MNP ၊ အောက်တိုဘာ ၄
မွန်ပြည်နယ်၊ မုဒုံမြို့နယ်တွင် ဆီထွက်သီးနှံ(နေကြာ)တိုးချဲ့စိုက်ပျိုးနိုင်ရေးအတွက် တာဝန်ရှိသူများနှင့် ဒေသခံတောင်သူများ တွေ့ဆုံပွဲကို ယနေ့နံနက် ၁၀ နာရီက ကတုံးပေါ်ကျေးရွာရှိ ဘုန်းကြီးကျောင်းဓမ္မာရုံ၌ ပြုလုပ်သည်။
တွေ့ဆုံပွဲတွင် မုဒုံမြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးပြည်သိမ်းက ဒေသတွင်းစာနပ်ရိက္ခာဖူလုံစေပြီး တောင်သူများအချိန်တိုအတွင်း အကျိုးအမြတ်ရရှိနိုင်မည့် စပ်မျိုးနေကြာစိုက်ပျိုးမှုတွင် လိုအပ်ချက်များကို စိုက်ပျိုးရာသီမတိုင်မီ ကြီးကြပ်ဆောင်ရွက်ပေးမည်ဖြစ်ကာ လျာထားချက်ပြည့်မီစွာ စိုက်ပျိုးနိုင်ရေးနှင့်စိုက်ပျိုးထုတ်လုပ်မှုတိုးတက်မြင့်မားရေးအတွက် ဆောင်ရွက်ရန်ပြောကြားသည်။ ထို့နောက်မြို့နယ်စိုက်ပျိုးရေးဦးစီးဌာနမြို့နယ်ဦးစီးမှူးက တောင်သူများ၏လိုအပ်သော စပ်မျိုးနေကြာကို ဌာနအနေဖြင့် ပြည့်ဝစွာစုဆောင်းထားပြီးဖြစ်ကြောင်း၊ ပြည်နယ်အစိုးရ၏လမ်းညွှန်မှုဖြင့် ဓာတ်မြေသြဇာသွင်းအားစုများကိုသက်သာသည့် စျေးနှုန်းဖြင့် ရောင်းချထောက်ပံ့ပေးသွားမည်ဖြစ်ကြောင်း၊ နိုင်ငံတော်၏ စီးပွားမြှင့်တင်ရေး ရန်ပုံငွေမှ တစ်ဧကလျှင် ငွေကျပ်(၂၀၀၀၀၀) ထုတ်ချေးပေးမည်ဖြစ်ကြောင်းနှင့် စိုက်ပျိုးရာသီတွင် အပွင့်မပွင့်မီရေသွင်းစိုက်ပျိုးနိုင်ရန်အတွက် ချောင်းပိတ်၊ မြောင်းပိတ်ဆောင်ရွက်ပေးမည်ဖြစ်ကြောင်း ရှင်းလင်းပြောကြားပြီး တောင်သူများ၏ လိုအပ်ချက်များကို တာဝန်ရှိသူများက ပေါင်းစပ်ညှိနှိုင်း ဆွေးနွေးပေးခဲ့သည်။
မုဒုံမြို့နယ်တွင် ဆီထွက်သီးနှံ(နေကြာ)ကို ၂၀၂၂-၂၀၂၃ ခုနှစ်တွင် စိုက်ဧက(၂၄၆)ဧကကို စိုက်ပျိုးနိုင်ခဲ့ပြီး ယခုနှစ်တွင် စိုက်ဧက(၁၁၀၀)ဧက စိုက်ပျိုးရန်လျာထားကာ လျာထားချက်ပြည့်မီအောင်စိုက်ပျိုးနိုင်ရန် မြို့နယ်စိုက်ပျိုးရေးဦးစီးဌာနက တောင်သူများနှင့်အတူပေါင်းစပ်ညှိနှိုင်း ဆောင်ရွက်လျက်ရှိကြောင်း သိရသည်။
သားငယ်
https://t.me/MyanmarNationalPost
No comments:
Post a Comment