၂၀၂၂-၂၀၂၃ပညာသင်နှစ် “ကျောင်းနေအရွယ်ကလေးအားလုံး ပညာသင်ယူခွင့်ရရှိဖို့ ကျောင်းအပ်နှံကြပါစို့” ဆိုင်းဘုတ်စိုက်ထူ

 

MNP - မေ   ၁၉

မကွေးတိုင်းဒေသကြီး၊ မကွေးခရိုင်၊ နတ်မောက်မြို့နယ်၌ ၂၀၂၂-၂၀၂၃ ပညာသင်နှစ် ကျောင်းနေအရွယ် ကလေးအားလုံး ပညာသင်ယူခွင့်ရရှိဖို့ ကျောင်းအပ်နှံကြပါစို့ ဆိုင်းဘုတ်ကို ယနေ့နံနက် (၈) နာရီအချိန်ခန့်က နတ်မောက်မြို့ ဗိုလ်ချုပ်အောင်ဆန်းအထိမ်းအမှတ် အခြေခံပညာအထက်တန်းကျောင်းရှေ့တွင် စိုက်ထူခဲ့ကြသည်။

အဆိုပါ ဆိုင်းဘုတ်စိုက်ထူရာတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ မြို့နယ်အုပ်ချုပ်ရေးမှူး ဦးသန့်စင်နှင့် အဖွဲ့ဝင်များ၊ မြို့နယ်ပညာရေးမှူးဦးကျော်စိုးဝင်း၊ မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဦးစီးအရာရှိနှင့် မြို့ပေါ်ရှိ အခြေခံပညာကျောင်းများမှ ဆရာ/မများ၊ ဌာနဆိုင်ရာအကြီးအကဲတို့က ၂၀၂၂-၂၀၂၃ ပညာသင်နှစ် ကျောင်းနေအရွယ် ကလေးအားလုံး ပညာသင်ယူခွင့်ရရှိဖို့ ကျောင်းအပ်နှံကြပါစို့ ဆိုင်းဘုတ်စိုက်ထူခဲ့ကြပြီး ၂၀၂၂ ခုနှစ် မေလ ၂၆ ရက်မှ ဇွန်လ (၁) ရက်နေ့အထိ ကျောင်းနေအရွယ်ကလေးများအား ကျောင်းအပ် လက်ခံသွားမည်ဖြစ်ကြောင်း သိရသည်။

ထိုသို့ ကျောင်းသား/သူများအား ကျောင်းအပ်လက်ခံရာတွင် အခကြေးငွေကို (လုံးဝ) ကောက်ခံမှု မရှိခြင်း၊ သူငယ်တန်း (KG) သင်ရိုးသစ်မှ Grade -5 သင်ရိုးသစ်အထိ ကျောင်းသား/သူများအား ကျောင်းသုံးဖတ်စာအုပ်များ၊ ဗလာစာအုပ်၊ ခဲတံနှင့်ကျောင်းဝတ်စုံ (၁) စုံစီ အခမဲ့ ပေးဝေသွားမည်ဖြစ်ပြီး၊ Grade-6 သင်ရိုးသစ်မှ Grade-11 သင်ရိုးသစ်အထိ ကျောင်းသား/သူ များအား ကျောင်းသုံး ဖတ်စာအုပ်များ၊ ဗလာစာအုပ်၊ ဘောပင်နှင့်ခဲတံ အစရှိသည့် ကျောင်းသုံးပစ္စည်းများ ထောက်ပံ့ပေးသွားမည်ဖြစ်ကြောင်း မြို့နယ်ပညာရေးမှူးရုံးမှ သိရသည်။

သတင်း - လှဝင်း

မြန်မာနေရှင်နယ်ပို့စ်