MNP - မေ ၃၁
ရခိုင်ပြည်နယ်၊ စစ်တွေမြို့၊ ရွှေစေတီကျောင်းတိုက်ဦးစီးပဓာနနာယက အိန္ဒိယနိုင်ငံမှ ဂုဏ်ထူးဆောင်(Ph.D)ဒေါက်တာဘွဲ့၊ နိုင်ငံတော်အစိုးရမှ မဟာသဒ္ဒမ္မဇောတိကဓဇ၊ သဒ္ဒမ္မဇောတိကဓဇ၊ မင်္ဂလဓမ္မဇောတိကဓဇ(Y.M.B.A)ဘွဲ့တံဆိပ်တော်ရ ဒေါက်တာအရိယဝံသအား ဂုဏဝသိဋ္ဌပူဇာပွဲတော်ကို ယနေ့ နံနက်ပိုင်းက စစ်တွေမြို့လောကာနန္ဒာစေတီတော်ဝန်းအတွင်းရှိ သာသနာ့ဗိမ္မာန်တော်၌ ကျင်းပသည်။
ရှေးဦးစွာ အပူဇော်ခံဆရာတော်အား ရန်ကုန်တိုင်းဒေသကြီး၊ ပုစွန်တောင်မြို့နယ်၊ မဟာညောင်ကုန်းတိုက်၊ ကေလာရုံကျောင်းမှ သာသနဓဇဓမ္မာစရိယ၊ ဝိနယဝိဒူ အရှင်ခေမိန္ဒက ဂုဏဝသိဋ္ဌပူဇာ မင်္ဂလာနိမန္တနဂါထာဖြင့် ပင့်လျောက်ပြီး အိန္ဒိယနိုင်ငံ နာလန္ဒတက္ကသိုလ်မှ ဓမ္မာစရိယ၊ MA, BA အရှင်ပညာသာမိက ဂုဏဝသိဋ္ဌပူဇာဝိဝဋဂါထာဖြင့် အခမ်းအနား စတင်ဖွင့်လှစ်ကြောင်းရွတ် ဖတ်ချီးမြှင့်ပေးသည်။ ထို့နောက် ပြည်နယ်ဩဝါဒါစရိယ၊ မင်းပြားမြို့၊ တက္ကသီလမြို့မမြောက်ကျောင်း ဆရာတော် အဘိဓဇအဂ္ဂမဟာသဒ္ဓမ္မဇောတိကဓဇ၊ ဘဒ္ဒန္တဃောသိတာရမ္ဘဆရာတော်ကြီးထံမှ ဧည့်ပရိတ်သတ်များက ငါးပါးသီလ ခံယူဆောက်တည်ကြပြီး ကြွရောက်တော်မူကြသော ဆရာတော်အရှင်သူမြတ်များက မေတ္တာသုတ် ပရိတ်တရာတော်ရွတ်ပွားချီးမြှင့်ပေးကြသည်။ ဆက်လက်၍ ပြည်နယ်လူမှုရေးရာဝန်ကြီးက ဂုဏ်ယူဝမ်းမြောက် ဗဟုဇနဟိတာဝဟဂုဏ်စသည်တို့ကို လျောက်ထားပြီး ရန်ကုန်တိုင်းဒေသကြီး အောင်မြေဗောဓိဓမ္မရိပ်သာ၊ အလိုတော်ပြည့်ကျောင်းတိုက်မှ သာသနဓဇဓမ္မာစရိယ၊ အရှင်သီဟသေနက ဒေါက်တာဘဒ္ဒန္တအရိယဝံသ၏ ထေရုပ္ပတ္တိအကျဉ်းကို ရွတ်ဖတ်ပူဇော်သည်။ ထို့နောက် အိန္ဒိယနိုင်ငံမှ ဆက်ကပ်သော ဂုဏ်ထူးဆောင်(Ph.D)ဒေါက်တာဘွဲ့လက်မှတ်၊ (Ph.D)ဒေါက်တာ ဆုတံဆိပ်၊ ထပ်ဆင့် ဂုဏဝသိဋ္ဌပူဇာလက်မှတ်နှင့် လှူဖွယ်ဝတ္ထုပစ္စည်းများကို ပြည်နယ်ဝန်ကြီးချုပ် ဒေါက်တာ အောင်ကျော်မင်း၊ တိုင်းမှူးဗိုလ်ချုပ် ထင်လတ်ဦးနှင့် တာဝန်ရှိသူများက ဆက်ကပ်လှူဒါန်းကြသည်။ ယင်းနောက် တပည့်ဒါယိကာ၊ ဒါယိကာမများက ဂါထာ၊ ရတု၊ ဓမ္မတေးများဖြင့် ရွတ်ဖတ်ပူဇော်သီဆိုကြသည်။ ဆက်လက်၍ ဂုဏဝသိဋ္ဌပူဇာပွဲတော်အတွက် ရခိုင်ပြည်နယ်အစိုးရအဖွဲ့၊ အနောက်ပိုင်းတိုင်းစစ်ဌာနချုပ်နှင့် အလှူရှင်များမှ လှူဒါန်းငွေများအား တိုင်းမှူး၊ ပြည်နယ်ဝန်ကြီးများနှင့် အလှူရှင်များက ဆက်ကပ်လှူဒါန်းကြပြီး အပူဇော်ခံ ဆရာတော် ဒေါက်တာဘဒ္ဒန္တအရိယဝံသ ရွှေစေတီဆရာတော်က သမ္မောဒနီယဩဝါဒကထာ ချီးမြှင့်ပေးသည်။ ထို့နောက် ပြည်နယ်ဩဝါဒါစရိယ၊ စစ်တွေမြို့၊ ဓမ္မသုခကျောင်းတိုက်ဆရာတော် အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ ဘဒ္ဒန္တသောမ မထေရ်မြတ်ထံမှ အနုမောဒနာတရား နာကြားကြပြီး လှူဒါန်းမှုအစုစုအတွက် ရေစက်သွန်းချအမျှပေးဝေခဲ့ကြသည်။
အခမ်းအနားအပြီးတွင် တိုင်းမှူး၊ ပြည်နယ်ဝန်ကြီးများနှင့် အလှူရှင်များက ကြွရောက်တော်မူကြသော ဆရာတော်အရှင်သူမြတ်များအား နေ့ဆွမ်းဆက်ကပ်လှူဒါန်းခဲ့ကြကြောင်းသိရသည်။
သတင်း - တင်ထွန်း
မြန်မာနေရှင်နယ်ပို့စ်
No comments:
Post a Comment