MNP - မေ ၂၉
ရန်ကုန်တိုင်းဒေသကြီး ရန်ကုန်အရှေ့ပိုင်းခရိုင် တာမွေမြို့နယ် စည်ပင်သာယာရေးကော်မတီအနေဖြင့် မြို့နယ်အတွင်း ပတ်ဝန်းကျင်သန့်ရှင်းသာယာလှပစေရေး၊ လမ်းပန်းဆက်သွယ်မှု အဆင်ပြေချောမွေ့စေရေး၊ ရေစီးရေလာကောင်းမွန်စေရေးနှင့် မြို့နယ်အတွင်းရှိ ပြည်သူများ၏ လူနေမှုအဆင့်အတန်းများ တိုးတက်မြင့်မားလာစေရေးအတွက် စဉ်ဆက်မပြတ် ကြိုးပမ်းဆောင်ရွက်လျက်ရှိရာ ယနေ့နံနက်ပိုင်းအချိန်ကလည်း တာမွေမြို့နယ်အတွင်းရှိ ပြည်သူများသွားရေး၊ လာရေးတွင် အဆင်ပြေချောမွေ့စွာ သွားလာနိုင်စေရေးအတွက် မြို့နယ်စည်ပင်သာယာရေးကော်မတီ (လမ်းနှင့်တံတား)ဌာနမှ တာဝန်ရှိသူများက တာမွေမြို့နယ် မေတ္တာညွန့်ရပ်ကွက်ရှိ စက်မှု(၂)လမ်းတစ်လျှောက် ကွန်ကရစ်လမ်းခင်းခြင်းလုပ်ငန်း ဆောင်ရွက်ပေးလျက်ရှိကြောင်း သိရသည်။
တာမွေမြို့နယ် မေတ္တာညွန့်ရပ်ကွက်ရှိ စက်မှု(၂)လမ်းတစ်လျှောက် ကွန်ကရစ်လမ်းခင်းခြင်းလုပ်ငန်း ဆောင်ရွက်ပေးနေမှု အခြေအနေများအား မြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့် အဖွဲ့ဝင်များက ကွင်းဆင်းကြည့်ရှုစစ်ဆေးခဲ့ရာ မြို့နယ်စည်ပင်သာယာရေးကော်မတီ (လမ်းနှင့်တံတား)ဌာနမှ တာဝန်ရှိသူတစ်ဦးက ကွန်ကရစ် လမ်းခင်းခြင်းလုပ်ငန်း ဆောင်ရွက်ပေးနေမှုအခြေအနေများနှင့် ပတ်သက်၍ ရှင်းလင်းတင်ပြခဲ့ပြီး မြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့်အဖွဲ့ဝင်များက လိုအပ်သည်များကို လမ်းညွှန်မှာကြားခဲ့သည်။
အဆိုပါ တာမွေမြို့နယ် မေတ္တာညွန့်ရပ်ကွက်ရှိ စက်မှု(၂)လမ်းမှာ မေတ္တာညွန့်ရပ်ကွက်အတွင်းရှိ ရပ်ကွက်နေပြည်သူများ အဓိကအားကိုးအားထား အသုံးပြုကြရသည့် လမ်းတစ်လမ်းဖြစ်ပြီး ယခင်က ဒီလမ်းဟာ ပျက်စီးယိုယွင်းနေပြီး ချိုင့်ခွက်တွေဖြစ်နေတဲ့အတွက် ရပ်ကွက်နေပြသူများ၏ သွားရေးလာရေးတွင် အခက်အခဲများစွာဖြစ်ပေါ်ခဲ့ရာ ယခုအခါ မြို့နယ်စည်ပင်သာယာရေးကော်မတီ၏ ၂၀၂၂-၂၀၂၃ ဘဏ္ဍာရေးနှစ် ခွင့်ပြုရန်ပုံငွေဖြင့် အရှည်ပေ(၁၂၅၀)၊ အကျယ် (၁၈)ပေ၊ အမြင့်(၆)လက်မထုရှိသော ကွန်ကရစ်အမျိုးအစား လမ်းသစ်ကြီးကို ခင်းကျင်းပေးလျက်ရှိရာ အဆိုပါ လမ်းခင်းခြင်းလုပ်ငန်းပြီးစီးသွားပါက မြို့နယ်အတွင်းရှိ ပြည်သူများ အဆင်ပြေချောမွေ့စွာ သွားလာနိုင်တော့မှာဖြစ်သည့်အပြင် ရပ်ကွက်နေပြည်သူများ၏ လူနေမှုအဆင့်အတန်းများလည်း ဖွံ့ဖြိုးတိုးတက်လာ နိုင်တော့မည်ဖြစ်ကြောင်း သတင်းရရှိပါသည်။
မြန်မာနေရှင်နယ်ပို့စ်
No comments:
Post a Comment