MNP - စက်တင်ဘာ ၂၉
ပဲခူးတိုင်းဒေသကြီး၊ ညောင်လေးပင်ခရိုင်၊ ဒိုက်ဦးမြို့နယ်၊ နှင်းပုလဲကျေးရွာဓမ္မာရုံ၌ မြို့နယ်စိုက်ပျိုးရေးဦးစီးဌာနမှ စူပါအီးအမ်ဘိုကာရှီ မြေဆွေးပြုလုပ်နည်းကို ယမန်နေ့နံနက်ပိုင်းက လက်တွေ့ပြသရာ မြို့နယ်အုပ်ချုပ်ရေးမှူး ဦးကျော်ဆန်းဦး၊ မြို့နယ်ရဲတပ်ဖွဲ့မှူးရဲမှူးအောင်မျိုး၊ လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာန၊ မြို့နယ်ဦးစီးမှူးဦးကျော်စိုးမိုး၊ ကျေးလက်ဒေသဖွံ့ဖြိုးတိုးတက်ရေးဦးစီးဌာန လက်ထောက်ညွှန်ကြားရေးမှူးဦးအောင်မြင့်ထွန်းနှင့် ကျေးရွာအတွင်းမှ တောင်သူဦးကြီးများတက်ရောက်၍ စိတ်ဝင်စားစွာကြည့်ရှုအားပေးကြသည်။
အဆိုပါသရုပ်ပြသရာတွင် မြို့နယ်စိုက်ပျိုးရေးဦးစီးမှူးဦးဇော်သိန်းနိုင်က မြေဆွေးပြုလုပ်ရာတွင် စပါးခွံ၊ ဖွဲနုနှင့် နွားချေးဆတူရောစပ်ကာ စုပုံပြီးလျှင် ဖျော်စပ်ပြီး အီးအမ်ဖျော်ရည်ကို သမအောင်ဖျန်း၍ မွှေပေးကာလက်ဖြင့်ဆုပ်ကြည့်ပါက အလုံးမပျက်အခြေအနေတွင် ရောစပ်ပစ္စည်းများအား အိတ်တွင်ထည့်ပြီး လေလုံအောင်ချည်နှောင်၍ အရိပ်တွင်ထားရှိရပါကြောင်း နွေရာသီတွင် ၃ ရက်၊ ဆောင်းရာသီတွင် ၁၀ ရက်ကြာလျှင် မြေဆွေးအဖြစ်အသုံးပြုနိုင်ပုံကို လက်တွေ့သရုပ်ပြသခဲ့ကြောင်း သိရသည်။
မြန်မာနေရှင်နယ်ပို့စ်
No comments:
Post a Comment