MNP ၊ အောက်တိုဘာ ၆
နယ်စပ်ရေးရာဝန်ကြီးဌာန၊ ပညာရေးနှင့်လေ့ကျင့်ရေးဦးစီးဌာန၊ လွိုင်ကော်မြို့၊ အမျိုးသမီးအိမ်တွင်းမှု လုပ်ငန်းပညာသင်တန်းကျောင်းခန်းမ၌ ယနေ့နံနက်ပိုင်းက အဆင့်မြင့်အိမ်တွင်းမှု စက်ချုပ်သင်တန်း အမှတ်စဉ် (၃) သင်တန်းဆင်းပွဲအခမ်းအနား ကျင်းပပြုလုပ်ခဲ့ရာ ကယားပြည်နယ်ဝန်ကြီးချုပ် ဦးဇော်မျိုးတင်၊ ပြည်နယ်အစိုးရအဖွဲ့ဝင်များ၊ ဒေသကွပ်ကဲရေးမှူး၊ ပြည်နယ်အဆင့်ဌာနဆိုင်ရာများနှင့် သင်တန်းနည်းပြများ၊ သင်တန်းသူများ တက်ရောက်ခဲ့ကြသည်။
ရှေးဦးစွာ ကယားပြည်နယ်ဝန်ကြီးချုပ် ဦးဇော်မျိုးတင်က အဖွင့်အမှာစကားပြောကြားရာတွင် နိုင်ငံတော်အနေဖြင့် လူ့စွမ်းအားအရင်းအမြစ် ဖွံ့ဖြိုးတိုးတက်စေရေး၊ နယ်စပ်ဒေသတိုင်းရင်းသားသူများ၏ မိသားစုဘဝမြင့်မားလာစေရေးနှင့် မိမိနိုင်ငံအတွင်း လုပ်ကိုင်စားသောက်နိုင်ရေးအတွက်ရည်ရွယ်၍ အခမဲ့အသက်မွေးပညာသင်တန်းများကို တာဝန်ယူဖွင့်လှစ်ပေးလျက်ရှိကြောင်း၊ ယနေ့လူငယ်များ၏ဖျတ်လတ် တက်ကြွပြီးကြိုးစားလိုစိတ်နှင့် ကြိုးစားနိုင်သည့် ခွန်အားများကို လက်တွေ့အသုံးချကာ အသိပညာ၊ အတတ်ပညာများပြည့်ဝပြီး ထူးချွန်ထက်မြက်သည့် လူငယ်လူရွယ်များ မွေးထုတ်ပေးရန်လိုကြောင်း၊ သင်တန်းသူများအနေဖြင့် မိမိတို့သင်ယူတတ်မြောက်ခဲ့သည့် အိမ်တွင်းလက်မှုပညာရပ်များကိုအခြေခံ၍ မိသားစုဝင်ငွေတိုးစေမည့် ကိုယ်ပိုင်စီးပွားရေးလုပ်ငန်းများနှင့် ခိုင်မာစွာရပ်တည်နိုင်အောင် ကြိုးစားဆောင်ရွက် သွားကြစေလိုကြောင်း၊ နိုင်ငံတော်၏ကုန်ထုတ်စွမ်းအားစုများကို အထောက်အကူပြုနိုင်မည့် အမျိုးသမီးစီးပွားရေးစွမ်းဆောင်ရှင်များဖြစ်အောင် ကြိုးစားသွားကြစေလိုကြောင်း၊ ပြည်နယ်အစိုးရအဖွဲ့အနေဖြင့်လည်း သင်တန်းသူများ၏ အသက်မွေးဝမ်းကြောင်းပညာနှင့် အလုပ်အကိုင်များ ရရှိစေရေးအတွက် ပံ့ပိုးကူညီဆောင်ရွက်ပေးသွားမည်ဖြစ်ကြောင်း ပြောကြားခဲ့သည်။
ထို့နောက် အမျိုးသမီးအိမ်တွင်းမှုလုပ်ငန်း ပညာသင်တန်းကျောင်း ကျောင်းအုပ်ကြီး ဒေါ်အေးအေးသွင်က သင်တန်းကာလအတွင်း သင်တန်းနည်းပြများနှင့် သင်တန်းသူများ၏ သင်ကြားရေးလုပ်ငန်းများ ဆောင်ရွက်မှု နှင့် လှုပ်ရှားမှုများအား Power Point ဖြင့် ရှင်းလင်းတင်ပြခဲ့သည်။
ဆက်လက်ပြီး ပြည်နယ်ဝန်ကြီးချုပ်က အဆင့်မြင့်အိမ်တွင်းမှု စက်ချုပ်သင်တန်း အမှတ်စဉ်(၃)၌ သင်တန်းထူးချွန်ဆုရ သင်တန်းသူတစ်ဦးအား ဂုဏ်ပြုဆုပေးအပ်ချီးမြှင့်ပြီး ကျောင်းအုပ်ကြီးက မြို့နယ်အလိုက် သင်တန်းသူများအား သင်တန်းဆင်းအောင်လက်မှတ်များကို ပေးအပ်ခဲ့သည်။
ယင်းနောက် ပြည်နယ်ဝန်ကြီးချုပ်နှင့်တာဝန်ရှိသူများက သင်တန်းနည်းပြများ၊ သင်တန်းသူများနှင့် စုပေါင်းမှတ်တမ်းတင်ဓာတ်ပုံရိုက်ကူးခဲ့ကြပြီး သင်တန်းသူများအား ရင်းရင်းနှီးနှီးနှုတ်ဆက်စကား ပြောကြားကာ သင်တန်းသူများ၏ အိမ်တွင်းမှုလက်ရာများ ခင်းကျင်းပြသထားမှုကို လှည့်လည်ကြည့်ရှု အားပေးခဲ့ကြကြောင်း သိရသည်။
https://t.me/MyanmarNationalPost
No comments:
Post a Comment