ရခိုင်ပြည်နယ် တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးဆိုင်ရာလုပ်ငန်းများ ညှိနှိုင်းပေါင်းစပ်ရေးကော်မတီဥက္ကဋ္ဌ ဒုတိယဗိုလ်ချုပ်ကြီးထွန်းထွန်းနောင် IDPs စခန်းများ ကြည့်ရှုစစ်ဆေး

MNP   -     ဖေဖော်ဝါရီ ၉

ရခိုင်ပြည်နယ် တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးဆိုင်ရာ လုပ်ငန်းများညှိနှိုင်းပေါင်းစပ်ရေးကော်မတီဥက္ကဋ္ဌ နယ်စပ်ရေးရာဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီးထွန်းထွန်းနောင်သည် အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဦးကိုကိုလှိုင်၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ပြည်ထောင်စုဝန်ကြီးဦးမြင့်ကြိုင်၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာသက်သက်ခိုင်၊ ရခိုင်ပြည်နယ်ဝန်ကြီးချုပ်တို့နှင့်အတူ ဖေဖော်ဝါရီ ၈ ရက်နံနက်ပိုင်းက စစ်တွေမြို့ ဘောဒူဖ IDPs စခန်းသို့သွားရောက်၍ စခန်းရှိဘင်္ဂါလီများ၏ နေထိုင်စားသောက်မှုနှင့် ကျန်းမာရေးအခြေအနေတို့ကို လှည့်လည်ကြည့်ရှုစစ်ဆေးကြသည်။

ထို့နောက် ပြည်ထောင်စုဝန်ကြီးများနှင့် ပြည်နယ်ဝန်ကြီးချုပ်တို့သည် ကျောက်ဖြူမြို့ ကျောက်တစ်လုံး IDP စခန်း ပြောင်းရွှေ့နေရာချထားမည့်နေရာသို့ရောက်ရှိရာ ခရိုင်စီမံ အုပ်ချုပ်ရေးအဖွဲ့ဥက္ကဋ္ဌနှင့် ဌာနဆိုင်ရာတာဝန်ရှိသူများက နေအိမ်များဆောက်လုပ်နေမှု၊ ရေ၊ မီး၊ မိလ္လာဆောင်ရွက်ထားရှိမှု၊ ရေဝပ်ဧရိယာများမြေဖို့နေမှု၊ ဆေးပေးခန်းဆောက်လုပ်နေမှု၊ စခန်းအဝင်မြေသားလမ်းနှင့် Box Culvert ဆောက်လုပ်နေမှု၊ ကျေးရွာ ခန်းမတည်ဆောက်နေမှုနှင့် စာသင်ကျောင်းများဆောက်လုပ်နေမှုအခြေအနေများကို ရှင်းလင်းတင်ပြကြရာ ပြည်ထောင်စုဝန်ကြီးများက လုပ်ငန်းများကိုမတ်လကုန်တွင် ပြီးစီးအောင်ဆောင်ရွက်ကြရန်နှင့် ဖြည့်စွက်ဆောင်ရွက်ရန် လိုအပ်သည်များကိုမှာကြားခဲ့ပြီး ကျောက်တစ်လုံး IDP စခန်း အတွင်း လှည့်လည်ကြည့်ရှုစစ်ဆေးကြသည်။

ယင်းနောက် ပြည်ထောင်စုဝန်ကြီးများနှင့် ပြည်နယ်ဝန်ကြီးချုပ်တို့သည် ကျောက်ဖြူ ၁၃၅ မဂ္ဂါဝပ်သဘာဝဓာတ်ငွေ့နှင့် စွန့်ပစ်အပူသုံးဓာတ်အားပေးစက်ရုံစီမံကိန်းသို့ ရောက်ရှိကြရာ Supreme Company ဒါရိုက်တာ ဦးအောင်ကျော်မင်းက Power China Resource Company နှင့် တိုင်းရင်းသားပိုင် Supreme Company တို့ပူးပေါင်း၍ စီမံကိန်းဆောင်ရွက်နေမှုနှင့် ကျောက်ဖြူ -CCGT Power Plant နှင့် ပေါင်းစပ်ဆောင်ရွက်မည့် နေရောင်ခြည်စွမ်းအင်သုံးစံပြ Hybrid လျှပ်စစ်ဓာတ်အားပေးစက်ရုံစီမံကိန်းလျာထားမှုများကို ရှင်းလင်းတင်ပြရာ ပြည်ထောင်စုဝန်ကြီးများက ဆွေးနွေးမေးမြန်း၍ စီမံကိန်းဆောင်ရွက်မှုအခြေအနေများကို ကြည့်ရှုလေ့လာခဲ့ကြသည်။

ဆက်လက်၍ ပြည်ထောင်စုဝန်ကြီးများနှင့် ပြည်နယ်ဝန်ကြီးချုပ်တို့သည် ကျောက်ဖြူမြို့ နယ်စပ်ဒေသတိုင်းရင်းသားလူငယ်များ စက်မှုလက်မှုပညာသင်တန်းကျောင်းသို့ရောက်ရှိခဲ့ပြီး ဖွင့်လှစ်လျက်ရှိသည့် လျှပ်စစ်၊ ဆောက်လုပ်ရေး၊ မော်တော်ယာဉ်စက်ပြင်၊ လက်ကိုင်ဖုန်းပြင်နှင့် အခြေခံစက်ပြင်သင်တန်းများသင်ကြားပေးနေမှုကို ကြည့်ရှုခဲ့ကြပြီး လိုအပ်သည်များ ဖြည့်ဆည်းဆောင်ရွက်ပေးခဲ့သည်။

ထို့နောက် ပြည်ထောင်စုဝန်ကြီးများနှင့် ပြည်နယ်ဝန်ကြီးချုပ်တို့သည် မာန်အောင်ဟိုတယ်၌ ကျင်းပသည့် လူမှုစီးပွားဖွံ့ဖြိုးတိုးတက်ရေးတွေ့ဆုံပွဲသို့တက်ရောက်ပြီး မာန်အောင်မြို့နယ်ရှိ ဌာနဆိုင်ရာများ၊ လုပ်ငန်းရှင်များ၊ မြို့မိမြို့ဖများနှင့်တွေ့ဆုံကာ မာန်အောင်မြို့နယ်ဖွံ့ဖြိုးရေး အတွက် လူမှုရေး၊ စီးပွားရေး၊ စိုက်ပျိုးရေး၊ လမ်းပန်းဆက်သွယ်ရေး၊ လျှပ်စစ်မီးလိုအပ်ချက်နှင့် အခြေခံအဆောက်အအုံလိုအပ်ချက်များ ဖြည့်ဆည်းပေးနိုင်ရေး တင်ပြချက်များအပေါ် ပြည်ထောင်စုဝန်ကြီးဒုတိယ ဗိုလ်ချုပ်ကြီးထွန်းထွန်းနောင်က ဆောင်ရွက်ဖြည့်ဆည်းပေးနိုင် မည့်အခြေအနေများကို ညှိနှိုင်းပေါင်းစပ်ပေးခဲ့ပြီး MSME လုပ်ငန်းရှင်များက ခင်းကျင်းပြသထားသည့် ဒေသထွက်ကုန်ပစ္စည်းများကို ကြည့်ရှုလေ့လာကာ ဒေသတွင်း လူမှုစီးပွားဖွံ့ဖြိုးတိုးတက်ရေးအတွက် ပံ့ပိုးပေးနိုင်မည့်အခြေအနေများကို လုပ်ငန်းရှင်များနှင့် ရင်းရင်းနှီးနှီး တွေ့ဆုံဆွေးနွေးခဲ့ကြကြောင်း သိရသည်။

 https://t.me/MyanmarNationalPost