MNP ၊ ဧပြီ ၂၉
မွန်ပြည်နယ်၊ သထုံမြို့နယ်တွင် ကိုဗစ်-၁၉ ရောဂါကာကွယ်ဆေး နှစ်ကြိမ်ထိုးနှံထားပြီး ခြောက်လပြည့်ပြီးသည့် အသက် (၄၀)နှစ်အထက် ရှိသူများအား ထပ်ဆောင်းကာကွယ်ဆေး Booster Dose ထိုးနှံပေးခြင်းနှင့် အသက်(၁၅)မှ (၁၈)နှစ်ကြား လူငယ်များအား ကိုဗစ်-၁၉ ကာကွယ်ဆေး ထိုးနှံပေးခြင်းတို့ကို ယနေ့ နံနက်က ဆေးထိုးစုရပ်များ၌ ဆက်လက်ဆောင်ရွက်လျက်ရှိကြောင်း သိရသည်။
ထိုသို့ ထိုးနှံပေးရာတွင် သထုံမြို့နယ်အထွေထွေအုပ်ချုပ်ရေးဦးစီးဌာန၊ စုပေါင်းရုံးခန်းမနှင့် သုဝဏ္ဏဝတီမြို့ အထက(ကျိုက္ကော်) ရွှေရတုခန်းမစုရပ်တို့၌ ထိုးနှံပေးခဲ့ကြပြီး ကိုဗစ်-၁၉ ရောဂါကာကွယ်ဆေး ထပ်ဆောင်း Booster Dose အဖြစ် AstraZeneca ဆေး ထိုးနှံပေးခြင်း၊ အသက်(၁၅)မှ (၁၈)နှစ်ကြား လူငယ်များအား ပထမအကြိမ် ကာကွယ်ဆေးကို ကျန်းမာရေးဝန်ထမ်းများက ထိုးနှံပေးကြရာ မြို့နယ်စီမံအုပ်ချုပ်ရေး အဖွဲ့ဝင်များ မြို့နယ်ကိုဗစ်-၁၉ကာကွယ်ထိန်းချုပ်ရေးကော်မတီမှ တာဝန်ရှိသူများ စေတနာ့ဝန်ထမ်းများက လိုအပ်သည်တို့ကို ပူးပေါင်းဆောင်ရွက်ပေးခဲ့ကြသည်။
သထုံမြို့နယ်တွင် Booster Dose ထိုးနှံပေးခြင်းကို ဖေဖော်ဝါရီလ ၂ ရက်နေ့၌လည်းကောင်း အသက်(၁၅)မှ (၁၈)နှစ်ကြား လူငယ်များအား ပထမအကြိမ် ကာကွယ်ဆေးထိုးနှံခြင်းကို ဧပြီလ ၁၇ ရက်နေ့၌လည်းကောင်း စတင်ဆောင်ရွက်ခဲ့ပြီး အဆိုပါနေ့တွင် သထုံမြို့နယ်အတွင်းရှိ ပြည်သူ (၂၀၀)ဦးခန့်အား ထိုးနှံပေးခဲ့ကြောင်း မြို့နယ်ကိုဗစ်-၁၉ကာကွယ်ထိန်းချုပ်ရေးကော်မတီမှ သိရသည်။
သတင်း - ကိုကိုဦး
https://t.me/MyanmarNationalPost
No comments:
Post a Comment