MNP - မေ ၁၇
ကယားပြည်နယ်၊ ဘောလခဲခရိုင်၊ ဖားဆောင်းမြို့နယ်တွင် ကလေးငယ်များ ကျန်းမာသန်စွမ်းစေရန်နှင့်ကူးစက်ရောဂါတို့မှ ကင်းဝေးစေရန်အတွက် ကိုယ်ဝန်ဆောင်မိခင်များနှင့်အသက်(၁)နှစ်အောက် ကလေးငယ်များအား ပုံမှန်ကာကွယ်ဆေးထိုးနှံ၊ တိုက်ကျွေးခြင်းကို ယနေ့နံနက်(၈)နာရီ အချိန်ကမြို့နယ်ပြည်သူ့ဆေးရုံတွင် ဆောင်ရွက်ခဲ့ကြောင်း သိရသည်။
အဆိုပါပုံမှန်ကာကွယ်ဆေးထိုးနှံ၊ တိုက်ကျွေးပေးခြင်းကို မြို့နယ်ကျန်းမာရေးဦးစီးဌာန၊ မြို့နယ်သူနာပြု(၁)ဒေါ်သက်သက်ထွေးနှင့် ကျန်းမာရေးဝန်ထမ်းများမှ မြို့ပေါ်ရပ်ကွက်နှင့်ကျေးရွာများရှိ ကိုယ်ဝန်ဆောင်မိခင်များအား မေးခိုင်ကာကွယ်ဆေးထိုးနှံပေးခြင်း၊ သံဓါတ်အားဆေးများပေးခြင်း၊ သွေးအားနည်းခြင်းရှိ/ မရှိစစ်ဆေးပေးခြင်း၊ ဆစ်ဖလစ်ရောဂါအတွက်သွေးစစ်ပေးခြင်း၊ တီဘီရောဂါလက္ခဏာရှိ/မရှိမေးမြန်းခြင်း၊ သွေးပေါင်ချိန်ချိန်ပေးခြင်း၊ ကိုယ်အလေးချိန်ချိန်ပေးခြင်း၊ ကိုယ်ဝန်စမ်းသပ်ပေးခြင်း၊ ဗီတာမင်ဘီဝမ်းဆေးပြားများပေးခြင်း၊ မွေးဖွားခါနီးလက္ခဏာများအားအသိပေးခြင်း၊ မွေးဖွားမည့်ခန့်မှန်းရက်ထက် တစ်ပတ်ကျော်ပါက ကျန်းမာရေးဌာနသို့ လာရောက်ပြသရန်အကြံပြုခြင်းများကို ဆောင်ရွက်ပေးခဲ့သည်။
အလားတူအသက်(၁)နှစ်အောက်ကလေးငယ်များအား အသည်းရောင်အသားဝါ(ဘီ)၊ ဘီစီဂျီ၊ ဆုံဆို့၊ ကြက်ညှာ၊ မေးခိုင်၊ ဦးနှောက်အမြှေးရောင်၊ ပြင်းထန်အဆုတ်ရောင်(ပီစီဗီ)၊ ပိုလီယို၊ ဂျပန်ဦးနှောက်ရောင်၊ ဝက်သက်ဂျိုက်သိုးစသည့် ကာကွယ်ဆေးများအား ထိုးနှံတိုက်ကျွေးခဲ့ကြကြောင်းနှင့် အဆိုပါပုံမှန်ကာကွယ်ဆေးများကို သတ်မှတ်ထားသောအကြိမ်၊ သတ်မှတ်ထားသောအသက်အရွယ်တွင် ဆေးထိုးဆေးတိုက်ပေးခြင်းများပြုလုပ်ပေးနိုင်မှသာလျှင် အထက်ပါရောဂါပိုးများမှ ကာကွယ်ပေးနိုင်မည်ဖြစ်ကြောင်းသိရသည်။
သတင်း - နန်းသဲနုအောင်
မြန်မာနေရှင်နယ်ပို့စ်
No comments:
Post a Comment