MNP - နိုဝင်ဘာ ၇
ရှမ်းပြည်နယ်(မြောက်ပိုင်း)မိုးမိတ်ခရိုင် မိုးမိတ်မြို့နယ်တွင် တန်ဆောင်မုန်းလပြည့်နေ့ ဆွမ်းဆန်စိမ်းလောင်းလှူပွဲကို ယနေ့ နံနက် ၆ နာရီအချိန်က ကျင်းပခဲ့ကြောင်းသိရသည်။
မိုးမိတ်မြို့ပေါ်ရှိ ဘုန်းတော်ကြီးကျောင်းတိုက်များမှ ဆရာတော်သံဃာတော်များ၊ ရှင်သာမဏေများက အမှတ်(၁) အခြေခံပညာအထက်တန်းကျောင်းနှင့် မြို့နယ်စိုက်ပျိုးရေးရုံးထိပ်တွင် စုဝေးတော်မူပြီး မိုးမိတ်၊ မန်တုံလမ်းမကြီးအတိုင်း လမ်းတစ်လျောက်ကြွမြန်းတော်မူကြရာ စေတနာရှင် ၊အလှူရှင် မိဘပြည်သူများက ဆွမ်း ၊ ဟင်း နှင့် လှူဖွယ်ပစ္စည်းမျိုးစုံတို့ကို လောင်းလှူခဲ့ကြကြောင်း သိရသည်။
နှစ်စဉ် တန်ဆောင်မုန်းလပြည့်နေ့ရောက်တိုင်း ဒေသခံပြည်သူများသည် ဥပုဒ်သီတင်း ဆောက်တည် ကြခြင်း ၊ စုပေါင်း၍ ဆွမ်းလောင်းလှူခြင်းတို့နှင့်ကထိန်ခင်းခြင်းများကို ဆောင်ရွက်ကြပြီး အလှူဒါန ကုသိုလ်ကောင်းမှု ပြုလုပ်ကြကြောင်း မြို့မိမြို့ဖတစ်ဦးဖြစ်သူ ဦးအောင်ထွန်းမှ ပြောသည်။
သတင်း - မိုးမိတ်သား
မြန်မာနေရှင်နယ်ပို့စ်
No comments:
Post a Comment