MNP - ဖေဖော်ဝါရီ ၁၄
ပဲခူးတိုင်းဒေသကြီး၊ ညောင်လေးပင်ခရိုင်၊ ညောင်လေးပင်မြို့နယ်၊ ဘူတာရုံတွင် ဖြစ်ပွားခဲ့သော ဗုံးပေါက်ကွဲမှုကြောင့် သေဆုံးသူများနှင့် ဒဏ်ရာရရှိသူများအားယမန်နေ့ မွန်းလွဲ ၃နာရီခွဲအချိန်က ပဲခူးတိုင်းဒေသကြီးအစိုးရအဖွဲ့ဝန်ကြီးချုပ်၊ တောင်ပိုင်းတိုင်းစစ်ဌာနချုပ်တိုင်းမှူး၊ တိုင်းဒေသကြီးလုံ/ နယ်ဝန်ကြီး၊ လူမှုရေးရာလမ်းပန်းဆက်သွယ်ရေးဝန်ကြီးနှင့်အဖွဲ့ဝင်များ၊ ညောင်လေးပင်ခရိုင်အထွေထွေအုပ်ချုပ်ရေးဦးစီးဌာနနှင့် မြို့နယ်အထွေထွေအုပ်ချုပ်ရေးဦးစီးဌာနတို့မှ ညောင်လေးပင်ပြည်သူ့ဆေးရုံကြီးတွင် ထောက်ပံ့ပေးအပ်ခဲ့ကြောင်း သိရသည်။
ထောက်ပံ့ပေးအပ်ရာတွင် ပေါက်ကွဲမှုကြောင့် သေဆုံးခဲ့သူ(၃)ဦးအား တစ်ဦးလျှင်(၁၀)သိန်းကျပ်၊ မျက်စိထိခိုက်ပျက်စီးသွားသူတစ်ဦးအား(၁၀)သိန်းကျပ်နှင့် လူသုံးကုန်ပစ္စည်းများ၊ အခြားဒဏ်ရာရရှိသူ(၈)ဦးအား တစ်ဦးလျှင်(၅)သိန်းကျပ်နှင့် လူသုံးကုန်ပစ္စည်းများကို ပဲခူးတိုင်းဒေသကြီးအစိုးရအဖွဲ့ဝန်ကြီးချုပ်၊ တောင်ပိုင်းတိုင်းစစ်ဌာနချုပ်တိုင်းမှူး၊ တိုင်းဒေသကြီးလုံ/ နယ်ဝန်ကြီး၊ လူမှုရေးရာလမ်းပန်းဆက်သွယ်ရေးဝန်ကြီးနှင့်အဖွဲ့ဝင်များမှ ထောက်ပံ့ပေးအပ်ခဲ့ပြီး ညောင်လေးပင်ခရိုင်အထွေထွေအုပ်ချုပ်ရေးဦးစီးဌာနနှင့် မြို့နယ်အထွေထွေအုပ်ချုပ်ရေးဦးစီးဌာနတို့မှ ဒဏ်ရာရရှိသူများအား စားသောက်ဖွယ်ရာများ၊ဆေးဝါးနှင့်အသုံးအဆောင် ပစ္စည်း(၉)မျိုးအား ထောက်ပံ့ပေးအပ်ခဲ့ကြောင်း သိရသည်။
ဆက်လက်ပြီး ပဲခူးတိုင်းဒေသကြီးအစိုးရအဖွဲ့ ဝန်ကြီးချုပ်နှင့်အဖွဲ့ဝင်များက ဗုံးပေါက်ကွဲမှုကြောင့် ပျက်စီးသွားသည့်နေရာများအား လိုက်လံကြည့်ရှုစစ်ဆေးခဲ့ပြီး ညောင်လေးပင်ခရိုင် အထွေထွေအုပ်ချုပ်ရေးဦးစီးဌာနသို့ရောက်ရှိကာ လိုအပ်သည်များမှာကြားခဲ့ကြောင်း သိရသည်။
https://t.me/MyanmarNationalPost
No comments:
Post a Comment