MNP - ဖေဖော်ဝါရီ ၂
စစ်ကိုင်းတိုင်းဒေသကြီး၊ ကသာခရိုင် စီမံအုပ်ချုပ်ရေးအဖွဲ့နှင့် ခရိုင်အဆင့် ဌာနဆိုင်ရာများ၏ လုပ်ငန်းညှိနှိုင်းအစည်းအဝေးကို ယနေ့နံနက် (၁၀)နာရီအချိန်က ခရိုင်အထွေထွေ အုပ်ချုပ်ရေးဦးစီးဌာန အစည်းအဝေးခန်းမတွင် ပြုလုပ်ဆောင်ရွက်ခဲ့သည်။
အစည်းအဝေးတွင် ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးထွန်းကျော်ကျော်က အဖွင့်အမှာစကား ပြောကြားရာ၌ ခရိုင်အဆင့် ဌာနဆိုင်ရာများအနေဖြင့် ခရိုင်အတွင်းရှိ မိမိတို့ရုံးဌာနနှင့် ဝန်ထမ်းများ၏ လုံခြုံရေးအခြေအနေများ၊ ဌာနဆိုင်ရာများအနေဖြင့် တာဝန်ကျရာဒေသအတွင်း တာဝန်ထမ်းဆောင်မှု အခြေအနေများ၊၂၀၂၂-၂၀၂၃ ဘဏ္ဍာနှစ်ကုန်ဆုံးတော့မည် ဖြစ်သည့်အတွက် ဌာနအလိုက် အခွန်အခ ကောက်ခံမှု၊ အခွန်ကြွေးကျန်၊ ချေးငွေကြွေးကျန်များ ကောက်ခံမှုတို့ကို အားစိုက်၍ ကြိုးစားဆောင်ရွက်ကြစေလိုကြောင်းနှင့် (၇၆)နှစ်မြောက် ပြည်ထောင်စုနေ့ အခမ်းအနား ကျင်းပရေးတို့ကိုညှိနှိုင်း ဆောင်ရွက်ကြရန် မှာကြားခဲ့သည်။
ဆက်လက်၍ အခွန်အခကြွေးကျန်နှင့် ချေးငွေကြွေးကျန်ကောက်ခံရရှိမှု အခြေအနေများ၊ တည်ဆောက်ရေးလုပ်ငန်းများတွင် ပြည်ထောင်စုရန်ပုံငွေ၊ တိုင်းဒေသကြီးရန်ပုံငွေတို့ဖြင့် ဆောက်လုပ်နေမှုများ၊ ခရိုင်အတွင်းစိုက်ပျိုးရေး၊ မွေးမြူရေး၊ ပညာရေး၊ ကျန်းမာရေးနှင့် ပန်းခင်းစီမံချက်ဖြင့် ဆောင်ရွက်နေမှု အခြေအနေများတို့ကို သက်ဆိုင်ရာ ဌာနအသီးသီးတို့က ရှင်းလင်းတင်ပြကြသည်။
ထို့နောက် ခရိုင်စီမံအုပ်ချုပ်ရေးအဖွဲ့ဝင်များက ရှင်းလင်းတင်ပြချက်များနှင့် စပ်လျဉ်း၍ ဖြည့်စွက် အကြံပြုတင်ပြကြပြီး ခရိုင်စီမံအုပ်ချုပ်ရေးအဖွဲ့ဥက္ကဋ္ဌက နိဂုံးချုပ်အမှာစကား ပြောကြားရာတွင် ဌာနဆိုင်ရာများအနေဖြင့် မိမိတို့၏ ပင်မဌာနလုပ်ငန်းတာဝန်များအပြင် စီမံချက်များဖြင့် ဆောင်ရွက်နေသော လုပ်ငန်းများကို အချိန်မီပြီးစီးအောင် စေတနာထား ကြိုးပမ်းဆောင်ရွက် ကြရန် တိုက်တွန်းမှာကြားခဲ့ကြောင်း သိရှိရသည်။
https://t.me/MyanmarNationalPost
No comments:
Post a Comment