MNP - ဇန်နဝါရီ ၁၄
ရခိုင်ပြည်နယ် မာန်အောင်မြို့ မြို့မကျောင်းကြီးဆရာတော်ဘဒ္ဒန္တဣဿရိယ သက်တော်(၇၇)နှစ်၊ဝါတော်(၅၇)၏အန္တိမအဂ္ဂိစျာပနပူဇာသာဓုဏီဠနပွဲတော်အောင်မြင်စွာကျင်းပနိုင်ရေးအတွက် အစည်းအဝေးကို ယနေ့မွန်လွဲ၁နာရီက မြို့မကျောင်းကြီး၌ကျင်းပခဲ့သည်။
အစည်းအဝေးပွဲကို သံဃာတော်များနှင့်တက်ရောက်လာသူများက``နမောတဿ´´သုံးကြိမ်ရွတ်ဆိုဘုရားကန်တော့ ဖွင့်လှစ်ကြပြီးအန္တိမအဂ္ဂိစျာပနပူဇာ ကျင်းပရေးကော်မတီ ဥက္ကဋ္ဌဦးမြဒင်က ဆရာတော်ကြီး၏အန္တိမအဂ္ဂိစျာပနပူဇာသာဓုဏီဠနပွဲတော်အောင်မြင်စွာ ကျင်းပနိုင်ရေးအတွက် အစည်းအဝေးခေါ်ယူရခြင်းဖြစ်ကြောင်း၊ယခုအခါအန္တိမအဂ္ဂိစျာပနကျင်းပရေးကော်မတီမှဦးဆောင်ပြီးလုပ်ငန်းများဆောင်ရွက်လျက်ရှိရာတော်တော်များများ ပြီးစီးနေပြီဖြစ်ပါကြောင်း၊မြို့ပေါ်၅ရပ်ကွက်မှအစည်းအဝေးသို့တက်ရောက်လာသူများမှ လိုအပ်ချက်များရှိပါက ပွဲတော်အောင်မြင်စွာကျင်းပနိုင်ရေးအတွက် အပြုသဘောဖြင့် အကြံပြုဆွေးနွေးပေးစေလိုကြောင်း ပြောကြားသည်။
ထို့နောက် မောင်းမကံကျောင်းဆရာတော်ဘဒ္ဒန္တဥက္ကံသ၊မကျည်းကုန်းကျောင်း ဆရာတော်ဘဒ္ဒန္တတေဇနှင့်ကုန်းတန်းကျောင်း ဆရာတော်ဘဒ္ဒန္တစန္ဒတို့ကဆရာတော်ကြီး၏ ဂုဏ်ကျေးဇူးကို အာရုံပြုပြီး ပွဲတော်အောင်မြင်စွာ ကျင်းပနိုင်ရေးအတွက် စည်းလုံးညီညွတ်စွာဖြင့်ညှိနှိုင်းတိုင်ပင်လုပ်ဆောင်ကြစေလိုကြောင်း သြဝါဒ ကထာမြွတ်ကြားကြသည်။
ထို့နောက်ပွဲတော်တွင်လွန်ဆွဲပြိုင်ပွဲ၊ချောတိုင်တက်ပြိုင်ပွဲ၊ခေါင်းအုံးရိုက်ပြိုင်ပွဲကျင်းပနိုင်ရေးအတွက်အားကစားပြိုင်ပွဲကော်မတီဖွဲ့စည်းခြင်း၊ကျန်းမာရေးစောင့်ရှောက်နိုင်ရန်အတွက် ကျန်းမာရေးကော်မတီဖွဲ့စည်းခြင်းနှင့်လုံခြုံရေးကော်မတီဖွဲ့စည်းခြင်းများဆောင်ရွက်ကြပြီး ဆရာတော်ကြီး၏ဥတုဇရုပ်ကလာပ်တော်အား မြို့မကျောင်းကြီးဓမ္မာရုံ ကြာကလာပ်ပေါ်မှအန္တိမအဂ္ဂိစျာပနကျင်းပရာ အနောက်စုရပ်ကွက်ဘောလုံးကွင်းသို့ပင့်ဆောင်ရာတွင် ဆောင်ရွက်ရမည့် အစီအစဥ်များကို ညှိနှိုင်းဆွေးနွေးကြရာ တက်ရောက်လာသူများက အကြံပြုဆွေးနွေးကြ ပြီးအစည်းအဝေးကို``ဗုဒ္ဓသာသနံစိရံတိဋ္ဌတု´´သုံးကြိမ်ရွတ်ဆိုပြီးဆုံးခဲ့သည်။
အဆိုပါ မာန်အောင်မြို့ မြို့မကျောင်းကြီးဆရာတော်ဘဒ္ဒန္တဣဿရိယ၏ အန္တိမ အဂ္ဂိစျာပနပူဇာ သာဓုဏီဠနပွဲတော်ကို၁၃၈၄-ခုနှစ်တပို့တွဲလဆန်း၁၄/၁၅၊လဆုတ်၁ရက်၊၂၀၂၃ခုနှစ်၊ဖေဖေါ်ဝါရီလ၃/၄/၅ရက်၊သုံးရက်တိုင်တိုင် ရတနာဦးဇာတ်အလှသဘင်ဖြင့် ကပြ ဖျော်ဖြေ ပူဇော်ကျင်းပသွားမည် ဖြစ်ကြောင်းအန္တိမအဂ္ဂိစျာပန ပူဇာကျင်းပရေး ကော်မတီထံမှသိရသည်။
ဦးသိန်းဖေ
https://t.me/MyanmarNationalPost
No comments:
Post a Comment