MNP - ဩဂုတ် ၁၀
၂၀၂၂ ခုနှစ်၊ သြဂုတ်လ(ပထမ)ပါတ်အတွင်း တနင်္သာရီမြို့နယ်တွင် မိုးရွာသွန်းမှုများပြားခဲ့ သဖြင့် ပဝကျေးရွာအုပ်စုအတွင်းသို့ စီးဆင်းနေသည့် ပဝချောင်း၌ ရေလျှံတက်လာသဖြင့် ယမန်နေ့နံနက် ၉ နာရီအချိန်အထိ ပဝအုပ်စုအတွင်းရှိ သာယာကုန်းတောင်ကျေးရွာ၊ အင်းဝိုင်းကျေးရွာ၊ ဖိုးမဲကျေးရွာနှင့် ပဝထိန်ကျေးရွာများရှိ ကျေးရွာတွင်းလမ်းအချို့နှင့် မြေအနိမ့်ပိုင်းရှိနေအိမ်ခြံဝန်းများအတွင်း ရေဝင်လျက်ရှိကြောင်း ဒေသခံများထံမှ သိရသည်။
သို့ပါ၍ ကျောင်းသား/သူများ အန္တရာယ် မဖြစ်ပွားစေရေးအတွက် အလက(ခွဲ)-သာယာကုန်း (တောင်)၊ အမက(ဖိုးမဲ)ရွာ၊ အမက-အင်း ဝိုင်းကုန်းနှင့်အမက-ပဝထိန်ရွာ စသည့် (၄) ကျောင်းမှ သက်ဆိုင်ရာကျောင်းအုပ်ဆရာ/မကြီးများက မြို့နယ်ပညာရေးမှူးထံသတင်းပို့၍ ယာယီကျောင်းပိတ်ထားခဲ့ကြောင်း၊ ကျောင်းပိတ်ရသည့်ရက်များကို အဖိတ်/ဥပုဒ်ကျောင်း ပိတ်ရက်များမှာ အစားထိုးပြန်လည်သင်ကြားရန် စီစဉ်ထားရှိကြောင်း သိရသည်။
ယနေ့ ယာယီပိတ်လိုက်ရသည့် အလက(ခွဲ)-သာယာကုန်း(တောင်)ကျောင်းတွင် ကျောင်းသူ/သားပေါင်း(၃၅၃)ဦးရှိ၍၊ အမက(ဖိုးမဲ)ရွာ တွင်(၉၀)ဦး၊ အမက-အင်းဝိုင်းကုန်း၌(၁၈၁)ဦး၊ အမက-ပဝထိန်ကျောင်း၌(၁၅၇)ဦးရှိကြောင်း မြို့နယ်ပညာရေးမှူးရုံးမှ သိရသည်။
သတင်း - ထိန်ဝင်း
မြန်မာနေရှင်နယ်ပို့စ်
No comments:
Post a Comment