MNP ၊ အောက်တိုဘာ ၁၆
မန္တလေးတိုင်းဒေသကြီး၊ သပိတ်ကျင်းခရိုင်နှင့် စဉ့်ကူးမြို့နယ်အတွင်းရှိ ငါးမွေးတောင်သူများနှင့် ရေလုပ်သားများအား အယ်နီညိုရာသီဥတု ဖြစ်ပေါ်မှုကြောင့် ငါးမွေးမြူရေးကဏ္ဍအပေါ် သက်ရောက် နိုင်မှုများအား ကြိုတင်ကာကွယ်နိုင်ရေး အသိပညာပေးဟောပြောပွဲကို ယနေ့နံနက် (၁၀)နာရီ အချိန်က စဉ့်ကူးမြို့ ငါးလုပ်ငန်းဦးစီးဌာနရုံးတွင် ကျင်းပပြုလုပ်ခဲ့သည်။
ရှေးဦးစွာ ခရိုင်ငါးလုပ်ငန်းဦးစီးဌာနမှ ရိုင်ဦးစီးမှူး ဦးဇော်သန်း က အယ်နီညိုရာသီဥတု ဖြစ်ပွား ရခြင်းနှင့် အယ်နီညိုရာသီဥတုဖြစ်ပေါ်မှုကြောင့် ငါးမွေးမြူရေးကဏ္ဍအပေါ် သက်ရောက်နိုင်မှုများအား ကြိုတင်ကာကွယ်နိုင်ရန် အချက်များ၊ ဖြစ်ပွားချိန်တွင် လုပ်ငန်းများဆောင်ရွက်ခြင်းနှင့် အယ်နီညို ဖြစ်ပွားပြီးနောက် ပြန်လည်ထူထောင်ရေးလုပ်ငန်းများ ဆောင်ရွက်နိုင်ရေး လုပ်ဆောင်ရမည့် အချက် များအား အသိပညာပေးဟောပြောခဲ့သည်။ ထို့နောက် စဉ့်ကူးမြို့နယ် ဦးစီးဌာနမှူး ဦးနေလင်း က ငါးမွေးမြူရေးကန်များ ရေကြီးနစ်မြုပ်မှုနှင့် အပူချိန် ပြင်းထန်လွန်ကဲမှုဒဏ်မှ ကြိုတင်ကာကွယ်နိုင်ရေး ဆောင်ရွက်ရမည့် လုပ်ငန်းများအား ရှင်းလင်းဟောပြောခဲ့ရာ တက်ရောက်လာကြသူများ ၏ ပြန်လည်မေးမြန်းဆွေးနွေးခဲ့မှုအပေါ် ပြန်လည်ရှင်းလင်းပြောကြားခဲ့သည်။
အဆိုပါ ဟောပြောပွဲသို့ စဉ့်ကူးမြို့နယ်အတွင်းရှိ ငါးမွေးတောင်သူများနှင့် ရေလုပ်သားများ စုစုပေါင်း (၃၀)ဦး တက်ရောက်ခဲ့ပြီး ဟောပြောပွဲသို့ တက်ရောက်လာသူများအား အယ်နီညိုရာသီဥတုကြောင့် ငါးမွေးမြူရေး ကဏ္ဍအပေါ်သက်ရောက်နိုင်မှု ကြိုတင်ကာကွယ်ရေး အသိပညာပေး လက်ကမ်းစာစောင် များအား ဖြန့်ဝေပေးခဲ့ကြောင်း စဉ့်ကူးမြို့နယ် ငါးလုပ်ငန်းဦးစီးဌာနမှူး ဦးနေလင်း ထံမှ သိရသည်။
တင်ဇာလွင်
https://t.me/MyanmarNationalPost
No comments:
Post a Comment