YBS ကားများ စပယ်ယာ ယာဉ်အကူတင်၍ ခရီးသည်များအား အနိုင်ထက်စီးနင်းပြုလုပ်ခြင်း၊ စည်းကမ်းမဲ့စွာ ပြုမူမောင်းနှင်ကြသောကြောင့် ယာဉ်ပေါ်ပါခရီးသည်များသာမက လမ်းပေါ်တွင် မောင်းနှင်သွားလာနေသော ပုဂ္ဂလိက ယာဉ်များကပါ YBS မြင်လျှင် သတိပြု၍ ရှောင်ရှားမောင်းနှင်နေရခြင်းများကို ကြုံတွေ့နေရကြောင်း YRTC ဒုဥက္ကဋ္ဌ ပြော

MNP ၊ ဖေဖော်ဝါရီ ၁၆

ရန်ကုန်တိုင်းဒေသကြီးပုဂ္ဂလိက သယ်ယူပို့ဆောင်ရေးကြီးကြပ်မှုကော်မတီ (YRTC) မှ ကြီးမှူးကျင်းပသော စည်းကမ်းဖောက်ဖျက်သည့် YBS ယာဉ်မောင်းများအား အသိပညာပေး ဆွေးနွေးပွဲ အမှတ်စဉ် (၂/၂၀၂၃) ကို ယနေ့ နံနက် က YRTC ရုံးချုပ် သင်တန်းခန်းမ၌ ကျင်းပပြုလုပ်ခဲ့ပြီး YRTC ဒုတိယဥက္ကဋ္ဌ က  YBS ကားများ စပယ်ယာ ယာဉ်အကူတင်၍ ခရီးသည်များအား အနိုင်ထက်စီးနင်းပြုလုပ်ခြင်း စသည်ဖြင့်စည်းကမ်းမဲ့စွာ ပြုမူမောင်းနှင်ကြသောကြောင့် ယာဉ်ပေါ်ပါခရီးသည်များသာမက လမ်းပေါ်တွင် မောင်းနှင်သွား လာနေသော ပုဂ္ဂလိက ယာဉ်များကပါ YBS မြင်လျှင် သတိပြု၍ ရှောင်ရှားမောင်းနှင်နေရခြင်းများကို ကြုံတွေ့နေရပါကြောင်း ထည့်သွင်းပြောဆိုသွားသည်။

ယင်းဆွေးနွေးပွဲ၌ YRTC ၏ ဒုတိယဥက္ကဋ္ဌ ဦးချစ်ကိုကိုက အဖွင့်အမှာစကား ပြောကြား ခဲ့ရာတွင် ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေး ကော်မတီ (YRTC) တွင် ကျင်းပပြုလုပ်သော ယာဉ်အန္တရာယ်/လမ်းအန္တရာယ်ကင်းရှင်းရေး အသိပညာပေးဆွေးနွေးပွဲကို ပုံမှန်လစဉ်အသိပညာပေးဆွေးနွေးခြင်းနှင့် စည်းကမ်းဖောက်ဖျက်သည့် ယာဉ်မောင်းများကို ခေါ်ယူဆွေးနွေးခြင်းဟူ၍  အပိုင်း (၂) ပိုင်းဖြင့် ပြုလုပ်ကျင်းပပေးလျက်ရှိပြီး  ယနေ့တွင် အကြီးလေးဆုံးပြစ်မှုဖြစ်သည့် မီးနီဖြတ်မောင်းသည့် YBS ယာဉ်မောင်းများကို ခေါ်ယူ၍ တွေ့ဆုံဆွေးနွေးရခြင်းဖြစ်ပါကြောင်း၊ YRTC ၏ အဓိကရည်မှန်းချက်ကြီးဖြစ်သော “ဘေးကင်း လုံခြုံပြီးဝန်ဆောင်မှုကောင်းသည့် အများပြည်သူသယ်ယူပို့ဆောင်ရေးစနစ်” ဖြစ်ထွန်းလာဖို့ YBS စနစ်၏ အဓိကမောင်းနှင်အားမှာ ယာဉ်မောင်းကြီးများဖြစ်ပါကြောင်း၊ ယင်းယာဉ်မောင်းကြီးများ၏ လက်တွင် လမ်းကြောင်းတစ်ခေါက်လျှင် ခရီးသွား ၅၀-၆၀ ခန့်က မိမိတို့၏အသက်များကိုပုံအပ်ပြီး သွားလာနေကြသည်ဖြစ်ရာ မိမိတို့ ယာဉ်မောင်းများသည် ခရီးသွားများအား ကျေးဇူးရှင်များအဖြစ် လိုရာခရီးသို့ဘေးအန္တရာယ်ကင်းစွာပို့ဆောင်ပေးကြရမည့်တာဝန်ရှိကြောင်း၊ ယာဉ်မောင်းများက လမ်းလယ်ခေါင်တွင် ခရီးသည်အတင်အချပြုလုပ်ခြင်း၊ ပြိုင်မောင်း၊ လုမောင်းခြင်း၊ စပယ်ယာ ယာဉ်အကူတင်၍ ခရီးသည်များအား အနိုင်ထက်စီးနင်းပြုလုပ်ခြင်း စသည်ဖြင့်စည်းကမ်းမဲ့စွာ ပြုမူမောင်းနှင်ကြသောကြောင့် ယာဉ်ပေါ်ပါခရီးသည်များသာမက လမ်းပေါ်တွင် မောင်းနှင်သွား လာနေသော ပုဂ္ဂလိက ယာဉ်များကပါ YBS မြင်လျှင် သတိပြု၍ ရှောင်ရှားမောင်းနှင်နေရခြင်းများ ကို ကြုံတွေ့နေရပါကြောင်း၊ မီးနီဖြတ်မောင်းကြသဖြင့် တဖက်ယာဉ်ကြောမှ မီးစိမ်း၍ထွက်လာသော ယာဉ်များဖြင့်ထိပ်တိုက်တွေ့၍ မဖြစ်သင့်သည့်ဆုံးရှုံးမှုများကြုံတွေ့ရခြင်း၊ လမ်းပြောင်းပြန် မောင်းခြင်းကြောင့် အသက်ဆုံးရှုံးရခြင်းတို့ကို ပြီးခဲ့သည့်နှစ်က လှိုင်သာယာ အောင်ဇေယျတံတား အဖြစ်အပျက်နှင့် ယာဉ်/လမ်းAccidents အဖြစ်အပျက်များမှသာဓက ယူသင့်ကြောင်း၊ မီးနီဖြတ်သန်းမောင်းနှင်ခြင်းကို YRTC က လုံးဝ ခွင့်လွှတ်မည်မဟုတ်ကြောင်း၊ စောင့်ကြပ်အ‌ရေး ယူရာတွင် နည်းပညာမြင့် CCTV record များဖြင့် အရေးယူသည့်အတွက် သက်သေခိုင်လုံစွာဖြင့် အရေးယူခံရနိုင်ကြောင်း၊ ယာဉ်မောင်းအဖြစ်မှ ရာသက်ပန် ထုတ်ပယ်သည်အထိ ထိရောက်စွာ အရေးယူမည်ဖြစ်ကြောင်း၊ ယာဉ်မောင်းများသည် ပုတ်ပြတ် (ခေါက်ကြေး) ယူ၍ လုယက်‌ မောင်းနှင်ကြပြီး အခေါက်ရေများများရလိုစိတ်ဖြင့် လောဘတရားများကြီးထွားလာကာ၊ ကျော်တက်မောင်း၍မရလျှင် ဒေါသများထွက်ကာ ရန်လိုစိတ်များဖြင့် ဟွန်းအဆက်မပြတ်တီးခြင်း များဖြစ်လာပြီး မောဟတရားကြောင့် မိမိလုပ်ရပ်ကို မှန်သည်/မှားသည် မခွဲခြားနိုင်တော့ဘဲ စည်းကမ်းမဲ့လုပ်ရပ်များ ဖြစ်ပေါ်လာကြောင်း၊ YRTC က ဂုဏ်ပြုချီးကျူး ထိုက်သည့် ယာဉ်မောင်း ကြီးများကို ဆုချီးမြှင့်ဂုဏ်ပြုပေးနေပြီး စည်းကမ်းဖောက်ဖျက်သည့် ယာဉ်မောင်းကြီးများကိုလည်း ထိထိရောက်ရောက် ကြပ်မတ်နေကြောင်း၊ မိမိတို့ယာဉ်မောင်းကြီးများသည် အများပြည်သူနှင့် တိုက်ရိုက်ထိတွေ့ဆက်ဆံကြရသည်ဖြစ်ရာ လောဘ၊ ဒေါသ၊ မောဟတရားများလျှော့ကာ မိမိတို့၏ကျေးဇူးရှင် ခရီးသွားလုပ်သားပြည်သူများအား စနစ်တကျ ပို့ဆောင်ပေးကြပါရန် မှာကြားလိုကြောင်း၊ အသိတရားဖြင့် ဆင်ခြင်မောင်းနှင်ခြင်းဖြင့် ဒဏ်ရာရ၊ သေဆုံးမှုနှုန်းတစ်ခု ကျဆင်းပါက မိမိတို့တွေ့ဆုံဆွေးနွေးပွဲ လုပ်ရကျိုးနပ်မည်ဖြစ်ကြောင်း၊ YRTC ၏ ရည်မှန်းချက် “Safe Public Transportation To All” ကို သန္ဓိဌာန်ချမှတ်ကာ အများပြည်သူကောင်းကျိုးအတွက်  ဝိုင်းဝန်းဖြည့်ဆည်းပေးစေလိုကြောင်း အမှာစကားပြောကြားခဲ့ပါသည်။  

ဆက်လက်၍ YRTC ၏ တွဲဖက်အတွင်းရေးမှူး ဦးလျန်ကျင့်မန်က ယာဉ်မောင်းများသိသင့် သိထိုက်သည့် ယာဉ်အန္တရာယ်၊ လမ်းအန္တရာယ် ကင်းရှင်းရေးဆိုင်ရာဆွေးနွေးချက်များ၊ တာဝန်ယူမှု တာဝန်ခံမှုရှိသည့် ယာဉ်မောင်းတစ်ယောက်ဖြစ်ရေး လုပ်ဆောင်ရန်အချက်များကို တင်ပြဆွေးနွေးခဲ့သည်။ ထို့နောက် YRTC ၏ တရားလွှတ်တော်ရှေ့နေ ဒေါ်ယဉ်မြင့်နွယ်က ဥပဒေ၊ နည်းဥပဒေ များကို သိရှိနားလည်၍ လေးစားလိုက်နာသည့် ယာဉ်မောင်းကောင်းတစ်ဦးဖြစ်ရန် အချက်များကို တင်ပြဆွေးနွေးခဲ့ကြောင်း သိရသည်။

#MyanmarNationalPost