MNP - အောက်တိုဘာ ၃၀
စတုတ္ထအကြိမ်မြောက် လားရှိုးတန်ဆောင်တိုင်ပွဲတော်ကြီးကို နိုဝင်ဘာလ ၄ ရက်နေ့မှ ၇ ရက်နေ့အထိ လားရှိုးမြို့အဝင်ရှိ ရန်တိုင်းအောင်ဆုတောင်းပြည့်မြို့ဦးစေတီတော်ကြီး ပရဝုဏ်တွင် စည်ကားသိုက်မြိုက်စွာဖြင့် ကျင်းပပြုလုပ်သွားမည်ဖြစ်ကြောင်း သိရသည်။
တန်ဆောင်တိုင်ပွဲတော်ကြီးတွင် ညမီးကြီးနှင့်စိန်နားပန်မီးပုံးပျံကြီးများအပြင် အလှမီးပုံးပျံငယ်များ၊ ခိုဖြူမီးပုံးပျံ၊ ဆင်ရုပ်မီးပုံးပျံများကိုလည်း လွှတ်တင်သွားကြမည်ဖြစ်ကြောင်း သိရသည်။
နိုဝင်ဘာလ ၄ ရက်နေ့တွင် ပြည်သူ့ဥယျာဉ်ဖွင့်ပွဲနှင့်တေးဂီတဖျော်ဖြေပွဲ၊ ၅ ရက်နေ့တွင် တေးဂီတဖျော်ဖြေပွဲ၊ ၆ ရက်နေ့တွင် လားရှိုးမြို့တန်ဆောင်တိုင်မီးပုံးပျံပွဲတော်ဖွင့်ပွဲနှင့် တေးဂီတ ဖျော်ဖြေပွဲ ၇ ရက်နေ့တွင် မီးပုံးပျံလွှတ်တင်ပွဲများနှင့် နာမည်ကျော်အဆိုတော်များ၏ တေးဂီတ ဖျော်ဖြေပွဲများဖြင့် စည်ကားသိုက်မြိုက်စွာ ကျင်းပပြုလုပ်သွားမည်ဖြစ်ကြောင်း သိရသည်။
ပွဲတော်ရက်အတွင်း ဗမာ၊ ရှမ်း၊ ကချင်၊ လားဟူ၊ မြောင်ဇီး(ခေါ်)မှုန့်၊ ပလောင်၊ ဝ ၊ လီဆူ၊ မုန်းဝန်းဗမာ၊ ကိုးကန့်တိုင်းရင်းသားတို့က ရိုးရာယဉ်ကျေးမှုအကအလှများဖြင့် ပွဲတော်လာဧည့်ပရိသတ်များကို ဖျော်ဖြေသွားမည်ဖြစ်ပြီး ပွဲတော်သို့လာရောက်ကြသူများကို စေတနာရှင်အလှူရှင်များက စတုဒိတာများဖြင့် ဧည့်ခံသွားကြမည်ဖြစ်ကြောင်း ပွဲတော်ကျင်းပရေးကော်မတီဝင် ဦးကျော်တိုး ကပြောသည်။
လားရှိုးတန်ဆောင်တိုင်ပွဲတော်ကြီးကို ၂၀၁၆ ခုနှစ်မှစတင်ကာ ရှိုင်းနင်းမြန်မာကုမ္ပဏီမှ ချယ်ရီမြိုင်အိမ်ရာဝန်းတွင် စတင်သန္ဓေတည်ကျင်းပပြုလုပ်ခဲ့ပြီးနောက် ၂၀၁၇ ခုနှစ်တွင် လားရှိုး တန်ဆောင်တိုင်ပွဲတော်ကြီးကို တိုင်းရင်းသားယဉ်ကျေးမှုကွင်းတွင် ခြိမ့်ခြိမ့်သဲကျင်းပခဲ့ကာ ၂၀၁၈ ခုနှစ်တွင် ချယ်ရီမြိုင်အိမ်ရာဝန်းတွင် တတိယအကြိမ်မြောက်အဖြစ် ကျင်းပခဲ့ပြီး ယခုနှစ်တွင် စတုတ္ထအကြိမ်မြောက်အဖြစ် စည်ကားသိုက်မြိုက်စွာဖြင့် ကျင်းပမည်ဖြစ်ကြောင်း သိရသည်။
သတင်း - စိုင်းထွန်း
မြန်မာနေရှင်နယ်ပို့စ်
No comments:
Post a Comment