MNP - နိုဝင်ဘာ ၅
မိတ္ထီလာမြို့ မိုးကောင်းဆုတောင်းပြည့် အန္တကူရေလယ်စေတီတော်၏ အကြိမ် ၃ဝ ပြည့်မီးကြာ ၅ဝဝဝ လွှတ်မျှောပူဇော်ပွဲကို နိုဝင်ဘာလ ၆ ရက်နေ့မှ ၇ ရက်နေ့အထိ နှစ်ရက်တိုင်ကျင်းပမည်ဖြစ်ကြောင်း အဆိုပါစေတီတော်ဂေါပကအဖွဲ့ဥက္ကဋ္ဌ ဦးခင်ညိုထံက သိရသည်။
မိတ္ထီလာကန်အလယ်မှာ တည်ထားကိုးကွယ်တဲ့ မိုးကောင်းဆုတောင်းပြည့် အန္တကူရေလယ်စေတီတော်ရဲ့ အကြိမ် ၃ဝ ပြည့် မီးကြာ ၅ဝဝဝ လွှတ်မျှောပူဇော်ပွဲကို တန်ဆောင်မုန်းလဆန်း ၁၄ ရက်နေ့နဲ့ တန်ဆောင်မုန်းလပြည့်နေ့နှစ်ရက် ကျင်းပပြုလုပ်သွားမှာဖြစ်ပါတယ်။ မီးကြာလွှတ်မျှောပူဇော်လိုတဲ့ ဘုရားဖူးလာရောက်သူများကို မီးကြာခွက် ၃ ခွက် တစ်ထောင်ကျပ်နှုန်းနဲ့ ရောင်းချပေးသွားမှာဖြစ်ပါတယ်။ မနှစ်က တန်ဆောင်တိုင်ပွဲတော် ကာလမှာတော့ မီးကြာမျှောပွဲကို ဖြစ်တယ်ဆိုရုံပဲ ပြုလုပ်ခဲ့တာဖြစ်ပေမယ့် ဒီနှစ်တော့ မီးကြာခွက်အရေအတွက်လည်း အခုရေ ၅ဝဝဝ ပြုလုပ်ထားတာမို့ ဒီနှစ်မီးကြာလွှတ်မျောပူဇော်ပွဲက မနှစ်ကထက်ပိုပြီးစည်ကားမှာပါ ဟု အဆိုပါစေတီတော်ဂေါပကအဖွဲ့ဥက္ကဋ္ဌ ဦးခင်ညိုက ပြောသည်။
မိတ္ထီလာ-ကျောက်ပန်းတောင်းကားလမ်းမ မိတ္ထီလာကန်ကူးတံတား၏ တောင်ဘက်ရှိ မိတ္ထီလာကန်အလယ်တွင် တည်ထားကိုးကွယ်သော မိုးကောင်းအန္တကူရေလယ်စေတီတော် မီးကြာလွှတ်မျှောပွဲကို နှစ်စဉ်တန်ဆောင်တိုင်ပွဲတော်ကာလတွင် ကျင်းပလေ့ရှိပြီး ဘုရားဖူးလာရောက်သူဒေသခံများနှင့် ရပ်နီးရပ်ဝေးမှ ဧည့်သည်များက အဆိုပါမီးကြာလွှတ်မျှောပူဇော်ပွဲတွင် အေးချမ်းပျော်ရွှင်စွာပါဝင်ဆင်နွှဲလေ့ရှိကြောင်း သိရသည်။
သတင်း - ချမ်းသာ
မြန်မာနေရှင်နယ်ပို့စ်
No comments:
Post a Comment