MNP - ဧပြီ ၂၅
ဧရာဝတီတိုင်းဒေသကြီး၊ မြောင်းမြခရိုင်၊ အိမ်မဲမြို့နယ်အတွင်း ကိုဗစ်-၁၉ ရောဂါ ကာကွယ်ဆေး ရာနှုန်းပြည့်လွှမ်းခြုံနိုင်ရေးအတွက် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့် အဖွဲ့ ဝင်များ၊ ဌာနဆိုင်ရာအကြီးအကဲများက ယမန်နေ့ နံနက်ပိုင်းတွင် ကျေးရွာများအရောက် ကွင်းဆင်းဟောပြောပြီး ကာကွယ်ဆေးများ ထိုးနှံပေးခဲ့ကြောင်း သိရသည်။
ယင်းလုပ်ငန်းများကို ကိုဗစ်-၁၉ ရောဂါ ထိန်းချုပ်ရေးနှင့်အရေးပေါ်တုံ့ပြန်ရေးကော်မတီဥက္ကဋ္ဌ၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ မြို့နယ်အုပ်ချုပ်ရေးမှူး ဦးခိုင်ထွန်းဇော် ဦးဆောင်၍ မြို့နယ် စီမံအုပ်ချုပ်ရေးအဖွဲ့ဝင်များ၊ ဌာနဆိုင်ရာအကြီးအကဲများမှ အဖွဲ့(၁၀)ဖွဲ့ခွဲ၍ (၁)ဖွဲ့လျှင် (၂)ရွာ နှုန်းဖြင့် ကိုဗစ်ကာကွယ်ဆေးထိုးကြရန် အသိပညာပေး ဟောပြောခဲ့ကြပြီး CoviShield ကာကွယ်ဆေး စုစုပေါင်း ဦးရေ (၅၀၀)ကျော်အား ထိုးနှံပေးနိုင်ခဲ့ကြောင်း သိရသည်။
အိမ်မဲမြို့နယ်တွင် ကျေးရွာအုပ်စု (၉၇)အုပ်စု၊ ရပ်ကွက် (၅)ရပ်ကွက်နှင့် ကျေးရွာပေါင်း (၅၀၅)ရွာမှ ကိုဗစ်-၁၉ ရောဂါ ကာကွယ်ဆေးထိုးနှံပြီးသူ (၁၄၃၄၀၆)ဦးနှင့် ရာခိုင်နှုန်းအားဖြင့် ၉၀.၀၃ ရာခိုင်နှုန်းရှိကြောင်း မြို့နယ်အထွေထွေအုပ်ချုပ်ရေးဦးစီးဌာနရုံးမှ သိရသည်။
သတင်း - ချစ်သက်လယ်
မြန်မာနေရှင်နယ်ပို့စ်
No comments:
Post a Comment