MNP ၊ နိုဝင်ဘာ ၂၅
ပညာရေးဝန်ကြီးဌာန၊ ၂၀၂၃-၂၀၂၄ ခုနှစ် ပညာရေးဒီဂရီကောလိပ်ပေါင်းစုံ (ရန်ကုန်ဇုန်)(ဇုန်-၂)၏ အားကစားပြိုင်ပွဲများတွင် သွားရောက်ယှဉ်ပြိုင်ခဲ့ပြီး အောင်ပွဲရရှိခဲ့သော ဘားအံပညာရေးဒီဂရီကောလိပ် ကျောင်းသားအားကစားအဖွဲ့သည် ယမန်နေ့မွန်းလွဲ ၂ နာရီခွဲခန့်က ကရင်ပြည်နယ်၏မြို့တော် ဘားအံမြို့သို့ မော်တော်ယာဉ်များဖြင့် ပြန်လည်ရောက်ရှိလာရာ ဒေသခံတိုင်းရင်းသားပြည်သူများက သောင်းသောင်းဖြဖြ ဂုဏ်ပြုကြိုဆိုခဲ့ကြသည်။
ပြန်လည်ရောက်ရှိသော အောင်ပွဲရဘားအံပညာရေးဒီဂရီပ်ကောလိပ် ကျောင်းသားအားကစားအဖွဲ့အား ပြည်နယ်ဝန်ကြီးချုပ် ဦးစောမြင့်ဦးနှင့်ဇနီး၊ ပြည်နယ်တရားလွှတ်တော်တရားသူကြီး ချုပ်ဒေါ်ခင်ဆွေထွန်း၊ ပြည်နယ်အစိုးရအဖွဲ့ဝင်များနှင့် ၎င်းတို့ဇနီးများ၊ ဌာနဆိုင်ရာများ၊ ဘားအံပညာရေးဒီဂရီကောလိပ်မှ သင်တန်းသား၊ သင်တန်းသူများ၊ ကျောင်းသား၊ ကျောင်းသူ၊ ဆရာ၊ ဆရာမများ၊ အားကစားဝါသနာရှင် ဒေသခံတိုင်းရင်းသားပြည်သူများက ဘားအံမြို့အဝင်မုခ်ဦးမှစ၍ အိုးစည်ဒိုးပတ်အတီးအမှုတ်အကအခုန်များ၊ ကရင်ရိုးရာယဉ်ကျေးမှုဒုံးအကများ၊ ဘင်ခရာ၊ ပန်းပွားအကများဖြင့် အောင်သပြေကမ်းပန်းကုံးစွပ်၍ သောင်းသောင်းဖြဖြ ဂုဏ်ပြုကြိုဆိုခဲ့ကြပြီး ပြည်နယ်ဝန်ကြီးချုပ်က ဖျော်ဖြေရေးအဖွဲ့နှင့် ယဉ်ကျေးမှုအဖွဲ့များအား ဂုဏ်ပြုဆုငွေများ ပေးအပ်ချီးမြှင့်ခဲ့သည်။
ထို့နောက် ဂုဏ်ပြုပွဲအခမ်းအနားကို ပြည်နယ်အစိုးရအဖွဲ့ရုံး အစည်းအဝေးခန်းမ(၂)၌ ဆက်လက်ကျင်းပရာ ပြည်နယ်ဝန်ကြီးချုပ်က အားကစားစိတ်ဓာတ်အပြည့်ဖြင့် ကြိုးကြိုးစားစားယှဉ်ပြိုင်ကစားခဲ့ကြပြီး ထိုက်ထိုက်တန်တန်ပထမဆုကိုအနိုင်ရရှိခဲ့သည့် အောင်ပွဲရအမျိုးသားဘောလုံးအသင်း၊ ဒုတိယဆုရရှိခဲ့သည့်အမျိုးသမီးဘော်လီဘော အသင်းအစရှိသည့် အားကစားသမားများအနေဖြင့် မိမိကျောင်းတော်ကြီး၏ဂုဏ်၊ ပြည်နယ်၏ဂုဏ်ကို မြှင့်တင်ပေးနိုင်ခဲ့ကြသည့်အတွက် များစွာဂုဏ်ယူဝမ်းမြောက်ပါကြောင်း၊ ဘားအံပညာရေးဒီဂရီကောလိပ်ကို ကိုယ်စားပြုပြီး သွားရောက်ယှဉ်ပြိုင်ကြသည့် အားကစားသမားမောင်မယ်များအနေဖြင့် မိမိတို့ယှဉ်ပြိုင်ရသည့်အားကစားနည်းအလိုက် အကောင်းဆုံးနှင့်စည်းကမ်းတကျ ကြိုးစားယှဉ်ပြိုင်ခဲ့ကြသည်ဟုယုံကြည်ပြီး ရှေ့ဆက်မည့်လုပ်ငန်းများတွင်လည်း အောင်မြင်မှုများရရှိအောင် ဆက်လက်ကြိုးပမ်းဆောင်ရွက်သွားကြရန်၊ ပညာရေးတွင်သာမက အားကစားဘက်တွင်လည်း ထူးချွန်ထက်မြတ်သောဆရာများဖြစ်အောင် ကြိုးစားကြစေလိုကြောင်း ဂုဏ်ပြုပြောကြားသည်။
ယင်းနောက် ဘားအံပညာရေးဒီဂရီကောလိပ်အုပ်ချုပ်နည်းပြဆရာတစ်ဦးက ပြိုင်ပွဲအတွေ့အကြုံများကို ရှင်းလင်းပြောကြားပြီး အောင်ပွဲရအားကစားသမားတစ်ဦးက ကျေးဇူးတင်စကားပြန်လည်ပြောကြားကာ ပြည်နယ်ဝန်ကြီးချုပ်က ဂုဏ်ပြုချီးမြှင့်ငွေ (၂၁)သိန်းကို ကျောင်းအုပ်ဆရာမကြီးနှင့် အောင်ပွဲရအားကစားအဖွဲ့ထံ ပေးအပ်ခဲ့သည်။
ဆက်လက်၍ ကရင်ပြည်နယ်၏မြို့တော် ဘားအံမြို့အား မြို့တော်အင်္ဂါရပ်များနှင့်အညီ သဘာဝပတ်ဝန်းကျင်ထိန်းသိမ်းရေးနှင့် Green City, Clean City ဖြစ်စေရေး ဌာနဆိုင်ရာများနှင့် ရပ်ကွက်နေပြည်သူများပူးပေါင်း၍ နိုဝင်ဘာလ ၂၅ ရက်နေ့ နံနက်ပိုင်းက ဘားအံမြို့ပေါ်ရှိ ဘုန်းတော်ကြီးကျောင်းနှင့် ဘုရားစေတီများတွင် စုပေါင်းသန့်ရှင်းရေးလုပ်ငန်းများ ဆောင်ရွက်ခဲ့ကြသည်။
https://t.me/MyanmarNationalPost
No comments:
Post a Comment