MNP - ဇန်နဝါရီ ၆
မန္တလေးတိုင်းဒေသကြီး၊ စဉ့်ကူးမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနက ၂၀၂၂-၂၀၂၃ ဘဏ္ဍရေးနှစ်တွင် ကျေးရွာဖွံ့ဖြိုးတိုးတက်ရေးလုပ်ငန်းစီမံကိန်း(VDP)အား မူလကျေးရွာ (၄)ရွာအပြင် ထပ်တိုးဆောင်ရွက်မည့် ကျေးရွာ(၄)ရွာအတွက် ရန်ပုံငွေလွှဲပြောင်းပေးအပ်ပွဲ အခမ်းအနားကို ယနေ့နံနက် (၁ဝ)နာရီက စဉ့်ကူးမြို့နယ် ကျေးလက်ဒေသ ဖွံ့ဖြိုးတိုးတက်ရေးဦးစီးဌာနရုံး အစည်းအဝေးခန်းမတွင် ကျင်းပခဲ့သည်။
ရှေးဦးစွာ စဉ့်ကူးမြို့နယ်စီမံအုပ်ချုပ်ရေးအဖွဲ့ ဥက္ကဌ မြို့နယ်အုပ်ချုပ်ရေးမှူး ဦးထွန်းကျော်နိုင်က ဒေသဖွံ့ဖြိုးတိုးတက်ရေးလုပ်ငန်းစီမံကိန်းနှင့် ပတ်သက်၍ အဖွင့်အမှာစကားပြောကြားခဲ့ပြီး စဉ့်ကူးမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဦးနိုင်အောင်စိုး က စီမံကိန်း လုပ်ငန်းများလုပ်ဆောင်ရာတွင် ကျေးရွာစိတ်ဓာတ်ကို အခြေခံ၍ဆောင်ရွက်ရန်နှင့် စီမံကိန်း လုပ်ငန်းများ ဆောင်ရွက်ပြီးသည့်အခါ ရေရှည်တည်တံ့ခိုင်မြဲရေးအတွက် ထိန်းသိမ်း စောင့်ရှောက် သွားကြရန် လိုအပ်ကြောင်း ရှင်းလင်း ပြောကြားခဲ့သည်။
ထို့နောက် စဉ့်ကူးမြို့နယ်စီမံအုပ်ချုပ်ရေးအဖွဲ့ ဥက္ကဌ ဦးထွန်းကျော်နိုင်၊ စဉ့်ကူးမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး နှင့် ဌာနဆိုင်ရာတာဝန်ရှိသူများက ကျေးရွာဖွံ့ဖြိုးတိုးတက်ရေးလုပ်ငန်းစီမံကိန်း(VDP) ထပ်တိုးဆောင်ရွက်မည့် စားကျက်ကြီးကျေးရွာ၊ ညောင်ကုန်းကျေးရွာ၊ ဆည်သည်တောင်ကျေးရွာနှင့် ထီးကုန်းကျေးရွာတို့မှ ကျေးရွာကော်မတီများ လက်ဝယ်သို့ ကျေးရွာတစ်ရွာလျှင် ငွေကျပ် သိန်း(၁၀၀)စီအား လွှဲပြောင်းပေးအပ်ခဲ့ကြကြောင်း စဉ့်ကူးမြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဦးနိုင်အောင်စိုး ထံမှ သိရသည်။
တင်ဇာလွင်
https://t.me/MyanmarNationalPost
No comments:
Post a Comment