သံတွဲမြို့၌ တိပိဋကဓရ ၊ တိပိဋကကောဝိဒ၊ ဓမ္မဘဏ္ဍာကာရိက၊ သုတဗုဒ္ဓသာသနာ့အာဇာနည်(၈)ပါး ပူဇော်ပွဲကျင်းပရေးညှိနှိုင်းဆွေးနွေး

MNP  -  ဇန်နဝါရီ ၁၅

ရခိုင်ပြည်နယ်၊ သံတွဲမြို့နှင့် ငပလီမြို့သူ/ မြို့သားများစုပေါင်းကျင်းပမည့် တိပိဋကဓရ ၊ တိပိဋကကောဝိဒ၊ ဓမ္မဘဏ္ဍာကာရိက၊ သုတဗုဒ္ဓသာသနာ့အာဇာနည်(၈)ပါး ပူဇော်ပွဲ ကျင်းပရေး ညှိနှိုင်းဆွေးနွေး ပွဲကို ယမန်နေ့ မွန်းလွဲ ၂ နာရီက သံတွဲခရိုင်လူထုအခြေပြုဗဟိုဌာန( Community Centre)၌ ကျင်းပပြုလုပ်သည်။

ရှေးဦးစွာ အခမ်းအနားကို နမောတသ(၃)ကြိမ်ရွက်ဆို ဘုရားကန်တော့၍ဖွင့်လှစ်ပြီး နာယက ဦးအောင်သန်းတင်က အဖွင့်အမှာစကားပြောကြားသည်။ ထို့နောက် ငပလီမြို့ မြို့မိမြို့ဖ ဦးဖိုးရီအောင်က ပူဇော်ပွဲကျင်းပရေးနှင့် အလှူငွေရရှိမှုအခြေအနေများကိုရှင်းလင်းပြောကြားခဲ့သည်။ ဆက်လက်၍ အစည်းအဝေးတက်ရောက်လာကြသူများမှ ပူးပေါင်းဆွေးနွေးကြကာ ပူဇော်ပွဲကျင်းပရေးကော်မတီများကိုဖွဲ့စည်းခဲ့ကြပြီး အခမ်းအနားကို ဗုဒ္ဓသာသနံစိရံတိဠတု(၃)ကြိမ် ရွက်ဆိုဆုတောင်း၍ အောင်မြင်စွာပြီးမြောက်ခဲ့သည်။

အဆိုပါပူဇော်ပွဲတွင် တိပိဋကဓရ ၊ တိပိဋကကောဝိဒ၊ ဓမ္မဘဏ္ဍာကာရိက၊ သုတဗုဒ္ဓသာသနာ့အာဇာနည်(၈)ပါးဖြစ်သည့် အရှင်ဝါယာမိန္ဒာဘိဝံသ၊ အရှင်သီလလက္ခန္ဓာဘိဝံသ၊ အရှင်ဝံသပါလာလင်္ကာရ၊ အရှင်သုန္ဒရ၊ အရှင်ဣန္ဒပါလ၊ အရှင်ဣန္ဒာစရိယ၊ အရှင်ဝီရိယာနန္ဒ၊ အရှင်ပညာဝံသာလင်္ကာရာဘိဝံသ စသည့် ဆရာတော်(၈)ပါးတို့အားပင့်ဖိတ်၍ ၂၀၂၃ ခုနှစ် ဖေဖေါ်ဝါရီလ ၁၉ ရက်နေ့တွင် ပူဇော်ပွဲကျင်းပပြုလုပ်မည်ဖြစ်ပြီး ၁၇/၁၈ ရက်များတွင် ညတရားပွဲများဖြင့် သံတွဲမြို့၊ နန်းချောင်းကျေးရွာရှိ သံတွဲ -ငပလီလမ်းပေါ်ရှိ  ဦးမြင့်လှိုင် ၏ ပန်းခြံအတွင်း၌ စည်ကားသိုက်မြိုက်စွာကျင်းပရန် စီစဉ်လျက်ရှိကြောင်း ပူဇော်ပွဲကျင်းပရေး ကော်မတီထံမှ သိရှိရသည်။

https://t.me/MyanmarNationalPost