MNP - ဇွန် ၄
မကွေးတိုင်းဒေသကြီး၊ သရက်ခရိုင် ကံမမြို့နယ်တွင် ၂၀၂၂-၂၀၂၃ ပညာသင်နှစ် အသစ်ခန့်ထားမည့် လက်ထောက်မူလတန်းပြ ဆရာ၊ ဆရာမများ ရက်တိုမွန်းမံသင်တန်း ဖွင့်ပွဲအခမ်းအနားကို အ.ထ.က(ကံမ) မြဝတီခန်းမ၌ ယနေ့ နံနက် ၉ နာရီက ကျင်းပပြုလုပ်ရာ မြို့နယ်စီမံအုပ်ချုပ်ရေးအဖွဲ့ဥက္ကဌနှင့်အဖွဲ့ဝင်များ မြို့နယ်ပညာရေးမှူးနှင့် သင်တန်းနည်းပြများ၊ သင်တန်းသား ဆရာ ဆရာများ တက်ရောက်ခဲ့ကြသည်။
အခမ်းအနားတွင် မြို့နယ်စီမံအုပ်ချုပ်ရေးအဖွဲ့ဥက္ကဌ ဦးအောင်ကိုထွန်းက အဖွင့်အမှာစကားပြောကြားပြီးနောက် မြို့နယ်ပညာရေးမှူး ဦးရဲလွင်အောင်နှင့် သင်တန်းကြီးကြပ် နည်းပြများက သင်တန်းနှင့် ပတ်သက်သည့် ရည်ရွယ်ချက် လုပ်ငန်းဆောင်တာများ၊ လိုက်နာဆောင်ရွက်ရမည့် စည်းကမ်းချက်များနှင့် ပတ်သက်၍ ရှင်းလင်းမှာကြား ပြောကြားခဲ့ကြသည်။
အဆိုပါသင်တန်းအား ဆရာ၊ ဆရာမများအနေဖြင့် ပညာရေးစနစ် အရည်အသွေးမြှင့်တင်နေသည့်အချိန်၌ မှန်ကန်သောတန်ဖိုးထားမှု ၊ ကျွမ်းကျင်မှု၊ ထိရောက်သော လက်တွေ့ ဆောင်ရွက်မှုနှင့် သင်ကြားရေးအပိုင်း၌ အထောက်အကူဖြစ်စေရန် ရည်ရွယ်၍ ဖွင့်လှစ်ပေးခဲ့ခြင်းဖြစ်ကြောင်း သင်တန်းကို နည်းပြဆရာ၊ ဆရာမ (၁၁) ဦးတို့မှ သင်တန်းသား ဆရာ၊ ဆရာမ (၆၁) ဦးတို့အား သင်ကြားပို့ချသွားမည်ဖြစ်ပြီး သင်တန်းကာလမှာ ( ၆ )ရက် ကြာမြင့်မည်ဖြစ်ကြောင်း မြို့နယ်ပညာရေးမှူးရုံးမှ သိရသည်။
သတင်း - ကျော်ဇေယျဝင်း
မြန်မာနေရှင်နယ်ပို့စ်
No comments:
Post a Comment