ဧရာဝတီတိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးမိုးမင်းနိုင် (၇၅)နှစ်မြောက် စိန်ရတုလွတ်လပ်ရေးနေ့ကို ကြိုဆိုဂုဏ်ပြုသောအားဖြင့် ကွန်ကရစ်လမ်းသစ်အား တက်ရောက်ဖွင့်လှစ်

MNP - ဒီဇင်ဘာ ၃၀

ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ် စည်ပင်သာယာရေးအဖွဲ့က (၇၅)နှစ်မြောက် စိန်ရတုလွတ်လပ်ရေးနေ့ကို ကြိုဆိုဂုဏ်ပြုသောအားဖြင့် ဒေးဒရဲမြို့နယ်၊ အမှတ်(၁) ရပ်ကွက်ရှိ စိန္တာမုနိအဝင်လမ်း ကွန်ကရစ်လမ်းသစ်ဖွင့်ပွဲ အခမ်းအနားကို ယမန်နေ့နံနက်(၁၁)နာရီက ကျင်းပပြုလုပ်ခဲ့ကြောင်း သိရသည်။

အဆိုပါကွန်ကရစ်လမ်းအား ဧရာဝတီတိုင်းဒေသကြီး လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီးမိုးမင်းနိုင်၊ တိုင်းဒေသကြီး စည်ပင်သာယာရေးအဖွဲ့ညွှန်ကြားရေးမှူး ဦးဘုန်းလွင်နှင့် ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးတင်လင်းတို့က ဖဲကြိုးဖြတ်ဖွင့်လှစ်ပေးကြသည်။ ဆက်လက်၍ မြို့နယ်စည်ပင်သာယာရေးအဖွဲ့ကော်မတီဥက္ကဋ္ဌ ဦးအောင်မြင့်ဦးက လမ်းဖွင့်ပွဲအထိမ်းအမှတ်အလံများကို ဂုဏ်ပြုပေးအပ်ခဲ့ပြီး လုံခြုံရေးနှင့်နယ်စပ်ရေးရာဝန်ကြီးနှင့် တာဝန်ရှိသူများက အဆိုပါလမ်းတစ်လျှာက်ကို ကြည့်ရှု့စစ်ဆေးခဲ့ကြောင်း သိရသည်။

အဆိုပါလမ်းကို တိုင်းဒေသကြီးဘတ်ဂျက်၊ စည်ပင်သာယာရေးအဖွဲ့ရန်ပုံငွေဖြင့် ကုန်ကျငွေ(၁၅.၅၉)ကျပ်သန်းဖြင့် အလျား (၆၉၈)ပေ၊ အကျယ်(၁၀)ပေ၊ ထု(၆) လက်မဖြင့် မြို့နယ်စည်ပင်သာယာရေးအဖွဲ့က တာဝန်ယူတည်ဆောက်ပြီးစီးခဲ့သည့် လမ်းဖြစ်ကြောင်းသိရသည်။

ဆက်လက်၍ လုံခြုံရေးနှင့်နယ်စပ်ရေးရာဝန်ကြီးနှင့်အဖွဲ့သည် လေးအိမ်ကုန်းကျေးရွာအုပ်စုရှိ တောင်သူဦးသန်းမြင့်စိုး လယ်(၅၅)ဧကတွင် နိုင်ငံစီးပွားမြှင့်တင်ရေး ရန်ပုံငွေဖြင့် နွေစပါးစိုက်ပျိုးလျက်ရှိသည့် တောင်သူများအား ယူရီးယားဓာတ်မြေသြဇာစနစ်တကျသုံးစွဲရေး နည်းပညာပေးဟောပြောပွဲနှင့် မြေသြဇာကြဲပက်ပွဲအခမ်းအနားကို သွားရောက်ကြည့်ရှုအားပေး၍ လိုအပ်သည်များ မှာကြားခဲ့ကြောင်း သိရသည်။

အေဇာလင်း

https://t.me/MyanmarNationalPost