နိုင်ငံတစ်နိုင်ငံဟာ ကောင်းမွန်တဲ့အခြေခံအအောက်အဦတွေနဲ့ အရည်အချင်းပြည့်ဝတဲ့ လူသားအရင်းအမြစ်တွေ မရှိမဖြစ်လိုအပ်ပါတယ်။ ဒါ့ကြောင့် ကမ္ဘာပေါ်မှာရှိတဲ့ နိုင်ငံအများစုဟာ လိုအပ်တဲ့အခြေခံအဆောက်အဦတွေကို တတ်နိုင်သမျှ ပြည့်စုံအောင်တည်ဆောက်ကြပြီး လူသားအရင်းအမြစ်တွေကိုလည်း စဉ်ဆက်မပြတ် မွေးထုတ်ပေးလျက် ရှိပါတယ်။ နိုင်ငံကို ပြန်လည်ထူထောင်တည်ဆောက်ကြရာမှာ တတ်နိုင်တဲ့နိုင်ငံတွေကရှိတဲ့ ပြည်တွင်းအင်အားနဲ့ နိုင်ငံကိုတည်ဆောက်ကြပြီး မတတ်နိုင်တဲ့နိုင်ငံတွေက ပြည်ပမိတ်ဆွေအကူအညီတွေ ရယူတည်ဆောက်ကြပါတယ်။
ရှည်လျားတဲ့ဆက်ဆံရေး
လက်ရှိကာလမှာ မြန်မာနိုင်ငံနဲ့ ရုရှားနိုင်ငံတို့ရဲ့ နှစ်နိုင်ငံဆက်ဆံရေးဟာ အထူးပြောစရာမလိုဘဲ ပကတိအခြေအနေမှန်ကို အားလုံးအကဲခတ်နိုင်ကြမှာ ဖြစ်ပါတယ်။ နှစ်နိုင်ငံဆက်ဆံရေးဟာ အထူး ကောင်းမွန်နေတဲ့အနေအထားဖြစ်ပါတယ်။ လိုအပ်နေချိန်မှာ အကူအညီပေးတဲ့ မိတ်ဆွေစစ်၊ မိတ်ဆွေကောင်းပီသလို့ မိတ်ဆွေညီအစ်ကို ဆက်ဆံရေးလို့ ပြောရမှာဖြစ်ပါတယ်။ မြန်မာနိုင်ငံအပေါ် မလိုတဲ့သူတွေ၊ အမျိုးသားသစ္စာဖောက်တွေနဲ့ ပြည်ပလက်ဝေ ခံတွေကတော့ မနာလိုမရှုဆိတ် ဖြစ်ကြပြီး အပျက်သဘောနဲ့ ပြောဆိုနေကြတာတွေကို ကြားသိကြရမှာ ဖြစ်ပါတယ်။ ဘယ်လိုပဲဖြစ်ဖြစ် မြန်မာနဲ့ ရုရှားဆက်ဆံရေးဟာ ယခုမှစတင်ခဲ့တာ မဟုတ်ဘဲ ကောင်းမွန်ပြီး ရှည်လျားတဲ့ ဆက်ဆံရေးသမိုင်း ကြောင်းရှိခဲ့တာကို လေ့လာကြည့်ရင် သိနိုင်ပါတယ်။
မြန်မာနိုင်ငံဟာ ၁၉၄၈ ခုနှစ် ဇန်နဝါရီလ ၄ ရက်နေ့ လွတ်လပ်ရေးရရှိပြီး တစ်လကျော်ကြာတဲ့ ဖေဖော်ဝါရီလ ၁၈ ရက်နေ့မှာ ယခု ရုရှားဖက်ဒရေးရှင်းနိုင်ငံ (ယခင် ဆိုဗီယက်ပြည်ထောင်စု)နဲ့ နှစ်နိုင်ငံသံတမန်ဆက်ဆံရေးကို စတင်ထူထောင်ခဲ့ပါတယ်။ မြန်မာနိုင်ငံ လွတ်လပ်ရေးရတော့ စစ်ဘေးစစ်ဒဏ်ကြောင့် ပျက်စီးခဲ့တဲ့အခြေအနေတွေနဲ့ လွတ်လပ်ရေးနဲ့အတူ ပေါ်ပေါက်လာတဲ့ ပြည်တွင်းလက်နက်ကိုင် သောင်းကျန်းမှုတွေကြောင့် ပျက်စီးနေတဲ့ တိုင်းပြည်ကို ပြန်လည် ထူထောင်ဖို့ ကြိုးပမ်းအားထုတ်ရာမှာ ဓနအင်အားနဲ့ လူသားအရင်းအမြစ် အလုံအလောက်မရှိလို့ မိတ်ဆွေနိုင်ငံတွေရဲ့ အကူအညီတွေနဲ့ ပြန်လည်ထူထောင်ရေးတွေ၊ တည်ဆောက်ရေးတွေကို ပြုလုပ်ခဲ့ရပါတယ်။
နှစ်နိုင်ငံပူးပေါင်းဆောင်ရွက်
မြန်မာနိုင်ငံ လွတ်လပ်ရေးရပြီး နိုင်ငံကို ပြန်လည်တည်ဆောက်နေတဲ့ကာလ ၁၉၅၅ ခုနှစ် အောက်တိုဘာလမှာ မြန်မာနိုင်ငံဝန်ကြီးချုပ် ဦးနုဟာ ဆိုဗီယက်ပြည်ထောင်စုကို ချစ်ကြည်ရေးခရီး ပထမဆုံးသွားရောက်ခဲ့ပါတယ်။ အပြန်အလှန်အားဖြင့် ဆိုဗီယက်ပြည်ထောင်စုရဲ့ ခေါင်းဆောင်နှစ်ဦး ဖြစ်တဲ့ နီကီတာ ခရူးရှက်နဲ့ နီကိုလိုင်း ဘူဂါနင်တို့ဟာ မြန်မာနိုင်ငံကို ချစ်ကြည်ရေးခရီး လာရောက် လည်ပတ်ခဲ့ပါတယ်။ ၁၉၆၀ ပြည့်နှစ်မှာ နီကီတာ ခရူးရှက် ခေါင်းဆောင်တဲ့အဖွဲ့ဟာ မြန်မာနိုင်ငံကို ချစ်ကြည်ရေးခရီး ဒုတိယအကြိမ် လာရောက်လည်ပတ်ခဲ့ပါတယ်။ ဆိုဗီယက်ပြည်ထောင်စု ခေါင်းဆောင် ခရူးရှက်ရဲ့ ဒုတိယအကြိမ် မြန်မာနိုင်ငံ ခရီးစဉ်မတိုင်မီမှာ နှစ်နိုင်ငံအကြား သဘောတူညီ ချက်တစ်ခုကိုရရှိခဲ့ပြီး နှစ်နိုင်ငံအကျိုးရှိတဲ့ ပူးပေါင်းဆောင်ရွက်မှုတွေ ဖြစ်ထွန်းစေခဲ့ပါတယ်။
အမှန်တကယ်တော့ မြန်မာနိုင်ငံနဲ့ ရုရှားနိုင်ငံ ဆက်ဆံရေးဟာ ရှေးမြန်မာဘုရင်တွေ လက်ထက် ကတည်းက အစပျိုးလာခဲ့ပါတယ်။ သမိုင်းသက်သေ အထောက်အထားတွေအရဆိုရင် ၁၈၇၃ ခုနှစ် ကတည်းက မြန်မာခေါင်းဆောင်တွေဟာ ရုရှား (ယခင်ဆိုဗီယက်ပြည်ထောင်စု) အင်ပါယာနဲ့ ဆက်သွယ်ဖို့ ပထမဦးဆုံးခြေလှမ်း အစပြုခဲ့တယ်။ အဲဒီအချိန်တုန်းက ရုရှားလူမျိုး ခရီးသွားတစ်ဦးက တစ်ဆင့် သံတမန်ဆက်ဆံရေးထူထောင်ဖို့ ဆန္ဒရှိတယ်ဆိုတဲ့ စာချွန်လွှာတစ်စောင်ကို စိန့်ပီတာ စဘတ်မြို့ကို ပေးပို့ခဲ့တယ်လို့ မြန်မာနိုင်ငံဆိုင်ရာ ရုရှားသံရုံးက ထုတ်ဝေခဲ့တဲ့ နှစ် (၇၀) ပြည့် ရုရှား- မြန်မာ သံတမန်ဆက်ဆံရေးအကြောင်း ရေးသား ထားတဲ့စာအုပ်မှာ ဖော်ပြထားပါတယ်။ မြန်မာနိုင်ငံ ဗြိတိသျှကိုလိုနီလက်အောက် ကျရောက်သွားတဲ့အချိန်မှာ မြန်မာနဲ့ရုရှား အဆက်အသွယ်ပြတ်သွား ပါတယ်။
အခြေခံအဆောက်အဦတွေ
မြန်မာနိုင်ငံ လွတ်လပ်ရေးရပြီးတဲ့အချိန်မှာ မြန်မာ - ရုရှား သံတမန်ဆက်သွယ်ရေးကို စတင် တည်ဆောက်ခဲ့ပါတယ်။ အဲဒီအချိန်ကာလဟာ မြန်မာ နိုင်ငံဟာ ဒုတိယကမ္ဘာစစ်ကြောင့် ပျက်စီးခဲ့တဲ့ တိုင်းပြည်ကို ပြန်လည်ထူထောင်နိုင်အောင် ပြုလုပ်နေရပြီး ပြည်တွင်းလက်နက်ကိုင်သောင်းကျန်းမှု တွေကိုလည်း ရှင်းလင်းနေရတဲ့အချိန် ဖြစ်ပါတယ်။ ယိုယွင်းခဲ့တဲ့တိုင်းပြည်ကို ပြန်လည်ထူထောင်ရာမှာ တိုင်းပြည်ဓနအင်အား ရှားပါးနေတဲ့အချိန်ဖြစ်လို့ နိုင်ငံတည်ဆောက်ရေးအတွက် အခြေခံအဆောက်အဦတွေနဲ့ လူသားအရင်းအမြစ်တွေ လိုအပ်နေချိန် ဖြစ်ပါတယ်။ ဒီအချိန်မှာ မြန်မာနိုင်ငံက ရုရှားနိုင်ငံကို ဆန်တင်ပို့ပေးခဲ့ပြီး ရုရှားနိုင်ငံက မြန်မာနိုင်ငံမှာ လိုအပ်နေတဲ့ အခြေခံအဆောက်အဦတွေကို တည်ဆောက်ပေးခဲ့ပါတယ်။ ထင်ရှားတဲ့ နမူနာ အနေနဲ့ကြည့်မယ်ဆိုရင် ၁၉၅၇ ခုနှစ် ဇန်နဝါရီလမှာ ရုရှား (ယခင်ဆိုဗီယက်) နဲ့ မြန်မာနိုင်ငံအကြား စက်မှုတက္ကသိုလ်၊ အင်းယားလိတ်ဟိုတယ်၊ တောင်ကြီးပြည်သူ့ဆေးရုံကြီးတို့ကို ဆောက်လုပ် ပေးဖို့ သဘောတူညီခဲ့ကြပါတယ်။
၁၉၆၁ ခုနှစ်မှာ အဆိုပါအဆောက်အအုံတွေကို စတင်တည်ဆောက်ခဲ့ပြီး ရန်ကုန်မြို့မှာ ပထမဆုံး တည်ဆောက်ခဲ့တဲ့ အင်းယားလိတ်ဟိုတယ်ကြီးနဲ့ အာအိုင်တီလို့ခေါ်တဲ့ စက်မှုတက္ကသိုလ်ကြီးကို ယနေ့ ထက်တိုင် တွေ့မြင်နိုင်ပါတယ်။ ရန်ကုန်မြို့မှာရှိတဲ့ စက်မှုတက္ကသိုလ်ကနေ မွေးထုတ်ပေးခဲ့တဲ့ လူသား အရင်းအမြစ်တွေဟာ ရာစုနှစ်အဆက်ဆက်မှာ တိုင်းပြည်အတွက် အားထားရတဲ့၊ တိုင်းပြည် တည်ဆောက်ရေးအတွက် ထိရောက်စွာ အလုပ်အကျွေးပြုနိုင်ခဲ့ကြတာကို သမိုင်းကြောင်းမှာ အထင်အရှားတွေ့နိုင်ပါတယ်။
အာအိုင်တီက ပေါ်ထွန်းလာတဲ့ ဗိသုကာပညာရှင်တွေ၊ အင်ဂျင်နီယာတွေဟာ နိုင်ငံအတွက် မည်မျှစွမ်းဆောင်နိုင်ခဲ့ကြတာကို အားလုံးသိရှိကြပါတယ်။ ဒါဟာ အာအိုင်တီလို့ခေါ်တဲ့ စက်မှု တက္ကသိုလ်ကြီးကို ရုရှားနိုင်ငံရဲ့ အကူအညီနဲ့ တည်ဆောက်ပေးနိုင်တဲ့ အကျိုးကျေးဇူး ဖြစ်ပါ တယ်။ ကြက်မောက်တောင်ဆည်ကြီးကိုလည်း (ယခင်ဆိုဗီယက်) ရုရှားနိုင်ငံအကူအညီနဲ့ တည်ဆောက်ခဲ့ပါတယ်။ အလားတူ နှစ်နိုင်ငံယဉ်ကျေးမှုနဲ့ အားကစားကဏ္ဍတွေမှာလည်း ထူးထူးခြားခြား ပူးပေါင်းဆောင်ရွက်မှုတွေ ရှိခဲ့ပါတယ်။
ရိုးရှင်းစွာထိတွေ့ဆက်ဆံ
ဒါပေမယ့် ၁၉၉၁ ခုနှစ် ဆိုဗီယက်ပြည်ထောင်စု ကြီးပြိုကွဲသွားပြီးတဲ့အခါ ရုရှား - မြန်မာဆက်ဆံ ရေးဟာ မှေးမှိန်သွားခဲ့ပါတယ်။ ထို့နောက် ရုရှား - မြန်မာဆက်ဆံရေးကို ပြန်လည်ထူထောင်လာပြီး မျက်မှောက်ကာလမှာ နှစ်နိုင်ငံဆက်ဆံရေး ပြန်လည် ကောင်းမွန်လာခဲ့ပါတယ်။ ရုရှားနဲ့မြန်မာ နှစ်နိုင်ငံဆက်ဆံရေးဟာ အနှောင်အဖွဲ့ကင်းပြီး ရိုးရှင်းစွာနဲ့ ဆက်ဆံခဲ့ကြတာကို နှစ်နိုင်ငံဆက်ဆံရေးသမိုင်း ကြောင်းတစ်လျှောက်နဲ့ မျက်မှောက်ကာလထိတိုင် တွေ့မြင်နိုင်ပါတယ်။ မိတ်ကောင်း၊ ဆွေကောင်းအဖြစ် ထိတွေ့ဆက်ဆံလျက်ရှိပြီး မည်သည့်နိုင်ငံရေးဝါဒမျှ လွှမ်းမိုးစွက်ဖက်မှုမရှိတာကို တွေ့ရမှာဖြစ်ပါတယ်။ မြန်မာနိုင်ငံနဲ့ ပြည်သူတွေ အကျိုးစီးပွား ဖြစ်ထွန်းစေဖို့၊ နှစ်နိုင်ငံပြည်သူတွေ ရင်းနှီးချစ်ကြည်စေဖို့ ရိုးရှင်းစွာထိတွေ့ဆက်ဆံခဲ့ကြတာကို တွေ့ရမှာဖြစ်ပါတယ်။
ရုရှားနိုင်ငံဟာ မြန်မာနိုင်ငံဖွံ့ဖြိုးတိုးတက်ရေးအတွက် လူသားအရင်းအမြစ်တွေ မွေးထုတ်ပေးနိုင် အောင် အစဉ်အဆက် ကူညီဆောင်ရွက်ပေးလျက် ရှိပါတယ်။ မြန်မာနိုင်ငံက ထူးချွန်ကျောင်းသား ကျောင်းသူတွေဟာ ရုရှားနိုင်ငံက နာမည်ကြီး တက္ကသိုလ်တွေမှာ တက်ရောက်ပညာသင်ကြား ခဲ့ပါတယ်။ ၁၉၇၂ ခုနှစ်မှာ နှစ်နိုင်ငံ ကျောင်းသား ကျောင်းသူတွေ ပညာရေးအပြန်အလှန်ဖလှယ်တဲ့ အစီအစဉ်စတင်ခဲ့ပါတယ်။ မြန်မာကျောင်းသား ၁၂ ယောက်ဟာ မော်စကိုတက္ကသိုလ်မှာ ပညာ ဆည်းပူးခွင့်ရခဲ့ပြီး ရုရှားကျောင်းသား ခြောက်ဦးဟာ ရန်ကုန်တက္ကသိုလ်မှာ ယဉ်ကျေးမှုဆိုင်ရာတွေနဲ့ နည်းပညာသိပ္ပံပညာတွေကို လေ့လာဆည်းပူးခဲ့ပါတယ်။
အပြန်အလှန်စိတ်ထားဆက်ဆံ
ရုရှားနိုင်ငံရဲ့ အဆင့်မြင့်တက္ကသိုလ်တွေမှာ လွန်ခဲ့တဲ့ ဆယ်စုနှစ်ကာလများကတည်းက မြန်မာ အစိုးရက ရွေးချယ်စေလွှတ်ခဲ့တဲ့ မြန်မာကျောင်းသား ၆၀၀၀ ကျော်ဟာ မဟာဘွဲ့နဲ့ ပါရဂူဘွဲ့တွေရရှိခဲ့ပြီး လက်ရှိမှာလည်း ရာနဲ့ချီတဲ့ ကျောင်းသား ကျောင်းသူတွေဟာ ပညာသင်ကြားလျက်ရှိပါတယ်။ မြန်မာ့တပ်မတော်မှ အရာရှိသင်တန်းသားပေါင်း ၇ဝဝဝ ကျော်ဟာ ရုရှားနိုင်ငံတက္ကသိုလ်အသီးသီးမှာ အဆင့်မြင့်ပညာတွေကို အောင်မြင်စွာသင်ယူ ဆည်းပူး နိုင်ခဲ့ပါတယ်။ ရုရှားနဲ့မြန်မာဟာ နှစ်နိုင်ငံရဲ့ စာပေယဉ်ကျေးမှုအပေါ် အထူးအလေးထားစိတ်ဝင် စားခဲ့ကြပါတယ်။ တစ်နိုင်ငံရဲ့ယဉ်ကျေးမှု၊ စာပေနဲ့ အနုပညာအပေါ် တစ်နိုင်ငံက စိတ်ဝင်တစားရှိပြီး မြန်မာဝတ္ထုတချို့ကို ရုရှားဘာသာနဲ့ ဖော်ပြတာတွေရှိသလို ရန်ကုန်မြို့ရဲ့ စာအုပ်အရောင်းဆိုင် တွေမှာလည်း ကမ္ဘာကျော် ရုရှားစာရေးဆရာတွေရဲ့ စာအုပ်တွေနဲ့ ရုရှားနိုင်ငံသမိုင်းကြောင်း ရေးသားထားတဲ့ စာအုပ်တွေ၊ ခေတ်ပေါ်လူနေမှု ဘဝအကြောင်း ရေးသားထားတဲ့စာအုပ်တွေ ရှိပါတယ်။
မြန်မာနိုင်ငံဟာ ယဉ်ကျေးမှုအစဉ်အလာ ကြီးမားတဲ့နိုင်ငံဖြစ်ပြီး မြန်မာ့ယဉ်ကျေးမှုကိုသာမက ဘာသာစကားကိုလည်း နိုင်ငံအများက စိတ်ဝင်စားကြပါတယ်။ ရုရှားနိုင်ငံ မော်စကိုမြို့တော်မှာရှိတဲ့ နိုင်ငံတော်တက္ကသိုလ်လက်အောက်က အာရှ - အာဖရိက နိုင်ငံတွေရဲ့တက္ကသိုလ်တွေနဲ့ စိန့်ပီတာ စဘတ်မြို့တော်က နိုင်ငံတော်တက္ကသိုလ်တွေမှာ မြန်မာဘာသာစကားကို လေ့လာသင်ယူနေသူတွေ ရှိကြပါတယ်။ အပြန်အလှန်အားဖြင့် မြန်မာနိုင်ငံရဲ့ အဆင့်မြင့်တက္ကသိုလ်တွေဖြစ်တဲ့ ရန်ကုန်နိုင်ငံခြားဘာသာတက္ကသိုလ်၊ မန္တလေးနိုင်ငံခြားဘာသာ တက္ကသိုလ်နဲ့ ပြင်ဦးလွင်စစ်တက္ကသိုလ်တွေမှာ ရုရှားဘာသာစကားကို သင်ယူနေကြတဲ့ မြန်မာ ကျောင်းသားတွေ ရာနဲ့ချီပြီး ရှိနေပါတယ်။
မိတ်ဆွေစစ်၊ မိတ်ဆွေကောင်း
မျက်မှောက်ကာလမှာ မြန်မာနိုင်ငံအပေါ် အနောက်အုပ်စုရဲ့ ဖိအားပေးမှုကြောင့် နိုင်ငံတကာ ဆက်ဆံရေးမှာ စိန်ခေါ်မှုတွေကြုံတွေ့နေရချိန်မှာ စိန်ခေါ်မှုတွေကြားက မြန်မာနိုင်ငံနဲ့ဆက်ဆံရေးကို မြှင့်တင်ဆောင်ရွက်လာတာဟာ မိတ်ဆွေစစ်၊ မိတ်ဆွေမှန်၊ မိတ်ဆွေကောင်းပီသတယ်လို့ ဆိုရမှာ ဖြစ်ပါတယ်။ မြန်မာနိုင်ငံမှာ ဒီမိုကရေစီ အသွင်ကူး ပြောင်းတဲ့ကာလမှာ ရုရှားနိုင်ငံဟာ မြန်မာနိုင်ငံနဲ့ ဆက်သွယ်ပေါင်းစည်းလုပ်ကိုင်မှုတွေ ပြန်လည် ဆောင်ရွက်လာနိုင်တာကို တွေ့ရပြီဖြစ်ပါတယ်။ ၂၀၁၄ ခုနှစ် သြဂုတ်လမှာ ရုရှား - မြန်မာ အစိုးရအချင်းချင်း ကုန်သွယ်မှုနဲ့ စီးပွားရေးပူးပေါင်း ဆောင်ရွက်ရေးကော်မရှင်ကို ဖွဲ့စည်းခဲ့ပါတယ်။
၂၀၂၁ ခုနှစ် စက်တင်ဘာလ ၂၈ ရက်နေ့မှာ မြန်မာ - ရုရှား ကဏ္ဍအလိုက် နှစ်ဖက်စီးပွားရေး လုပ်ငန်းရှင်တွေ ပါဝင်တဲ့ဆွေးနွေးမှုအစီအစဉ်ကို ကျင်းပခဲ့ပါတယ်။ နှစ်နိုင်ငံ ဦးစားပေးဆောင်ရွက် နိုင်မယ့်နယ်ပယ်တွေဖြစ်တဲ့ ဘဏ်နဲ့အာမခံလုပ်ငန်း၊ စိုက်ပျိုးမွေးမြူရေးနဲ့ငါးလုပ်ငန်း၊ လျှပ်စစ်နဲ့ စွမ်းအင်ကဏ္ဍ၊ စားသောက်ကုန်ထုတ်လုပ်မှုလုပ်ငန်း၊ သတ္တုကဏ္ဍလုပ်ငန်းတွေနဲ့ပတ်သက်ပြီး နှစ်နိုင်ငံစီးပွားရေးလုပ်ငန်းရှင် ၁၈၅ ဦးတို့က Virtual စနစ်နဲ့ ပါဝင်ဆွေးနွေးခဲ့ကြပါတယ်။
မြန်မာနိုင်ငံနဲ့ ရုရှားနိုင်ငံဟာ နှစ်နိုင်ငံ အရပ်ဘက်၊ စစ်ဘက်ဆက်ဆံရေးတွေမှာ နီးကပ်စွာ ဆောင်ရွက်နိုင်ခဲ့ပြီး အထူးသဖြင့် မြန်မာ့တပ်မတော်အနေနဲ့ ကမ္ဘာ့အလယ်မှာ အဆင့်အတန်း တစ်ခုအထိ ရပ်တည်နိုင်ခဲ့တာဟာ ရုရှားနိုင်ငံရဲ့ အကူအညီတွေ အထိုက်အလျောက်ပါဝင်ခဲ့တယ်လို့ ဆိုရမှာဖြစ်ပါတယ်။ ရုရှား - မြန်မာ နှစ်နိုင်ငံဆက်ဆံရေး သမိုင်းကြောင်းတစ်လျှောက်မှာ အခိုင်မာဆုံးနဲ့ အကောင်းဆုံးကာလကို ညွှန်းဆိုရမယ်ဆိုရင် နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် နိုင်ငံ့တာဝန်ယူနေတဲ့ ကာလလို့ ဆိုချင်ပါတယ်။
ဒီလိုခိုင်မာအားကောင်းလာရတာက မြန်မာ့တပ်မတော်ခေါင်းဆောင်အဆက်ဆက်ဟာ ခိုင်မာ တဲ့မူဝါဒတွေ ချမှတ်နိုင်ခဲ့ပြီး နှစ်နိုင်ငံဆက်ဆံရေးကို ပိုမိုကောင်းမွန်အောင် ထိန်းသိမ်းမြှင့်တင် နိုင်ခဲ့တာကြောင့် ဖြစ်ပါတယ်။ ။
မောင်ငြိမ်းအေး
https://t.me/MyanmarNationalPost
No comments:
Post a Comment