MNP - နိုဝင်ဘာ ၁၂
ကရင်ပြည်နယ်၊ ကော့ကရိတ်မြို့တွင် (၂၀၂၂-၂၀၂၃) ပညာသင်နှစ်၊ အခြေခံပညာကျောင်းများမှ ကျောင်းအုပ်ကြီးများ စီမံခန့်ခွဲမှုစွမ်းဆောင်ရည် မြင့်မားလာရေးရည်ရွယ်၍ စွမ်းဆောင်ရည်မြင့်မားရေး အလုပ်ရုံဆွေးနွေးပွဲ ဆင့်ပွားသင်တန်းကို ယနေ့နံနက်(၉)နာရီက ကော့ကရိတ်မြို့ အထက(၂) ကျောင်းသရဖီခန်းမ၌ ကျင်းပခဲ့ကြောင်း သိရသည်။
အခမ်းအနားတွင် ကော့ကရိတ်မြို့နယ်စီမံအုပ်ချုပ်ရေးဥက္ကဋ္ဌ ဦးကျော်ကျောဦးက ပညာရေးကဏ္ဍတိုးတက်ရေးအတွက် ကျောင်းအုပ်ဆရာ/မကြီးများ ဆရာမိဘကျောင်းသားများ ပူးပေါင်းပါဝင်အောင် ဝိုင်းဝန်းစည်းရုံးဆောင်ရွက်ကြရေးနှင့် ဌာနအနေဖြင့် ပူးပေါင်ဆောင်ရွက်ရမည် ကိစ္စရပ်များကို ပေါင်းစပ်ဆောင်ရွက်ပေးမည် ဖြစ်ပါကြောင်း စသည်ဖြင့် အဖွင့်အမှာစကားပြောကြားသည်။ ထိုနောက်ခရိုင်ပညာရေးမှူး ဦးခွန်အောင်မျိုးဆွေက တိုးတက်ပြောင်းလဲလာသော ပညာရေးစနစ်နှင့်အညီ သင်ကြားရေးအပိုင်းတွင်လည်း ပြောင်းလဲနေမှုအပေါ် ဆရာ၊ဆရာမတို့အနေဖြင့် ကော့ကရိတ်မြို့နယ် ပညာရေးတိုးတက်ရေးအတွက် ဝိုင်းဝန်းကြိုးစားဆောင်ရွက်ပေးကြရေး လမ်းညွှန်အမှာစကားပြောကြားသည်၊
အဆိုပါသင်တန်းကို ကော့ကရိတ်ခရိုင်ပညာရေးမှူး ဦးခွန်အောင်မျိုးဆွေနှင့် မြို့နယ်ပညာရေးမှူး ဒေါ်ခင်ညိုညိုမေတို့က ဆွေးနွေးပို့ချသွားမည်ဖြစ်ပြီး ကော့ကရိတ်မြို့နယ်အတွင်းရှိ အခြေခံပညာအထက်တန်း၊ အထက်တန်းကျောင်းခွဲ၊ အလယ်တန်းကျောင်း၊ အလယ်တန်းကျောင်းခွဲ၊ မူလတန်းလွန်ကျောင်း၊ မူလတန်းကျောင်း၊ မူလတန်းခွဲကျောင်းများရှိ ကျောင်းအုပ်ဆရာ၊ဆရာမကြီး(၂၉၉)ဦး၊ တက်ရောက်ကြပြီး နိုဝင်ဘာလ ၁၂ ရက်နေ့(၁)ရက်တာ သင်ကြားပို့ချပေးမည်ဖြစ်ကြောင်း သိရသည်။
သတင်း - ခင်မျိုးဝင်း
မြန်မာနေရှင်နယ်ပို့စ်
No comments:
Post a Comment