MNP - ဇန်နဝါရီ ၉
ရခိုင်ပြည်နယ်၊ ကျောက်ဖြူမြို့၌ အိမ်ထောင်စုလူဦးရေစာရင်း မှန်ကန်မှုရှိစေရေးအတွက် မြေပြင် ကွင်းဆင်းစာရင်းကောက်ယူရေးအဖွဲ့ (Working Group)မှ ယနေ့ နံနက်ပိုင်းက မြို့နယ်အတွင်းရှိ ရပ်ကွက်/ ကျေးရွာအုပ်စုများအလိုက် တစ်အိမ်တက်ဆင်းသွားရောက်ကာ ကွင်းဆင်းစာရင်းကောက်ယူခြင်း လုပ်ငန်း များကို ဆောင်ရွက်ခဲ့သည်။
ထိုသို့ဆောင်ရွက်ရာတွင် မြေပြင်ကွင်းဆင်းစာရင်းကောက်ယူရေးအဖွဲ့ (Working Group) သည် မိမိတို့တာဝန်ကျသည့် သက်ဆိုင်ရာ ရပ်ကွက်များနှင့် ကျေးရွာအုပ်စုများသို့သွားရောက်ပြီး အိမ်ထောင်စု လူဦးရေစာရင်းနှင့် မြေပြင်ရှိလူဦးရေစာရင်းများအား တိုက်ဆိုင်စစ်ဆေးခြင်း၊ လူဦးရေစာရင်းများမှန်ကန် တိကျမှုရှိစေရေး တစ်အိမ်တက်ဆင်း ကွင်းဆင်းစာရင်းကောက်ယူလျက်ရှိသည်။ ယင်းသို့ ကွင်းဆင်းစာရင်း ကောက်ယူနေမှုအား မြို့နယ်မြေပြင်ကွင်းဆင်းစာရင်းကောက်ယူရေးကြီးကြပ်မှုကော်မတီအဖွဲ့ အတွင်းရေး မှူး ဦးအောင်ကြည်ဦးနှင့် အဖွဲ့ဝင်များက လှည့်လည်ကြည့်ရှုစစ်ဆေးပြီး လိုအပ်သည်များကို ပေါင်းစပ် ညှိနှိုင်းဆောင်ရွက်ပေးခဲ့သည်။
ကျောက်ဖြူမြို့နယ်၌ အိမ်ထောင်စုလူဦးရေစာရင်း မှန်ကန်မှုရှိစေရေးအတွက် မြို့ပေါ်ရပ်ကွက်(၁၇) ရပ်ကွက်၊ ကျေးရွာအုပ်စု(၅၂)အုပ်စုနှင့် စနဲမြို့ရှိ (၅)ရပ်ကွက်သို့ မြေပြင်ကွင်းဆင်းစာရင်းကောက်ယူရေး အဖွဲ့ပေါင်း(၁၃၃)ဖွဲ့ဖြင့် အိမ်ထောင်စုလူဦးရေစာရင်း ကောက်ယူမှုများကို ဇန်နဝါရီ ၉ ရက်နေ့မှ ၂၈ ရက်နေ့အထိ (၂၀)ရက်ကြာ ကောက်ယူသွားမည်ဖြစ်ကြောင်း လူဝင်မှုကြီးကြပ်ရေးနှင့်ပြည်သူ့အင်အား ဝန်ကြီးဌာန ကျောက်ဖြူမြို့နယ်ဦးစီးမှူး ထံမှ သိရသည်။
တင်ထွန်းဦး၊ ဖြိုးဝေလင်း
https://t.me/MyanmarNationalPost
No comments:
Post a Comment