ဝိုင်းမော်မြို့နယ်အတွင်းရှိ “ကန်ပိုက်တီ” မြို့အား“ကံပိုင်တည်” မြို့အဖြစ် အမည်ပြောင်းလဲပြင်ဆင်

MNP   -    ဖေဖော်ဝါရီ ၂၁

ကချင်ပြည်နယ် မြစ်ကြီးနားခရိုင် ဝိုင်းမော်မြို့ နယ်အတွင်းရှိ “ကန်ပိုက်တီ”မြို့ကို ပြည်ထဲရေးဝန်ကြီးဌာန၏ ၂၀၂၃ ခုနှစ် ဖေဖော်ဝါရီ(၁၄) ရက်စွဲပါ အမိန့် ကြော်ငြာစာအမှတ်(၁၁၀/၂၀၂၃)ဖြင့် “ကံပိုင်တည်” မြို့အဖြစ် အမည်ပြောင်းလဲပြင်ဆင်ဖွဲ့စည်းခဲ့သည်။

ကန်ပိုက်တီမြို့သည် တရုတ်ပြည်သူ့သမ္မတနိုင်ငံနှင့် နယ်နိမိတ်ချင်းထိစပ်နေသော နယ်စပ်မြို့တစ်မြို့ဖြစ်ပြီး တရုတ်ပြည်သူ့သမ္မတနိုင်ငံဘက်မှ တရုတ်ဘာသာစကားဖြင့် အဓိပ္ပာယ်ဖွင့်ဆိုရာတွင် “ကန်းပိုင်တီ”၊ “ကန်း=ခြောက်သွေ့ခြင်း၊ ပိုင်= ပျက်စီးခြင်း၊ တီ=နေရာ”ဟု အဓိပ္ပာယ်ဖွင့်ဆိုထားသဖြင့် မြန်မာစာလုံးပေါင်း သတ်ပုံကျမ်း ပါ “ကံ=ကံကောင်းခြင်း၊ ပိုင်= ပြည်ထောင်စုကပိုင်ဆိုင်ခြင်း၊ တည်=တည်ငြိမ်ခြင်း၊ တည်တံ့ ခြင်း၊ တည်ရှိခြင်း”ဟူသော ကျက်သရေမင်္ဂလာအဖြာဖြာနှင့် ပြည့်စုံသည့် “ကံပိုင်တည်” ဟူသောအမည်အား မြန်မာနိုင်ငံတစ်ဝန်းတစ်ပြေးညီသုံးစွဲနိုင်စေရန် မြို့နေပြည်သူလူထုများ၊ မြို့မိမြို့ဖများ၏ သဘောထားများဖြင့် ကချင်အထူး ဒေသ(၁) ထာဝရငြိမ်းချမ်းရေးအဖွဲ့ချုပ်ဥက္ကဋ္ဌ ဦးဇခုန်တိန့်ယိန်း က ကချင်ပြည်နယ်အစိုးရအဖွဲ့ ဝန်ကြီးချုပ်၏ သဘောထားထောက်ခံချက်ဖြင့် နိုင်ငံတော်စီမံအုပ်ချုပ်ရေးကောင်စီရုံးသို့ တင်ပြခဲ့မှုအပေါ် လုပ်ထုံးလုပ်နည်းများနှင့်အညီ စိစစ်ဆောင်ရွက်ခဲ့ကာ ယခုကဲ့သို့ အမည်ပြောင်းလဲပြင်ဆင်ခဲ့ခြင်းဖြစ်သည်။

“ကံပိုင်တည်” မြို့သည် မြန်မာ-တရုတ် နယ်စပ်ကုန်သွယ်ရေးစခန်းတည်ရှိသောကြောင့် မကြာမီကာလတွင် ပြည်ထောင်စု၏ဖွံ့ဖြိုးတိုးတက်သော နယ်စပ်မြို့တစ်မြို့အဖြစ် မြင်တွေ့ကြရတော့မည်ဖြစ်သည်။

ကချင်ပြည်နယ် မြစ်ကြီးနားခရိုင် ဝိုင်းမော်မြို့နယ်အတွင်းရှိ “ကန်ပိုက်တီ”မြို့ကို ပြည်ထဲရေးဝန်ကြီးဌာန၏ ၂၀၁၁ ခုနှစ် ဇန်နဝါရီ(၁၂) ရက်စွဲပါ အမိန့်ကြော်ငြာစာဖြင့် ရပ်ကွက်သုံးရပ်ကွက်ဖြင့် ဖွဲ့စည်းခဲ့ပြီး မြို့တစ်မြို့၊ ရပ်ကွက်သုံးရပ်ကွက်၊ ကျေးရွာအုပ်စုသုံးအုပ်စု၊ ကျေးရွာ ၃၀ တို့ဖြင့် ကန်ပိုက်တီမြို့နယ်ခွဲအဖြစ် စတင်ဖွဲ့စည်းခဲ့သည်။

၂၀၀၈ ခုနှစ်၊ ဖွဲ့စည်းပုံအခြေခံဥပဒေပုဒ်မ ၅၁ ပါပြဋ္ဌာန်းချက်နှင့် အညီဖြစ်စေရန် မြို့နယ်ခွဲစကား ရပ်အားပယ်ဖျက်၍ ပြည်ထဲရေးဝန်ကြီးဌာနမှ ၂၀၁၄ ခုနှစ်၊ မေ ၂၂ ရက်တွင် “မြို့”အဖြစ် ပြင်ဆင် ဖွဲ့စည်းခဲ့သဖြင့် “ကန်ပိုက်တီမြို့” အဖြစ် တည်ရှိလာခဲ့သည်။

ကန်ပိုက်တီမြို့သည် ယခင်ကဝိုင်းမော်မြို့နယ်၊ ဝေါ့ချုံးကျေးရွာအုပ်စုအတွင်းပါဝင်သော ကျေးရွာငယ်တစ်ခုဖြစ်ခဲ့ပြီး ပင်လယ်ရေမျက်နှာပြင်အထက် ၆၅၃၄ ပေ တွင်တည်ရှိကာ မြို့ဧရိယာမှာ ၂၀၈ ဒသမ ၅၉ စတုရန်းမိုင် ကျယ်ဝန်းကြောင်း သိရသည်။

 https://t.me/MyanmarNationalPost