MNP - နိုဝင်ဘာ ၆
ရှမ်းပြည်(တောင်ပိုင်း)၊ မိုင်းနောင်မြို့၊ အမှတ်(၂) ရပ်ကွက်အတွင်းရှိ မိဘပြည်သူများ အားလုံးအိမ်ထောင်စုလူဦးရေစာရင်းမှန်ကန်ရေးနှင့် နိုင်ငံသားစီစစ်ရေး ကတ်ပြားများရရှိရေးအတွက် လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာန ဝန်ထမ်းများနှင့် တာဝန်ရှိသူများက ယမန်နေ့နံနက် ၁၀ နာရီအချိန်တွင် ကွင်းဆင်းဆောင်ရွက် ပေးလျက်ရှိကြောင်း သိရသည်။
ထိုသို့ဆောင်ရွက်ရာတွင် မိုင်းနောင်မြို့ လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာနမှ ဒုလဝကမှူးများနှင့် အထွေထွေအုပ်ချုပ်ရေးဦးစီးဌာနမှ ရပ်ကွက်တာဝန်ကျ စာရေးများက မိမိတို့ရပ်ရွာအတွင်းရှိ မိဘပြည်သူများနှင့် ၎င်းတို့မိသားစုဝင်များအားလုံး အိမ်ထောင်စုလူဦးရေစာရင်း တိကျမှန်ကန် ပြည့်စုံမှုရှိ/မရှိ တိုက်ဆိုင်စစ်ဆေးခြင်း၊ အိမ်ထောင်စုလူဦးရေစာရင်းပုံစံ ၆၆/၆နှင့်ပတ်သက်၍ အခက်အခဲများရှိပါက ဆောင်ရွက်ပေးခြင်း၊ နိုင်ငံသားစီစစ်ရေး ကတ်ပြားပျောက်ဆုံး၊ ပျက်စီးနေသူများ၊ အသက်(၁၀)နှစ်ပြည့်သော်လည်း ကိုင်ဆောင်လက်မှတ် မရှိသေးသူများအား ပြုလုပ်ဆောင်ရွက်ပေးခဲ့ကြောင်း သိရသည်။
အိမ်ထောင်စုလူဦးရေစာရင်းနှင့် နိုင်ငံသားစီစစ်ရေးကတ်ပြားများ ကွင်းဆင်းဆောင်ရွက်သည့်နေရာသို့ မြို့အုပ်ချုပ်ရေးမှူး ဦးစည်သူထွန်းနှင့် စခန်းမှူးရဲအုပ်ဇော်ဝင်းတို့က မိဘပြည်သူများ အိမ်ထောင်စုလူဦးရေ စာရင်းပြည့်စုံမှန်ကန်မှုရှိရေး၊ နိုင်ငံသားတိုင်းအသက်(၁၈)နှစ်ပြည့်ပြီးပါက ကိုင်ဆောင်လက်မှတ်ရရှိရေးအတွက် ကြည့်ရှုစစ်ဆေးကာ လိုအပ်သည်များ ပူးပေါင်းဆောင်ရွက်ပေးကြောင်း သိရသည်။
သတင်း - မနန်း
မြန်မာနေရှင်နယ်ပို့စ်
No comments:
Post a Comment