MNP - ဇွန် ၂၅
ပဲခူးတိုင်းဒေသကြီး ပြည်မြို့ နယ်စီမံအုပ်ချုပ်ရေးအဖွဲ့၏ကြီးကြပ်မှုဖြင့် မြို့နယ်မွေးမြူရေးနှင့်ကုသရေးဦးစီးဌာနမှ ပြည်မြို့နယ် သဲကြဲကြီးကျေးရွာ တောင်သူဦးကြည်စိုး၏ စိုက်ပျိုးမြေ(၁ဒသမ၅)ဧက၌ ယနေ့နံနက်ပိုင်းက မိုးရာသီ တိရစ္ဆာန်အစာပင် နေဗီယာမြက်သရုပ်ပြစိုက်ပျိုးပွဲကျင်းပခဲ့သည်။
ယင်းတိရစ္ဆာန်အစာပင် နေဗီယာမြက်များစိုက်ပျိုးရာတွင် ကျေးရွာပြည်သူများနှင့်အတူ မြို့နယ်မွေးမြူရေးနှင့်ကုသရေးဦးစီးဌာနနှင့် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ဝန်ထမ်းများ စုပေါင်းစိုက်ပျိုးခဲ့ကြပြီး မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးနိုင်လင်းဦးနှင့်တာဝန်ရှိသူများ ကွင်းဆင်းကြည့်ရှုအားပေးသည်။
အဆိုပါတိရစ္ဆာန်အစာပင် နေဗီယာမြက်သည် ကျွဲ/နွားများ အစာတင်မကဘဲ သိုး၊ ဆိတ်နှင့် ကြက်၊ ဘဲ၊ ဝက်တို့ကိုပါ ကျွေးနိုင်သောမြက်အမျိုးအစားဖြစ်ပြီး အာဟာရတန်ဖိုးမြင့်မားကာ အသားဓာတ် ၁၂မှ ၁၇အထိပါဝင်ကြောင်း၊ နေဗီယာမြက်၏ အားသာချက်တစ်ခုမှာ စိုက်ပျိုးရလွယ်ကူသော ပင်မြင့်မျိုးဖြစ်ကာ ရာသီဥတုဒဏ်ကိုခံနိုင်ကြောင်း၊ တစ်ဧကထွက်နှုန်း တစ်နှစ် တန် ၁၀၀ မှ ၁၂၀အထိထွက်ရှိပြီး တစ်ကြိမ်စိုက်ပျိုးပြီးလျင် မြေဩဇာပြုပြင်ပေးပြီး ငါးနှစ်/ခြောက်နှစ်ခန့် တောက်လျှောက်ရိတ်ကျွေးနိုင်ကြောင်း၊ ယခင်က အာဟာရတန်ဖိုးနည်းပါးသည့် ကောက်ရိုး၊ မြက်ခြောက်များအစား အာဟာရနှင့်အသားဓာတ်ပါဝင်မှုမြင့်မားသော နေဗီယာမြက်များစိုက်ပျိုးကျွေးမွေးပါက တောင်သူများ၏ တိရစ္ဆာန်မွေးမြူရေးလုပ်ငန်းများ ဖွံဖြိုးတိုးတက်လာမည်ဖြစ်ကြောင်း မြို့နယ် မွေးမြူရေးနှင့်ကုသရေးဦးစီးဌာနမှူးထံက သိရသည်။
သတင်း - ကိုဆက်
မြန်မာနေရှင်နယ်ပို့စ်
No comments:
Post a Comment