MNP ၊ မတ် ၁၇
ရန်ကုန်တိုင်းဒေသကြီး၊ သင်္ဃန်းကျွန်းခရိုင်၊ တောင်ဥက္ကလာပမြို့နယ် အမှတ်(၁၀)ရပ်ကွက်၌ ဟေမဝန်ဓမ္မာရုံကြီး၌ သင်္ဃန်းကျွန်းခရိုင်စီမံအုပ်ချုပ်ရေးအဖွဲ့ဥက္ကဋ္ဌဦးထူးလွင်နှင့် မြို့နယ်ဌာနဆိုင်ရာများ၊ ရပ်ကွက်အုပ်ချုပ်ရေးမှူးများ တွေ့ဆုံပွဲအခမ်းအနားကို ယမန့်နေ့နံနက်(၁၀:၀၀)နာရီအချိန်က ကျင်းပခဲ့ကြောင်း သိရသည်။
တွေ့ဆုံပွဲအခမ်းအနားတွင် သင်္ဃန်းကျွန်းခရိုင်စီမံအုပ်ချုပ်ရေးအဖွဲ့ဥက္ကဋ္ဌဦးထူးလွင်မှ တောင်ဥက္ကလာပမြို့နယ်အတွင်း ဖွံ့ဖြိုးရေးလုပ်ငန်းများဆောင်ရွက်မှု စစ်ကြောင်းငါးကြောင်းဖြစ်ဆောင်ရွက်လျက်ရှိသည့်လုပ်ငန်းများ၊ ရပ်ကွက်များအတွင်းရှိ လမ်းများအဆင်ပြေချောမွေ့စွာသွားလာနိုင်ရေး၊ ရပ်ကွက်များအတွင်းရှိ ရေနုတ်မြောင်းများ ပိတ်ဆို့မှုမရှိစေရေး၊ ရေစီးရေလာကောင်းမွန်စေရေး အထူးအလေးထားဆောင်ရွက်ရန်၊ အမှိုက်များစနစ်တကျစွန့်ပစ်နိုင်ရေး စီစဉ်ဆောင်ရွက်၍ ရေနုတ်မြောင်းများတွင် မပိတ်ဆို့စေရန်၊ လုပ်ငန်းများဆောင်ရွက်ရာတွင် လုံခြုံရေးသတိရှိရန်နှင့် ဖွံ့ဖြိုးရေးလုပ်ငန်းများကို အရှိန်အဟုန်မပျက် ဆက်လက်ပူးပေါင်းဆောင်ရွက်ကြရန် အဖွင့်အမှာစကားပြောကြားခဲ့ပါသည်။ ဆက်လက်၍ တက်ရောက်လာကြသော ဌာနဆိုင်ရာတာဝန်ရှိသူများ၊ ရပ်ကွက်အုပ်ချုပ်ရေးမှူးများ၊ ရာအိမ်မှူး၊ ဆယ်အိမ်မှူးများ၊ လမ်းမှူးများမှ ရပ်ကွက်အတွင်း လိုအပ်သည့်အခက်အခဲများ၊ ဆောင်ရွက်နေသည့်လုပ်ငန်းများ ဆက်လက်ဆောင်ရွက်ရမည့် အခြေအနေများကို ရပ်ကွက်အလိုက်ဆွေးနွေးတင်ပြကြရာ သင်္ဃန်းကျွန်းခရိုင်စီမံအုပ်ချုပ်ရေးအဖွဲ့ဥက္ကဋ္ဌနှင့်အဖွဲ့ဝင်များ၊ တောင်ဥက္ကလာပမြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့်အဖွဲ့ဝင်များမှ ပေါင်းစပ်ညှိနှိုင်းဆောင်ရွက် ပေးခဲ့ကြောင်း သိရသည်။
တွေ့ဆုံပွဲအခမ်းအနားသို့ သင်္ဃန်းကျွန်းခရိုင်စီမံအုပ်ချုပ်ရေးအဖွဲ့ဥက္ကဋ္ဌနှင့်အဖွဲ့ဝင်များ၊ တောင်ဥက္ကလာပမြို့နယ် စီမံအုပ်ချုပ်ရေးအဖွဲ့ဥက္ကဋ္ဌနှင့်တာဝန်ရှိသူများ၊ မြို့နယ်အဆင့်ဌာနဆိုင်ရာများ၊ ရပ်ကွက်အုပ်ချုပ်ရေးမှူးနှင့်အဖွဲ့ဝင်များ တက်ရောက်ခဲ့ပြီး သင်္ဃန်းကျွန်းခရိုင်စီမံအုပ်ချုပ်ရေးအဖွဲ့ဥက္ကဋ္ဌမှ မြို့နယ်အတွင်းဖွံ့ဖြိုးရေးလုပ်ငန်းများအား ဆက်လက်ပူးပေါင်းဆောင်ရွက်သွားကြရန် နိဂုံးချုပ်အမှာစကားပြောကြားကာ အခမ်းအနား ပြီးမြောက်ခဲ့ကြောင်း သတင်းရရှိသည်။
ခင်ဆွေနှင်း
https://t.me/MyanmarNationalPost
No comments:
Post a Comment