MNP - အောက်တိုဘာ ၃၁
မန္တလေးတိုင်းဒေသကြီး၊ မိတ္ထီလာမြို့နယ် ကြွယ်ကန်ကျေးရွာမှ ဒေသခံပြည်သူများ သောက်သုံးရေ အဆင်ပြေစေရေးအတွက် ဆောင်ရွက်လျက်ရှိသော မြေသားရေကန် တူးဖော်ပြုပြင်ခြင်းလုပ်ငန်း ရာနှုန်းပြည့် ပြီးစီးပြီဖြစ်ကြောင်း မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ သိရသည်။
မိတ္ထီလာမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ၂၀၂၂-၂၀၂၃ ဘဏ္ဍာရေးနှစ်တွင် တိုင်းဒေသကြီး ရန်ပုံငွေ ကျပ် (၇.၆၉၅) သန်းဖြင့် ကြွယ်ကန်ကျေးရွာအုပ်စု ကြွယ်ကန်ကျေးရွာတွင် မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ တာဝန်ယူပြီး အကျယ် အလျား ပေ ၁၈၀ ၊ အနံ ပေ ၁၅၀ ၊ အနက် ၃ပေရှိ မြေသားရေကန်တူးဖော်ပြုပြင်ခြင်းလုပ်ငန်းကို ဇွန် ၂၃ ရက်နေ့မှ စတင်၍ ဆောင်ရွက်လျက်ရှိရာ ၎င်းမြေသားရေကန်တူးဖော်ပြုပြင်ခြင်းလုပ်ငန်းမှာ ရာနှုန်းပြည့် ပြီးစီးပြီးဖြစ်သည်။ အဆိုပါ မြေသားရေကန်တူးဖော်ပြုပြင်ခြင်း လုပ်ငန်းပြီးစီး၍ အိမ်ခြေ ၂၁၈ အိမ်၊ လူဦးရေ ၁၃၃၀ ဦးရှိသည့် ကြွယ်ကန်ကျေးရွာမှ ဒေသခံပြည်သူများ သောက်သုံးရေအတွက် ရာသီမရွေး အဆင်ပြေတော့မည်ဖြစ်သည်။
ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ကျေးလက်နေပြည်သူများ ရာသီမရွေး သောက်သုံးရေ အဆင်ပြေစေရေး နှစ်စဉ်ဘဏ္ဍာရေးနှစ်အလိုက် မြို့နယ်အတွင်းရှိ ကျေးရွာများတွင် မြေသားရေကန် တူးဖော်ပြုပြင်ခြင်း၊ စက်ရေတွင်းတူးခြင်း၊ ရေစင်နှင့်ရေစက်ရုံ တည်ဆောက်ခြင်း၊ ခြံစည်းရိုးကာရံခြင်း၊ ရေပိုက်သွယ်တန်းခြင်း လုပ်ငန်းတို့အား အကောင်အထည်ဖော်ဆောင်ရွက်ပေးလျက်ရှိကြောင်း သိရသည်။
သတင်း - သိန်းမြင့်ကျော်
မြန်မာနေရှင်နယ်ပို့စ်
No comments:
Post a Comment