တန်းကျောင်းခွဲ၏ ကျောင်းဆောင်နှင့်လူနေအိမ်(၂၈)အိမ် အမိုးလန် ပျက်စီးသွားခဲ့ကြောင်း၊ အလားတူ ပန်မိတ်ကျေးရွာအုပ်စု၊ ပန်မိတ်ကျေးရွာတွင်လူနေအိမ်(၅)အိမ်တို့ အမိုးလန်ပျက်စီးသွားခဲ့ကြောင်း၊ လူနှင့်တိရစ္ဆာန်များထိခိုက်ပျက်စီးမှုမရှိပါကြောင်းနှင့် ဆုံးရှုံးမှုတန်ဖိုးမှာ ကျပ်(၄၃.၄)သိန်းရှိကြောင်း၊ ပျက်စီးဆုံးရှုံးမှုများအတွက် ပြုပြင်ဆောင်ရွက်နိုင်ရေးအား သက်ဆိုင်ရာ ကျေးရွာအုပ်ချုပ်ရေးအဖွဲ့များမှ ပူးပေါင်းကူညီဆောင်ရွက်ပေးသွားမည်ဖြစ်ကြောင်း မြို့နယ်အထွေထွေ အုပ်ချုပ်ရေးဦးစီးဌာနမှ သိရသည်။
သတင်း - ခင်လေး
မြန်မာနေရှင်နယ်ပို့စ်
No comments:
Post a Comment