MNP - စက်တင်ဘာ ၃၀
ကရင်ပြည်နယ်၊ ဘားအံခရိုင်၊ ပိုင်ကျုံမြို့ စည်ပင်သာယာရေးအဖွဲ့မှ မြို့အင်္ဂါရပ်နှင့်အညီ ရေစီးရေလာကောင်းမွန်စေရေးအတွက် အမှတ် (၂) ရပ်ကွက် သစ္စာလမ်းပေါ်ရှိ လမ်းဘေးဝဲယာအုတ်စီရေမြောင်း တည်ဆောက်ခြင်းကို ယမန်နေ့က စတင်အကောင်အထည်ဖော် ဆောင်ရွက်ခဲ့သည်။
ထို့သို့ဆောင်ရွက်ရာတွင် ကရင်ပြည်နယ်အစိုးရအဖွဲ့၏ ၂၀၂၂-၂၀၂၃ ဘဏ္ဍာရေးနှစ် အတွင်း ခွင့်ပြုရန်ပုံငွေကျပ် (၉.၄၆) သန်းဖြင့် အရှည် ၃၂၀ပေ၊ အကျယ် ၂ပေ၊ အမြင့် ၃ ပေရှိပြီး လုပ်ငန်းများ သတ်မှတ်အချိန်ကာလအတွင်း အရည်အသွေးပြည့်မီစွာ ပြီးစီးနိုင်ရေး အတွက် မြို့စည်ပင်သာယာရေးအဖွဲ့မှ တာဝန်ရှိသူများတို့က အနီးကပ်ကြီးကြပ်ဆောင်ရွက် လျက်ရှိကြောင်း သိရသည်။
အဆိုပါ လုပ်ငန်းများပြီးစီးပါက မြို့သာယာလှပလာမည့်အပြင် ရေစီးရေလာ ကောင်းမွန်လာမည်ဖြစ်ပြီး ဒေသနေများအနေဖြင့် ကျန်းမာရေးနှင့်အညီ လူနေမှုဘဝနှင့် သွားရေးလာရေးအတွက် အဆင်ပြေလာမည်ဖြစ်ကြောင်းသိရသည်။
သတင်း - နော်ခူး
မြန်မာနေရှင်နယ်ပို့စ်
No comments:
Post a Comment