MNP - စက်တင်ဘာ ၂၉
ကယားပြည်နယ်၊ မယ်စဲ့ခရိုင်၊ မယ်စဲ့မြို့နယ်တွင် မြို့နယ်စည်ပင်သာယာရေးအဖွဲ့က မြို့ပေါ်ရပ်ကွက်များသို့ နေ့စဉ်ရေပေးဝေခြင်းလုပ်ငန်းများ ဖြန့်ဝေပေးလျက်ရှိရာ ယနေ့နံနက်ပိုင်းက မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးဆန်းထွန်းလတ်က ရေဖြန့်ဝေနေမှုအခြေအနေများကို လိုက်လံကြည့်ရှုခဲ့ကြောင်း သိရသည်။
မယ်စဲ့မြို့နယ်တွင် မိုးသည်းထန်စွာရွာသွန်းသဖြင့် တောင်ကျရေစီးဆင်းမှုကြောင့် မြို့ရေပေးဝေရေး ဆောင်ရွက်နေသည့် ရေတားတမံပိတ်ဆို့မှုဖြစ်ပွားရာ ရေဖြန့်ဝေမှုခေတ္တ ပြတ်တောက်ခဲ့သည့်အတွက် ဒေသခံပြည်သူများ ရေပြတ်လပ်မှုမရှိစေရေးအတွက် မြို့နယ်စည်ပင်သာယာရေးအဖွဲ့ တာဝန်ခံအင်ဂျင်နီယာ၏ ကြီးကြပ်မှုဖြင့် မြို့နယ်စည်ပင်သာယာရေးအဖွဲ့ ဝန်ထမ်းများက ရေတားတမံပိတ်နေမှုအား ဖယ်ရှားရှင်းလင်း ဆောင်ရွက်ခဲ့သဖြင့် ယနေ့တွင် ရေပြန်လည်ဖြန့်ဝေနိုင်ပြီဖြစ်ကြောင်း သိရသည်။
ထိုသို့ဆောင်ရွက်ရာတွင် ရေတားတမံမှတစ်ဆင့် နယ်စပ်ကုန်သွယ်ရေးစခန်းအနီးရှိ ဂါလန် ၁၀၀၀၀ ဆံ့ ရေစုကန်တွင် ရေစုကာ မယ်စဲ့မြို့အဝင် ရေစုကန်မှတစ်ဆင့် မြို့ပေါ်ရပ်ကွက် နှစ်ရပ်ကွက်သို့ နေ့စဉ်အလှည့်ကျစနစ်ဖြင့် ဖြန့်ဝေပေးရာ ယနေ့တွင် ပြန်လည်ပေးဝေနိုင်ခဲ့ပြီး အထက(မယ်စဲ့)မှ ဆရာ၊ ဆရာမများနှင့် ကျောင်းသား၊ ကျောင်းသူများ ရေသုံးစွဲနိုင်ရေးအတွက် မြို့နယ်စည်ပင်သာယာရေးအဖွဲ့ ရေသယ်ယာဉ်ဖြင့် ကျောင်းအတွင်းရှိ ရေကန်များသို့ ဖြည့်ဆည်း ဆောင်ရွက်နေမှုအား မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးဆန်းထွန်းလတ်က ကြည့်ရှုခဲ့ပြီး လိုအပ်ချက်များကို တာဝန်ခံအင်ဂျင်နီယာအား မှာကြားခဲ့ကြောင်း သိရသည်။
သတင်း - ဝတ်ရည်
မြန်မာနေရှင်နယ်ပို့စ်
No comments:
Post a Comment