MNP - ဇွန် ၁၂
စစ်ကိုင်းတိုင်းဒေသကြီး၊ ကလေးခရိုင်၊ ကလေးမြို့၊ စကားလှဘုန်းတော်ကြီးကျောင်း မြို့မဓမ္မဗိမာန်တော်ကြီးတွင် သာသနာရေးနှင့်ယဉ်ကျေးမှုဝန်ကြီးဌာန၊ သာသနာရေးရာဦးစီးဌာနမှ ကြီးမှူးကျင်းပသည့် နိကာလ်စာမေးပွဲ(ဝိဒူတန်း)ကို မွန်းလွဲ ၁ နာရီမှ ညနေ ၄ နာရီအထိ သံဃာတော်များနှင့်သီလရှင်များ နောက်ဆုံးနေ့ ဖြေဆိုပြီးစီးခဲ့ပြီဖြစ်ကြောင်း သာသနာရေးဦးစီးဌာနမှ သိရသည်။
ယနေ့ကျင်းပသည့် နိကာလ်စာမေးပွဲ(ဝိဒူတန်း)၏ ပရိဝါပါဠိဘာသာရပ်နှင့် ပါထိကဝဂ္ဂပါဠိဘာသာရပ်တို့ကို ရဟန်းသံဃာတော် ၃၄ ပါး၊ သီလရှင် ၁၄ ပါး စာရင်းပေးသွင်းထားပြီး ရဟန်းသံဃာတော် ၃၂ ပါး၊ သီလရှင် ၁၁ ပါး စုစုပေါင်း ၄၃ ပါး လာရောက်ဖြေဆိုခဲ့ကြပြီး စာမေးပွဲများကို ဇွန်လ ၇ ရက်နေ့မှ ယမန်နေ့ နောက်ဆုံးဘာသာရပ်အထိ ၅ ရက်တိုင်တိုင်ကျင်းပခဲ့ကြောင်း သာသနာရေးဦးစီးဌာနမှ သိရသည်။
အဆိုပါစာမေးပွဲသို့ ဝင်ရောက်ဖြေဆိုတော်မူကြသည့် ရဟန်းသံဃာတော်များနှင့်သီလရှင်များ အေးချမ်းစွာ ဖြေဆိုနိုင်ရေးအတွက် မြို့နယ်သံဃာ့နာယကအဖွဲ့မှ ဆရာတော်များနှင့် တာဝန်ရှိလူပုဂ္ဂိုလ်များမှ အနီးကပ်ကြီးကြပ်၍ အလှူရှင်များမှ ဆွမ်းဘောဇဉ်များ ဆပ်ကပ်လှူဒါန်းခြင်း၊ ကျန်းမာရေးနှင့် လိုအပ်သည့်စောင့်ရှောက်မှုများကို လှူဒါန်းဆောင်ရွက် ပေးလျက်ရှိကြောင်း သိရှိရသည်။
မြန်မာနေရှင်နယ်ပို့စ်
No comments:
Post a Comment