MNP - ဧပြီ ၂၉
ဂန့်ဂေါခရိုင်၊ ပြန်ကြားရေးနှင့်ပြည်သူ့ဆက်ဆံရေး ဦးစီးဌာန (Community Centre) ခန်းမ၌ ဝန်ထမ်းများ စွမ်းဆောင်ရည် မြင့်မားစေရေးအတွက် နိုင်ငံ့ဝန်ထမ်း နည်းဥပဒေစာအုပ်ဖြင့် ဝန်ထမ်းများရုံးတွင်း စာဖတ်ဝိုင်း ဆွေးနွေးပွဲကို ယမန်နေ့ ၃ နာရီက ပြုလုပ်ခဲ့ကြောင်း သိရသည်။
ရှေးဦးစွာ ပြန်ကြားရေးနှင့်ပြည်သူ့ဆက်ဆံရေး ဦးစီးဌာန၊ ဂန့်ဂေါခရိုင်ရုံး လက်ထောက် ညွှန်ကြားရေးမှူး ဦးစိုးမြင့်က စာဖတ်ဝိုင်းပြုလုပ်ရခြင်း နှင့်စပ်လျဉ်း၍ ရှင်းလင်းပြောကြားပြီး ဦးစီးအရာရှိ(တာဝန်ပေး) ဒေါ်ယဉ်ယဉ်အေးက နိုင်ငံ့ဝန်ထမ်းနည်းဥပဒေစာအုပ် အခန်း(၈) ခွင့်ခံစားခြင်းခေါင်းစဉ်မှ ရှောင်တခင်ခွင့်၊ ကူးစက်ရောဂါကာကွယ်ခွင့်နှင့် လုပ်သက်ခွင့်စသည့် အကြောင်းအရာများအား လည်းကောင်း၊ ရုပ်သံကျွမ်းကျင်-၃ ဒေါ်သူဇာဝင်းက ဆေးလက်မှတ်ခွင့်၊ လစာမဲ့ခွင့်၊ မီးဖွားခွင့်၊ အထူးမသန်စွမ်းခွင့်စသည့် အချက်များအား လည်းကောင်း ရှင်းလင်းဆွေးနွေးခဲ့ကြသည်။
ထို့နောက် စာဖတ်ဝိုင်းသို့ တက်ရောက်လာသည့် ဝန်ထမ်းများက သိရှိလိုသည့် ကိစ္စများအား အပြန်အလှန် ဆွေးနွေးခဲ့ကြကာ ခရိုင်ပြန်/ဆက် လက်ထောက်ညွှန်ကြားရေးမှူး ဦးစိုးမြင့်က ခွင့်(၁၀)မျိုးကို ဆက်လက်၍ဖြည့်စွက် ဆွေးနွေးခဲ့သည်။
ပြန်ကြားရေးနှင့်ပြည်သူ့ဆက်ဆံရေး ဦးစီးဌာန၊ ဂန့်ဂေါခရိုင်ရုံးတွင် ဝန်ထမ်းများအား လုပ်ငန်းစွမ်းဆောင်ရည် တိုးတက်မြင့်မားလာစေရန် ရည်ရွယ်၍ ရုံးလုပ်ငန်း၊ ငွေစာရင်း၊ စာကြည့်တိုက်ပိုင်းဆိုင်ရာနှင့် သတင်းမီဒီယာဆိုင်ရာ အကြောင်းအရာများကို လစဉ်၊ အပတ်စဉ်တိုင်း စာဖတ်ဝိုင်းများ ကျင်းပဆောင်ရွက်လျက်ရှိကြောင်း သိရသည်။
သတင်း - ထင်အောင်နိုင်
မြန်မာနေရှင်နယ်ပို့စ်
No comments:
Post a Comment