MNP ၊ ဖေဖော်ဝါရီ ၈
အာဆီယံဆိုင်ရာ မြန်မာအမြဲတမ်းကိုယ်စားလှယ် ဦးအောင်မျိုးမြင့် သည် မြန်မာနိုင်ငံ၏ မိုခါဆိုင်ကလုန်းမုန်တိုင်းအလွန်ကာလ ပြန်လည်ထူထောင်ရေးလုပ်ငန်းများအတွက် ဖိလစ်ပိုင်အစိုးရမှ အမေရိကန်ဒေါ်လာ(၁)သိန်း လှူဒါန်းပေးအပ်သည့် အခမ်းအနားသို့ ပါဝင်တက်ရောက်ခဲ့သည်။
အလှူငွေလွှဲပြောင်းပေးအပ်မှု အခမ်းအနားကို ၆-၂-၂၀၂၄ ရက်နေ့တွင် အင်ဒိုနီးရှားနိုင်ငံ၊ ဂျကာတာမြို့ရှိ အာဆီယံ အတွင်းရေးမှူးချုပ်ရုံး၌ ကျင်းပခဲ့ရာ ဖိလစ်ပိုင်အစိုးရကိုယ်စား အာဆီယံဆိုင်ရာ ဖိလစ်ပိုင်အမြဲတမ်းကိုယ်စားလှယ် သံအမတ်ကြီး Hjayceelyn M. Quintana က လွှဲပြောင်းပေးအပ်ခဲ့ပြီး အာဆီယံလူသားချင်းစာနာထောက်ထားမှု အကူအညီ ပေးအပ်ရေးဆိုင်ရာ ညှိနှိုင်းရေးမှူး (SG-AHAC) အဖြစ် အာဆီယံအတွင်းရေးမှူးချုပ်က လှူဒါန်းမှုကို လက်ခံခဲ့သည်။
မြန်မာအမြဲတမ်းကိုယ်စားလှယ်က “တစ်ခုတည်းသောအာဆီယံ၊ တစ်ခုတည်းသော တုံ့ပြန်မှု” ဟူသော သန္နိဋ္ဌါန်နှင့်အညီ မြန်မာနိုင်ငံနှင့် တစ်သားတည်းရပ်တည်လျက် အကူအညီပေးအပ်မှုအတွက် မြန်မာပြည်သူများကိုယ်စား ဖိလစ်ပိုင်အစိုးရနှင့် ပြည်သူများအား အထူးကျေးဇူးတင်ရှိကြောင်း ပြောကြားခဲ့သည်။
အခမ်းအနားသို့ အာဆီယံဆိုင်ရာမြန်မာအမြဲတမ်းကိုယ်စားလှယ်အဖွဲ့ရုံး၊ အာဆီယံဆိုင်ရာ ဖိလစ်ပိုင်အမြဲတမ်းကိုယ်စားလှယ်အဖွဲ့ရုံးနှင့် အာဆီယံအတွင်းရေးမှူးချုပ်ရုံးမှ ကိုယ်စားလှယ်များ တက်ရောက်ခဲ့ကြောင်း သိရသည်။
https://t.me/MyanmarNationalPost
No comments:
Post a Comment