MNP - စက်တင်ဘာ ၁၄
မန္တလေးတိုင်းဒေသကြီး၊ ညောင်ဦးခရိုင်၊ ညောင်ဦးမြို့နယ်တွင် နိုင်ငံရေးစစ်ကြောင်း၊ အုပ်ချုပ်ရေးစစ်ကြောင်း၊ လူမှုရေးစစ်ကြောင်း၊ စည်းရုံးရေးစစ်ကြောင်းနှင့် ဒေသဖွံ့ဖြိုးရေးစစ်ကြောင်း စစ်ကြောင်းကြီး (၅) ကြောင်းဖြင့် ဒေသဖွံ့ဖြိုးရေးလုပ်ငန်းများကို ယမန်နေ့ နေ့လယ် ၁ နာရီခွဲအချိန်က ကူရွာကျေးရွာ၌ ကွင်းဆင်းဆောင်ရွက်ခဲ့ကြောင်း သိရသည်။
ထို့သို့ကွင်းဆင်းဆောင်ရွက်ရာ မြို့နယ်ကျန်းမာရေးဦးစီးဌာနမှ ကိုဗစ်-၁၉ ရောဂါ ကာကွယ်ဆေး များထိုးနှံပေးခြင်း၊ လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာနမှ ပန်းခင်း(၂)စီမံချက်ဖြင့် အိမ်ထောင်စုဇယားများ ပြုလုပ်ပေးခြင်းနှင့် မှတ်ပုံတင်များပြုလုပ်ပေးခြင်း၊ တိုင်းရင်းဆေးဦးစီး ဌာနမှ ဒေသခံပြည်သူများအား ကျန်းမာရေး စောင့်ရှောက်မှုပေးခြင်းများ ဆောင်းရွက်ပေးခဲ့ ကြပြီး ကူရွာကျေးရွာ ရွာဦးကျောင်းဓမ္မာရုံတွင် ဒေသခံပြည်သူလူထုနှင့် တွေ့ဆုံဆွေးနွေးကြရာ ညောင်ဦးမြို့နယ် စီမံအုပ်ချုပ်ရေးအဖွဲ့ဥက္ကဋ္ဌ ဦးနန်းတင့်နှင့် မြို့နယ်စီမံအဖွဲ့ဝင်များက နယ်မြေ ဒေသလုံခြုံရေး၊ တရားဥပဒေစိုးမိုးရေးအကြောင်းအရာများ ဆွေးနွေးဟောပြောကြပြီး ဒေသခံ ပြည်သူများမှ ဒေသဖွံ့ဖြိုးတိုးတက်ရေးအတွက် ကျေးလက်လမ်းကောင်းမွန်စေရေး၊ အခြေခံပညာကျောင်းများတွင် ဆရာ၊ ဆရာမ ထပ်မံခန့်ထားပေးနိုင်ရေး၊ စိုက်ပျိုးမွေးမြူရေးနှင့် ကျောင်းစာကြည့်တိုက်များတွင် စာအုပ်စာပေများ ထောက်ပံ့ပေးနိုင်ရေး အကြောင်းအရာများအား မေးမြန်းကြရာ သက်ဆိုင်ရာမြို့နယ်ဌာနဆိုင်ရာများမှ မေးမြန်းသည့်ကဏ္ဍအလိုက် ပြန်လည်ရှင်းလင်းဆွေးနွေးကြပြီး မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးနန်းတင့်မှ ပေါင်းစပ်ညှိနှိုင်းဆွေးနွေးခဲ့ကြောင်း သိရသည်။
ဒေသဖွံ့ဖြိုးရေး စစ်ကြောင်းစစ်ကြောင်းကြီး (၅) ကြောင်းဖြင့် ကွင်းဆင်းဆောင်ရွက်ရာတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးနန်းတင့်၊ မြို့နယ်စီမံအဖွဲ့ဝင် (၁) ဗိုလ်မှူး ပြည့်ဖြိုးအောင်နှင့် စီမံအဖွဲ့ဝင်များ၊ မြို့နယ်အဆင့်ဌာနဆိုင်ရာများ၊ ကူရွာကျေးရွာ၊ တောင်ရှေ့ကျေးရွာ၊ ရှင်မိန်ကျေးရွာ၊ တောင်ခွင်ကျေးရွာနှင့် တောင်ပုံဝကျေးရွာများ ဒေသခံပြည်သူ ၅၀၀ ဦးကျော် တက်ရောက်ခဲ့ကြောင်းသိရသည်။
သတင်း - ကိုကြေးမုံ
မြန်မာနေရှင်နယ်ပို့စ်
No comments:
Post a Comment